أعمال الرُّسُل 27
27
سَفَر پولُس مِن طَریق الْبَحَر إلَیٰ روم
1وَکت إلْلي قَرِّرُوا مِن طَریق الْبَحَر إنروح لِإیتالیا، سِلِّمُوا پولُس وَ بَعَض مِن الْمَسجونین لِضابِط بي أسِم یولیوس، مِن جِیش الْأمبِراطور. 2چا رُکَبنا مَرکَب إلْلي چان مِن أدرامیتینوس وَ چان ایروح إلَیٰ بَنادِر أیالَة آسیا وَ إتحَرَّکنا. آریستارخوس الْمَقدوني، مِن ناس تَسالونیکي هَم چان مَعَنا.
3باچِرها وُصَلنا لِمَدینَه صِیدون وَ یولیوس لُطَف عَلَیٰ پولُس وَ سِمَح إلْلي ایروح یِم أصدِقائه خاطِر یِهَیئون إحتیاجاته. 4بَعَد مَرّه مِشِینا مِنَّاک لِلْبَحَر أمَّن هَوا إلْلي چان یِضرَبنا مِن گُبَل بي شِکِل چان شَدید إلْلي الْمَرکَب زِلَف مِن الْطَریق. چا إنجُبَرنا إنروح مِن طَریق إلْلي ما چانت ضَربَة هَوا. 5وَکت إلْلي عُبَرنا مِن بَنادِر کیلیکیه وَ پامفیلیه، نِزِلنا بي میرا إلْلي صایره بي لیکیه. 6أهناک ضابِط الرّومي لِگه مَرکَب إلْلي مِن مَدینَة إسکَندَریه چان ایروح لِإیتالیا، وَ رَکَّبنا بيه. 7عِدَّة أیَّام یَواش مِشِینا وَ بي گُوّا وُصَلنا إلَیٰ ساحِل کْنیدوس. لِأن الْهَوا چان یِضرَبنا مِن گُبَل، إنجُبَرنا أنحَرِّک مِن ذیچ قسمَة یَزیرَة کْرت إلْلي ما چان هَوا وَ جِذَفنا لِحَد جِریب مَدینَة سالموني. 8بي گُوّا تَعَدِّینا مَن راگ السَّاحِل وَ وُصَلنا إلَیٰ مَکان بي أسِم ”بَنادِر الطَّیبه“ إلْلي چانَت جِریبه لِمَدینَة لاسائیه.
9مِنَّاک إلْلي زَمان چِثیر چان فایِت وَ حَتَّیٰ چانَن مِتعَدیات أیَّام الصَّیام، سَفَر الْبَحري بي ذاک الْوَکِت چان خَطَر. بي هِل سَبَب، پولُس حَذَّرهُم وَ گال: 10«یا ساده، إگدَر إشوف إلْلي راح إتکون عَندنا سَفره خَطرَه وَ راح ایکون ضَرَر چِثیر مو بِس لِلْمَرکَب وَ حِمله، بَل حَیاتنا هَم راح تِتضَرَّر.» 11أمَّن ضابِط الرّومي چان یِتوَجَّه لِحَچي الْنُخذه وَ صاحِب الْمَرکَب أکثَر مِن حَچي پولُس. 12لِأن ذاک الْبَندَر ما چان إمناسِب لِنْگَضي الشَّتاء، بي هِل سَبَب أکثَرنا صَمَّمنا إلْلي نِستَمَر بي سَفَرنا، عَلَیٰ هَي الْإمِل إلْلي نُوصَل لِبَندَر فینیکس وَ إنگَضّي الشَّتاء أهناک. هِل بَندَر چان بي کْرت صُوب جُنوب الْغَرب وَ هَم شُمال الْغَرب.
عاصِفَة الْبَحَر
13وَکت إلْلي إیّه هَوا خَفیف، ظَنُّوا إلْلي واصلین لِشي إلْلي چانُوا یِردونه چا رِفعَوا الْأنیَر وَ میشَوا بي أمتداد ساحِل کْرت. 14أمَّن ما طُوُّل شي إلْلي صار عِندنا ضَربَة هوا عالیه مِن صُوب الْیَزیرَه، مَعروف بي ضَربَة هَوا شُمال الشَّرق. 15الْمَرکَب إتوَرَّط بي الْعاصِفه وَ ما گِدر یِمشي خَلاف الْهَوا؛ بي هِل سَبَب سِلِّمنا نَفِسنا لِلْهَوا وَ مشینا مَعَه. 16بي حِمایَة یِزرَه ضِغیره بي أسم کُودا تِقِدَمنا وَ بي صُعوبه گِدَرنا إنسَوي الْقارب تَحَت إختیارنا. 17وَکت إلْلي هُمّا یابُوا الْقارب عَلَیٰ عَرشة الْمَرکَب، بي الْأحبال، رِبطَوا إصفاح الْمَرکَب خاطِر لا یِتفِلِش، وَ مِن خوف هَي إلْلي الْمَرکَب لا یِبرُک بي رَملة سیرتیس، ذِبَّوا الْأنیَر. 18یُوم التَّالي، لِأن الْعاصِفه حِیل چانَت تِضرِبنا، إنجِبرَوا یِذبون حِمل الْمَرکَب بي الْبَحَر. 19یُوم الثَّالث، بي إیدهُم ذِبَّوا أثاث الْمَرکَب بي الْبَحَر. 20الْأیَّام چانَن یِتعَدِن وَ إحنَا ما چِنَّا إنشوف لون الشَّمس وَ الْنُجوم وَ الْعاصفه هَم ما چانِت تِهدي، بي شِکِل إلْلي کِلنا، فِقَدنا أمَل النَّجاح.
