رؤیا یوحَنّا 9
9
1مَلاک الْخامِس نَفَخ بوقه، وَ أنا شِفِت نَجمه ساقطه مِن السَّماء عَلَیٰ الْأرض. إنْعَطیٰ لِهَي الْنَجمه مِفتاح بیر الْهاویه إلْلي ماله نَهایه. 2مِن هُوَّ فِتَح بير الْهاويه، گام مِنَّه دَخان کَدَخان دوغه عَظیمه، بي شِکِل إلْلي الشَّمِس وَ الْجَو ظُلمَن مِن دَخان الْبير. 3وَ مِن بِین الدَّخان، إیّه یَراد عَلَیٰ الْأرض وَ إنْعطالهِن قُدرَه کَقُدرَة عَقارِب الْأرض، 4وَ إنگال ألهِن لا یِضُرَّن خَضار الْأرض، وَ لا یِضُرَّن أي نَبَات لو شِجرَه، بِل بِس یِضُرَّن ذاکول أشخاص إلْلي ما عِندهُم خَتم الْإلَه عَلَیٰ گُصَّتهُم. 5وَ إنْسِمَح ألهِن إلْلي یِعَذبَن ذاکول الْأشخاص لِمُدَّة خَمِس تِشهُر، بِدون لا یِقِتلَنهُم. وَ عَذاب إلْلي ذاکول الْأشخاص إتحَمِّلُوا چان مِثِل عَذاب لِذعَة الْعَگرَب، وَکت إلْلي یِلذَع الْإنسان. 6بي ذَکَن الْأیَّام النَّاس راح ایدَوْرون الْمُوت، أمَّن ما راح یِلگونه؛ راح یِتْمَنّون الْمُوت، أمَّن الْمُوت راح یِهرَب مِنهُم.
7ذاک الْیَراد چان بي شِبَه خِیول إلْلي مِستَعِدّات لِلْقَتال. عَلَیٰ روسهِن چان شي یِشبَه تاج ذَهَب وَ وَیوههِن چان یِشبَه وَیه الْإنسان. 8چان عِندهِن شَعَر کَشَعر الْنِسوان وَ أضروس کَضِرس الْأسود. 9چان عِندهِن دِرِع مِن حَدید عَلَیٰ إصدورهِن، وَ صوت ایناحاتْهِن چان مِثِل ضَجیج الْخَیل وَ مِثِل عَرّابات چِثیره إلْلي هاجمات لِلْحَرُب. 10چان عِندهِن أذیول وَ لِذعات مِثِل ذَیل وَ لِذعَة الْعَگرَب، وَ بي ذیولهِن چان قُدرَه إلْلي یِعَذبِن النَّاس لِحَد خَمِس تِشهُر. 11مَلِکهِن چان مَلاک بیر الْهاویه إلْلي بي الْسَان الْعَبریین أسمه چان ”أَبَدون“، وَ بي الْیُوناني چان ”آپولیون“.
12أوَّل ”وَیل“ تَعَدّه. شوف، آتیات ”وَیلِین“ آخَر.
13مَلاک السَّات نَفَخ بوقه، وَ أنا سِمَعِت نَداء إلْلي یِگوم مِن أربَع أگرون مَذبح الذَّهَبي الَّذي إیکون بي حُضور الْإلَه؛ 14وَ سِمَعِت إلْلي لِذاک مَلاک السَّات إلْلي چان عِندَه بوق، گال: «حَرِّر ذَکَن الْأربَع مَلائِکه إلْلي مَسجونات یِم نَهَر فُرات الْچِبیر.» 15چا تَحَرِّرَن ذَکَن الْأربع مَلائِکه إلْلي چانِن مِستَعِدّات لِهِل ساعه وَ لِهِل یُوم وَ لِهِل شَهَر وَ لِهِل سَنَه خاطِر یِقِتلِن ثُلْث النَّاس. 16عَدَد جَیش الْخَیَّاله چان میتَین مَلیون؛ أنا سِمَعِت عَدَدهُم.
17خَیول وَ الْخَیَّاله إلْلي شِفِتهُم بي رُؤیائي، هِیچ چانُوا: لابسین دِروع حَمَر کَلْلَهیب، وَ أزرَگ کَلْیاقوت وَ أصفَر کَلْچِبریت. رَؤس الْخَیول چان یِشبَه رَؤس الْأسود وَ مِن حَلِگهِن چان یِطلَع نار وَ دِخان وَ چِبریت. 18بي هِل ثِلِث بَلاوي إنْقِتلُوا ثُلْث النَّاس، بي النَّار وَ بي الدَّخان وَ بي الْچِبریت إلْلي چان یِطلَع مِن حَلِگهِن. 19قُدرَة الْخَیول چان بي حَلِگهِن وَ ذَیولهِن. لِأن ذَیولهِن چانِن یِشِبْهَن الْحَیَّایه، عَندهِن رَؤوس وَ بي وَسیلَتهِن چانِن یِأَذَّن.
20باجي النَّاس، إلْلي ما إنْقِتلُوا بي هِل بَلاوي، بَعَد مَرَّه هَم ما تابُوا مِن أعمال إیدِیهُم. بَعَد مَرَّه هَم ما یازُوا مِن عِبادَة أرواح الْشَیطانیّه وَ لا مِن عِبادَة أصنام الذَّهَب وَ الْفِضَّه وَ الْصُفُر وَ الْصَخَر وَ الْخَشَب إلْلي لا یِگِدرَن یِشوفَن وَ لا یِسِمعَن وَ لا یِتْحَرِکَن. 21وَ ذاکول هَم ما تابُوا مِن الْقَتِل وَ السِّحورَه وَ الزِّناء وَ بوگهُم.
Currently Selected:
رؤیا یوحَنّا 9: ACM
Highlight
Share
Compare
Copy
Want to have your highlights saved across all your devices? Sign up or sign in
©️2024 Korpu Company
