یَعقوب 2
2
لا تْحِطون فَرِق
1یا أخوتي، بي عنوان أشخاص إلْلي إمآمنین بي عیسیٰ الْمَسیح، ذاک رَبِّ الْمَجد، لا تْحِطون فَرِق بِین النَّاس. 2لُو واحَد بي مِحبَس ذَهَب وَ هِدِم فاخِر یِدخَل بي مَجلِسکُم وَ یِدخَل فَقیر هَم بي هِدِم وَسِخ، 3وَ أنتُم تِتوَجِّهون لِذاک إلْلي لابِس هِدِم فاخِر وَ إتگِلوا لِه: «إگعِد بي هَذ مَکان الزِّین،» أمَّن إتگولون لِلْفَقیر: «اوگُف أهناک!» لو: «إگعِد یِم ریلِي،» 4هَلْ ما فَرِقتوا بِیناتکُم وَ ما حِکُمتوا بي أفکار شَرّیره؟
5یا أخوتي الْأعزاء، إسِمعوا! مو الْإلَه إختار فُقَراء هَي الدِّنیا خاطِر إیکونون ثَرِیِّن بي الْإیمان وَ یُورِثون الْمَلکوت إلْلي هُوَّ وَعَده لِمُحبّینَه؟ 6أمَّن أنتُم ما إحتَرَمتوا الْفَقیر. هَلْ مو الْغَنیین یِظُلمونکُم وَ یِسِحلونکُم لِلْمَحکَمه؟ 7مو ذاکول إلْلي یِکُفرون بي ذاک أسم الشَّریف إلْلي مَحطوط عَلِیکُم؟
8أمَّن زَین إتْسَوون لو تِعِملون ذیچ شَریعَه الْمُلوکیَه حَسَب الْکِتاب، یَعني «حِب جارَک مِثِل نِفسَک». 9أمَّن لُو إتحُطون فَرِق، ذِنَبتوا وَ الشَّریعَه تِحکُمکُم، مِثِل أشخاص إلْلي کاسرین الْقانون. 10چِن لُو واحَد حِفَظ کِل الشَّریعه أمَّن لُو عِثَر بي وَحده مِنهِن، مُجرِم بي کَسِر کِل الشَّریعه. 11لِأن ذاک إلْلي گال: «لا تِزني،» هَم گایِل لا تِقتِل حَتَّیٰ لُو ما تِزني، أمَّن لُو تِقتِل، کاسِر الشَّریعه.
12چا إحچوا وَ عِملوا مِثِل أشخاص إلْلي یِدرون راح یِنحُکُم عَلِیهُم، عَلَیٰ أساس شَریعَة الْحُرّیَه، 13لِأن الْحُکُم راح إیکون بِلا رَحمَه لِذاک إلْلي ما چان راحِم. أمَّن الرَّحمَه راح إتفوز عَلَیٰ الْحُکُم!
الْإیمان وَ الْأعمال
14یا أخوتي، شِنهي فایِدَه لُو شَخُص یِندِعي بي نِفسه عِندَه إیمان، أمَّن ما چان عِندَه عَمَل؟ هَل هِیچ إیمان یِگدَر یِنَجحَه؟ 15إذا أخو لُو أخِت مِحتازین مَلابِس وَ أکِل 16وَ واحَد مِنکُم یِگِلهُم: «روحوا بي السَّلامه، إدفوا وَ شِبعوا،» أمَّن شِنهي الْفایِدَه، لُو ما یِعمِل شي لِخاطِر حاجات جِسِمهُم؟ 17چا الْإیمان لِوَحده وَ بِدون عَمَل، إیمان مِیِّت.
18هَسّه مُمکِن واحَد ایگول: «أنتَ عِندَک إیمان وَ أنا هَم عِندي الْأعمال!» أمَّن أنتَ راویني إیمانَک بِدون أعمال وَ أنا راح أراویک إیماني مَعَ أعمالي. 19أنتَ عِندَک إیمان إلْلي الْإلَه واحَد. زِین إتسَوّي! حَتَّیٰ أرواح الْشَیطانیّه هَم عِندهِن هِیچ إیمان وَ مِن الْخُوف یِتْراعِشَن!
20یا الْغَبي، إترید تُعرُف إیمان بِدون عَمَل لِیش مالِه ثَمَر؟ 21هَلْ یِدنَه إبراهیم ما إنحِسَب صالِح بي الْأعمال، ذاک وَکِت إلْلي قَدَّم ابنَه إسحاق عَلَیٰ الْمَذبَح؟ 22إتْشوف إلْلي إیمان وَ أعماله چانِن یِعملِن مَعَ بَعَض، وَ إیمانَه کِمَل بي أعماله. 23وَ إتحَقِّقَت ذیچ کِتابه الْمُقَدَّسه إلْلي إتگول: «إبراهیم آمَن بي الْإلَه وَ هَي إنحِسبَت لِه صَالِحیَّه،» وَ هُوَّ إنسَمّیٰ صَدیق الْإلَه. 24چا إتْشوفون إلْلي الْإنسان بي الْأعمال یِنحِسِب صالِح، مو بِس بي الْإیمان.
25وَ هَم مو راحاب الزّانیَه ما إنحِسبِت صالِحَه بي الْأعمال، ذاک وَکِت إلْلي لِفَّت الْمُرسَلین وَ مِشَّتهُم مِن غِیر طَریق؟ 26چا مِثِل ما الْجِسِم بِدون روح مِیِّت، الْإیمان هَم بِدون عَمَل، مِیِّت.
Currently Selected:
یَعقوب 2: ACM
Highlight
Share
Compare
Copy
Want to have your highlights saved across all your devices? Sign up or sign in
©️2024 Korpu Company
