1 Jone 5
5
Na Oda Rangena Na Tuna Na Tamasa
1Na tinoni sa vasosotoa i Jisu sa na Karisito sau sa na podona tana Tamasa sisa. Ko na tinoni sa roroqua sisa sa vaivapore sa sa roroqua tugu vei sa na tuna sa vaporea. 2Pira vei taqe gigilai gita sa taqe roroquria sira na koburu tana Tamasa: tonai taqe roroqua sa na Tamasa beto taqe roitinia na garunu tana. 3Api sa na vairoqu tana Tamasa: ko gita ta kopuniria na garunu tana. Ko ira na garunu tana sa nake tapatadi, 4ura doruna qai podo tana Tamasa qai tei vakilasia tu sa na kasia gusu. Ko na oda rarange sa na neqi sa vakilasia sa na kasia gusu. 5I sei sa na tinoni sa vakilasia na kasia gusu? Kepore mutugu goto isa tugu na tinoni gu sa vasosotoa na Tuna na Tamasa si Jisu.
Na Sosotona Na Vavakato Tana Tamasa
6I Jisu Karisito sa isa sa lame pana kolo beto pana orungu. Ko nake pana kolo gu mekana isa sa tapaputaisonia goto pana orungu tugu vei isa sa nyoa tonai sa mate. Ko na Gagala mekana sa ulenia sa na vavakato api, ura na Gagala sa na sosoto. 7Ko ira kue qai ulenia sa na vavakato:#5.7 Kaki kukuti nake loka pa moadi sa pira sau sa na pikata 7: Ko ira kue qai ulenia sa na vavakato pa noka: na Tamana, na Tuna beto na Gagala Tabuna, beto ira kue pira sa kame. Beto ira kue qai ulenia na vavakato pa peso: 8na Gagala, na kolo beto na orungu. Ko ira kue kame gu sa na dia vavakato. 9Vei tana boka vasosotoa gita sa na vavakato tadira na tinoni, poni na vavakato tana Tamasa sa sa poreveveina jola. Ko api sa na vavakato tana Tamasa isa sa tei vavakatonia tu na veveina na Tuna. 10Na tinoni sa vasosotoa na Tuna na Tamasa sa sa isongia na vavakato sosotona pa ona toa. Na tinoni sake vasosotoa na vavakato tana Tamasa sa sa vasekea sa na Tamasa, ura sake vasosotoa na tinoni isa sa na vavakato tana Tamasa na veveina na Tuna. 11Ko api sa vavakato isa: na Tamasa sa tei vanigita tu na toa jola, ko na toa api sa kole tana Tuna. 12Na tinoni sa tekua na Tuna sa isongia sa na toa api, goto na tinoni sake tekua na Tuna na Tamasa sa sake isongia sa na toa.
Na Paranga Vinabebetona
13Dorudi pira sa qa kuti laoniria ara tamugou ko agou mu gigila vatalea sa qu isongia na toa jola sagou qu vasosotoa na isongona na Tuna na Tamasa qau. 14Ko api sa taqe varenenia gita pa moena na Tamasa: tonai na sa tabe tepai isa sa tutia na nyorogua tana, poni sa isa sa nongorogita. 15Ko vei tana gigilai sa doru kai sa taqe tepai sa isa sa vanigita gu, poni sa taqe gigilai sa taqe tekuria gu gita sira na sakasa taqe tepania isa.
16Vei kai tinoni bi batia kai turana bi roitinia na sela isa minake toni laonia pa mate isa, poni mi vavara ko na Tamasa mi vania na toa sa na tinoni isa. Na veveidi ira na tinoni qai roitinia na sela minake vakamuniria pa mate sa qa korapa pojaria ara. Goto koleona sa na sela mina boka kamunia pa mate na tinoni. Ara qake pojanigou ko mu vavarania sisa. 17Doru roiti ikeredi sa na sela gu, ba koleona na sela sake vaivakamu pa mate.
18Gita taqe gigilai sa isa sa podo tana Tamasa sake sela, ura isa sa podo tana Tamasa sa kopunia ko na kutana nikerena sake boka koti vikeria. 19Gita taqe gigilai sa na ona na Tamasa sa gita, beto na kasia gusu doruna sa qai kole pa kauruna na neqi tana kutana nikerena. 20Taqe gigilai gita sa na Tuna na Tamasa sa tei lame tu beto sa tei vanigita tu na gigalai ko taqe boka gigilai gita sa isa na sosoto. Ko gita sa taqe kole tana sa sosoto- i Jisu Karisito na Tuna. Isa sa na Tamasa sosoto beto na toa jola.
21Ka visa qua koburu, mu uku paleniria sira na tamasa sesekedi.
Currently Selected:
1 Jone 5: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
