2 Koriniti 11

I Paula beto ira na tinoni tagarunu sesekedi

1Ara qa nyoroguanigou sa agou buke tupele palenisiu totonai ba vei kai tinoni nyo rururaqu iapeki. Muke tupele palenisiu! 2Ara qa kopu totonigou pana vairoqu tana Tamasa sagou, ura agou sa qu vei na rereko liosona ara tu qa tei vaiviva vania tu na marenena, ko na marene isa sa na Karisito. 3Ba ara qa matagutunia sa kita kaki mai toni vapirua na roqumiu ko mu noso roroqua agou pana soana sosotona beto na okotona sa na Karisito. I Setani ba sa toni vapirua pana ona soana vaivaloposona si Ivi, ko ara qa matagutunia sa kita mai veinigou ira isa sagou. 4Muke tupele palenisiu ara ura tonai sa lame kai goto tinoni ko sa taraenia na veveina kai Jisu sa goto pana Jisu qe taraenia agei poni ba qu teku vakatapia gu. Beto quke ruavo tekua sa na gagala sa goto pana Gagala qu teku momoea beto ko quke ruavo tugu teku vakatapia sa na nongoro jongana sa goto pana nongoro jongana qu teku vakatapa momoea. 5Ara qake doro veinisiu na kepore veveiqu sa pana tadira na tinoni sesekedi qai gigala muleniria mekadi na tinoni tagarunudi aipira! 6Palu pana paranga qake boboka tugu sara, ba pana gigalai na bobokaqu tugu sara. Ko pana doru totoso beto pana doru soana sa qe tei vakabere vanigou tu agei sapi.

7Ara kepore kai poata ba tepanigou sa tonai qa taraenia na nongoro jongana tana Tamasa pana tamugou. Ara qa vaikete mulenisiu gu ko agou mu taovulu qau. Ko ai vei, qa sela sara tonai qa roiti vei inara? 8Ira goto ekelesia tu sa qai tabarasiu sara, ko kale pu ikoria tu ara sira na goto ekelesia tonai qa roiti nabulunigou sagou. 9Beto totonai qa suvere tavitigou ko ba qasania kaki sakasa, poni qake vajujunogou sagou. Ira tu na tavitiqu qai lame vei pa Masidonia sa qai pogoso lame vanisiu sa doru sakasava qa qasaniria. Ko pana totoso qai jola pori sa qa oqoro vajujunogou ara sagou, ko vuka risa ba maneke isongo vajujunogou tugu sagou. 10Pana laena na sosoto tana Karisito sa kole pana taqu, sa ara qa maulunia sa na qua vaqata api sa mineke tavanogoto pana doru eqa pa Akaia. 11Tonai maneke vajujunogou qau, poni sa ai vei qake roroqugou sa qa vei inara? Dai, na Tamasa sa gigila vataleaona sa ara qa roroqugouqua sagou!

12Ara manake beto toania sa na uana qa korapa toania, ko ma teku pale sa na kutana qai vaqatania ira qai gigala muleniria mekadi na tinoni tagarunudi qarigu beto ko qai paranga sa ira ba qai roitinia tugu sa na roiti qe roitiniria agei qarigu. 13Ira na tinoni aipira sa na tinoni tagarunu sesekedi, na tinoni roiti nyonyoravadi beto ko qai vatadogoro mule veiniria mekadi na tinoni tagarunudi tana Karisito. 14Ba nake tavaivarurana sa! Ura i Setani tu ba sa boka gu vatadogoro veinia mekana kai mateana tana kabere! 15Ko nake tavaivarurana sa bi vei ira na ona nabulu sa bi vatadogoro veiniria ira na nabulu sosotodi tana na tuvisi. Pa vinabebetona sa mai tekua tugu ira sa na vuana na dia roiti ikikeredi.

