مَتّی 24
24
عَلامات أنتِهاء عَصر الْحَاضِر
1وَکت إلْلي عیسیٰ طِلَع مِن الْمَعبَد، چان یِمشي عَلَیٰ طَریقه، تِلامیذه إیَّوا خاطِر یِرَاوونه بِنْیَان الْمَعبَد. 2أمَّن عیسیٰ گال ألهُم: «إتْشوفون کِل هَذا؟ بِالْحَق، أگِلکُم، ما تُبقیٰ صَخرَه عَلَیٰ صَخرَه أخریٰ، بَل کِلَّه یِنهِدِم.»
3وَکت إلْلي عیسیٰ چان گاعِد عَلَیٰ یِبَل زِیتون، تِلامیذه لِوَحَدهُم إیَّوا یِمَّه، وَ گالُوا: «گِل ألنا یِمته یِوُگعَن هِل وَقایِع وَ شِنهو عَلامَة یِیتَک وَ أنتِهاء هَذا الزَّمان؟» 4عیسیٰ جاوَب: «دیرُوا بالکُم خاطِر أحَد لا یِضَیِّع طَریقکُم. 5لِأن چِثیرین راح إیّون بي أسمي وَ راح یِگولون، ”أنا مَسیح الْمُوعود،“ وَ راح یِضَیعون طَریق چِثیرین. 6أنتُم راح تِسِمعون أخبار الْحُروب وَ شایِعات الحُروب راح تُوصَل لِأذانکُم. أمَّن لا تِخْتَرشون، لِأن کون إتصیر هِیچ وَقایِع، أمَّن النَّهایَه بَعَدهي ما واصله. 7وَ هَم ایگومون قُوم عَلَیٰ قُوم وَ حُکومَه عَلَیٰ حُکومَه أخریٰ. وَ ایصیر گَحَط وَ راح تِیّي زَلازِل بي أماکِن مِختِلفه. 8أمَّن هِذِن کِلهِن بِس بِدایَة وُجَع الْمِیِّب إلْلي فاصِلَة الوُجَع أتقِل وَ أتقِل.
9«بي ذاک الزَّمان راح یِسَلمونکُم خاطِر چِثیر تِتأَذون، وَ راح یِقِتْلونکُم. وَ جَمیع الْأقوام راح یِکُرهونکُم لِخاطِر أسمي. 10بي ذِکِن الْأیَّام وایدین یِتْراجعون مِن إیمانهُم، شي راح إتْخون شي وَ شي راح تِکرَه شي. 11وَ ایگومون أنبیَاء الْکَذَبه وَ راح یِطَلعون نَاس چِثیرین مِن الْطَّریق. 12وَ بي سَبَب کِثرَة الشَّراره، راح تِبرَد مَحَبَّة چِثیرین. 13أمَّن کِلمَن یِضُل وافي لِحَد النَّهایَه، راح یِنجَح. 14وَ بِشارَة الْمَلکوت تِنْعِلِن لِکِل مَکان الْعالَم خاطِر إتکون شَهاده لِجَمیع الْأقوام. هِنّوب راح تُوصَل النَّهایَه.
15«أمِّن مِن شِفتوا ذاک "مَکروه الْمُخَرِّب" وَ الْکَریه وَ الْنَجِس بي مَکان إلْلي ماکون ایکون، حاطّینه بي مَکان الْمُقَدَّس - لِیِفهَم الْقارئ - 16بي ذاک الْوَکِت ذاکول إلْلي ایکونون بي مَنطَقة الْیَهودیّه، خِلْ یِشِرْدون لِلْیِبال؛ 17وَ کِلمَن إیکون عَلَیٰ سَطح الْبَیت، لا یِنزِل خاطِر یَأخِذ شي؛ 18وَ کِلمَن إیکون بي الزَّرِع، لا یِرجَع لِلْبَیت خاطِر یَأخِذ عَبایته. 19یا وَیل عَلَیٰ الْحَوامِل وَ الْأمَّهات إلْلي یِرَضعَن بي ذِکِن الْأیَّام! 20إنْدِعوا شَردَتکُم لا تْکون بي الشِّتَاء لُو بي یُوم الْشَبّات. 21لِأن بي ذاک الزَّمان إتْصیر فِرِد مُصیبه عَظیمه إلْلي مِن بِدایَة هَذا الْعالَم لِحَد هَسّه ما صایِر مِثِلها، وَ بَعَد هَم ما راح إتْصیر. 22لُو ذِکِن الْأیَّام ما چانَن صایرات إگْصار، أي بَشَر چان ما ضَل عَدِل. أمَّن لِخاطِر الْمُختارین راح يِگُصّرَن ذِکِن الْأیَّام.
23«بي ذاک الزَّمان، لُو واحَد یِگِلکُم، ”شوفوا، مَسیح الْمُوعود أهنا!“ لُو ”مَسیح الْمُوعود أهناک!“ لا تْأَجنون. 24لِأن مَسیحین کَذَبه وَ أنبیَاء کَذَبه ایگومون، راح یِصِنعون نِیاشین وَ مُعجِزات عَظیمه خاطِر لُو إیصیر، یِطَلعون الْمُختارین مِن الطَّریق. 25شوفوا، مِن گَبُل خَبِّرَتکُم. 26چا لُو یِگولون ألکُم، ”هُوَّ بي الْبَر،“ لا تِرْحون أهناک؛ وَ لُو گالُوا، ”هُوَّ بي الْبَیت،“ لا تْأَجنون. 27لِأن مِثِل ما الْبَرِق مِن شَرق السَّماء ایّي وَ نورَه یِضوي لِحَد الْغَرب، ظُهور ابن الْإنسان هَم راح إیکون هِیچ. 28وَین ما إتکون فِرِد لَشَّه، النُّسور تِنجِمِع أهناک.