Na tapata sa gosororia i Paula na tinoni tagarununa

16Qa tei pojanigou tu sa, ba ma kai pojanigou mule sa muke doro veinisiu kai tinoni rururaqu sara. Ba vei muna doro veinisiu tugu na rururaqu poni sa ego mu vakatapa veinisiu kai tinoni rururaqu tugu ropi, ko ara ba ma boka tugu vaqata iapeki ropi. 17Isa qa pojai kopira ko qa korapa vavaqatanisiu mekaqu sa nake isa vei sa nyoroguanisiu na Bangara sisa, goto isa gu na roiti tana tinoni rururana. 18Ba ura sokudi sira na tinoni qai vaqata pana soana tana kasia gusu, ko sa vei sa ara ba ma rajaqua tugu ropi. 19Ura agou qu doro veinigou na tavagigalamiu ke, ko ira tu na rururadi qaike tuvisi ba qu tavaraguaniria! 20Ira tu qai vapinausugou, qai vapuputigou, qai tutinigou dia roroqu, qai doro vagogoregou, babi qai poaragou, ba quke tupele paleniria tugu ke! 21Qa keaqua tugu ko mana pojai ara sapi, ba agei sa qe matagutu roitiniria sira na sakasava vevei inara!

Kopira qa nyoro paranga vei tu kai tinoni rururaqu sara, ba vei koledia sira kaki maike matagutu vaqatania kaki sakasa poni sa ara ba boka vaqata gu. 22Na tinoni Hiburu sira qarigu? Ara ba kame tugu. Na tinoni Izireli sira qarigu? Ara ba kame tugu. Na tuti lageredi ti Ebarahami sira qarigu? Ara ba kame tugu. 23Na nabulu tana Karisito sira qarigu? Kopira sa qa paranga vei kai tinoni kepore sosoto roququ sara, ba ara sa kai nabulu jongana jolaniria ira! Ara qa roiti viviva jolaniria ira, qa tei tavatome tu pa ruma vaipiu soku totoso, qa tei dori tapipiqolo tu, beto soku totoso qa tata gosoria na mate. 24Ka lima okokoto totoso sa ira na Jiu qai piqolosiu sara, ko pana lima totoso ira qai okokoto vanisiu uengavulu sia piqolo. 25Kue totoso qai piqolonisiu na kolu ira na tinoni Romu, beto kai totoso qai gonanisiu na patu ira na tinoni. Kue totoso sa tapiaranisiu na vaka pa kolo, beto kai rane doruna beto na bongi doruna qa ole pa kolo. 26Pa sokuna na qua rerege ara qa gosororia sira na tapata pana pie qai nyoro, na tapata pana tadira na tinoni raja ikikodi, na tapata pana tadira na turaqu mekaqu, na tapata tadira na tinoni karovodi, na tapata pana tadira na gusu lavata, na tapata pana qega, na tapata pa ivere, na tapata pana tadira qai tuti sesekea na Karisito. 27Qa roiti vivivaniria na roiti tapatadi, ko soku totoso qake boka puta. Soku totoso sa keporenisiu na gagani ko qa burana na kidepe, beto qake vagaroa na poko ko qa gosoria na lomoso. 28Beto ko koledia mule sira kaki sakasa qake pojaria, beto doru rane sa qa pogosia gu ara sa na roroqu mamatadi ira doru ekelesia. 29Totonai qai munyala sa kaki tinoni, poni ara ba qa vagigilai tugu na munyala. Totonai qai tatoni vasela sa kaki, poni ara sa qai vaikusiu sira qai vaitoni vapiru.

30Totonai mana vaqata sara, poni mana vaqataniria gu ara sira na sakasa qai vatadogoronia na qua munyala. 31Na Tamasa na Tamana na Bangara i Jisu, isa na Tamasa sa pada ko mina tavatarasae kamua na kamua sa gigilaiona sa ara qake seseke. 32Pa Damasikasi sa na qavuna sa kole pana kopu tana Bangara i Aretasi sa gelenia sa na gusu lavata pa Damasikasi ko mi aru tamanasiu ara sau. 33Ba ara qa tavasikulu gore pana kai leo mane pana kai vuidana na tobana na gugusu ko qa ukunia sisa.

Currently Selected:

2 Koriniti 11: LGA

Highlight

Copy

Compare