29«فُوراً، مِن بَعَد مَصائِب ذِکِن الْأیَّام
«”راح تُظلَم الْشَّمِس
وَ الْگُمَر ما راح یِضوي؛
النُّجوم راح إتْطیح مِن السَّماء،
وَ نَظم وَ ثِبات السَّماء راح یهتزن.“
30وَ هِنّوب راح تِظهَر عَلامَة ابن الْإنسان بي السَّماء وَ کِل طَوایِف الْعالَم راح یِلُطمون، وَ راح یِشوفون ابن الْإنسان إلْلي بي قُوَّه وَ مَجِد عَظیم ایّي عَلَیٰ غِیم السَّماء. 31وَ راح یِرْسِل مَلائِكتَه بي بوق عَظیم الصُّوت وَ راح یِجَمعن الْمُختارین مِن أربَع أقسام الْعالَم، مِن هَل صُوب السَّماء لِحَد ذاک الصُّوب.
32«هَسّه، مِن شِجرَة التّین إتعَلِّموا هَذا الدَّرِس: مِن فُروعها یِخِرجَن مِن الْنَشِف وَ یِنْطَن وَرَگ، تِفتَهمون إلْلي الْگِیض جِریب. 33بي هِل شِکِل، کِل ما إتْشوفون هِل أشیَاء، تِفتَهمون إلْلي یِیِّت ابن الْإنسان جِریبه، بَل عَلَیٰ الْبَاب. 34بِالْحَق، أگِلکُم، ما راح یِروح هَذا الْجیل، لُمَّن ایصیر کِل هَذا. 35السَّماء وَ الْأرض راح یِنْمَحَن، أمَّن حَچیي ما راح یِنمِحي.
36«وَلا أحَد یُعرُف ذاک الْیُوم وَ ذیچ السَّاعه غِیر الْأب؛ حَتَّیٰ مَلائِكَة السَّماء وَ الْابِن هَم ما یِعُرفون. 37وَکِت ظُهور ابن الْإنسان راح إیکون مِثِل زَمان نَبي نوح. 38بي أیَّام گَبل الْزود، گَبُل لا نوح یِدخَل بي السَّفینه، النَّاس چانُوا یَأکلون وَ یِشُربون وَ یِتزَوِّجون وَ یِتزَوِّجَن 39و ما چانُوا یِدرون شِنهي قادِم. لِحَد ما إیّه الْزود وَ خِذَه الْجَمیع مَعَه. ظُهور ابن الْإنسان هَم راح إیکون بي هِل شِکِل. 40مِن أثنَین زِلِم إلْلي بي الزَّرِع، راح یِنوُخِذ واحَد وَ یِضُل الْآخَر. 41وَ مِن أثنَین نِسوان إلْلي یِطُحنَن حُنطَه سَویَّه، راح تِنوُخِذ وَحده وَ أتضُل الْأُخریٰ. 42چا أسِهروا، لِأن ما تِدْرون رَبّکُم بي أي یُوم راح ایّي. 43أُعُرفوا هَي إلْلي لُو صاحِب الْبِیت چان یُعرُف إلْلي الْحَرامي بي أي ساعَه مِن اللِّیل ایّي، چان سَهَر وَ ما خِلّاه ایبوگ بِیته. 44چا أنتُم هَم کونوا مُستَعَدین، لِأن ابن الْإنسان ایّي بي ساعَه إلْلي ما تِنتَظرونها.
45«چا یاهو ذاک خادِم الْوَافي وَ الْفَهیم إلْلي سِیِّده جاعله چِبیر أهَل بِیته خاطِر یِنْطي أکِلهُم بي وَکته؟ 46خِیعون ذاک الْخادِم إلْلي مِن یِرجَع سِیِّده، یِشوفه مَشغول بي هَي الشُّغله. 47بِالْحَق، أگِلکُم، إلْلي راح یِجِعلَه عَلَیٰ کِل شي إلْلي یِمِلکه. 48أمَّن لُو ذاک الْخادِم، إیکون شَریر وَ یِفَکِّر مَعَ نَفسه إلْلي ”سِیِّدي یِتْأَخَّر بي الْیِیَّه،“ 49وَ یِأَذّي زُمَلائه وَ یِلتِهي بي الْأکِل وَ الشِّرِب مَعَ شاروبین الْخُمُر، 50بي ذاک الْوَکِت، بي یُوم إلْلي ما یِنتَظِره وَ بي ساعَه إلْلي ما یِعلَم بیها، سِیِّده راح ایّي 51وَ یِشِگّه نُصِّین وَ یِجِعله بي مَکانَة الْأهل الرّیَاء، مَکان إلْلي بيه بِچي وَ عَصر الْأضروس.
Currently Selected:
مَتّی 24: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