21بَعَد مُدَّه بِدون أکِل، پولُس وگَف بِینهُم وَ گال: «یا سادَه، أنتُم کون سامعین کلامي وَ ما تِرَکتوا کْرت چان هاگِد ما تِضَرَرتوا. 22هِسّه هَم إترَجاکُم إلْلي لا تِفِقدون شَهامِتکُم، لِأن ما راح یِنصِدِم أي واحَد مِنکُم؛ بِس الْمَرکَب راح ایروح مِن إیدکُم. 23لِأن الْبارحه مَلاک ذاک الْإلَه إلْلي أنا مِنَّه وَ أخِدمه، وگَف جِنبي 24وَ گال: ”پولُس، لا تْخاف. أنتَ کون لِلْمحاکِمه، تِحضَر جِدَّام الْأمبِراطور، وَ شوف، بي یَقین، الْإلَه لِخاطرَک نِجَّح نَفَس کِل الْمُسافرین إلْلي مَعَک.“ 25چا یا زِلِم، قَوَّوا گلوبکُم، لِأن أؤمِن بي الْإلَه إلْلي مِثِل ما گال لي، راح یِصیر. 26أمَّن کون مَرکَبنا یِبرُک بي فِرِد یَزیرَه.»
27بي لِیلَة الْأربَعتَعَش، الْهَوا بي بَحَر آدریاتیک چان یَأخِذنا مِن هِل صُوب لِذاک الْصُوب إلْلي جِریب لِنُص اللَّیل، الْمَلاحین فِکرَوا گاعدین یِتگرِبون الْیِباس. 28چا قاسُوا عُمق الْمَاي وَ عِرفَوا إلْلي أربِعین مِتِر. أشوَي بَعَد، مُرَّه أخریٰ قاسُوا عُمق الْمَاي وَ شافوه ثِلاثین مِتِر. 29وَ چِن چانُوا یِخافون إلْلي یِطِگون بي الْصَخَر، ذِبَّوا أربَع أنایِر مِن خَلف الْمَرکَب، وَ چانُوا یِندِعون إلْلي إبسَعیته ایصیر الصُّبح. 30الْمَلاحین بي قَصد الْشَرده، ذِبَّوا قَوارب النَّجاح بي الْبَحَر، بي هِل عُذر إلْلي یِردون یِذِّبون چِم أنیَر مِن صَدر الْمَرکب بي الْبَحَر. 31پولُس گال لِلْضابط وَ الْجِنود: «لو هِل زِلِم ما یِضِلون بي الْمَرکب، ما تِگِدرون تِنِجحون.» 32چا الْجِنود گُطعَوا أحبال الْحافظات قارب النَّجاح وَ تِرکَوا الْقارب. 33گَبُل لا تِطلَع الشَّمِس، پولُس راد مِن الْجَمیع إلْلي یأکلون شي وَ گال: «الْیُوم أربَعتَعَش یُوم إلْلي چنتُوا مِنتَظرین وَ ما أکلتوا شي، ضَلِّیتوا بِلا أکِل. 34چا أترِجاکُم أکلوا شي، لِأن خاطِر إتضِلون عَدلین مِحتاجینه. شَعره ما تِنگص مِن رَأس أي واحَد مِنکُم.» 35وَکت إلْلي گال هَي، کَض خُبزه وَ جِدَّام الْجَمیع شَکَر الْإلَه وَ ثِلَم الْخُبزه، وَ گام یَأکِل. 36چا الْجَمیع قُوَیٰ گلوبهُم وَ إکلَوا طَعام. 37کِلنا الْچِنَّا بي الْمَرکَب میتن وَ سِته وَ سِبعین شَخُص. 38وَکت إلْلي شِبعَوا، ذِبَّوا باجي الْحُنطه بي الْبَحَر وَ خَف الْمَرکَب.
39وَکت إلْلي صار نَهار، ما عِرفَوا الْیِباس، أمَّن شافُوا خَلیج ضغیر مَعَ ساحِل رَملي. 40گِطِعَوا أحبال الْأنیَر وَ تِیِهوهِن بي الْبَحَر وَ حَلُوا أحبال الْأمثِبتَت الْسِکان هَم. بَعدِین رِفعَوا شَراع صَدر الْمَرکَب وَ میشَوا صُوب الْسَاحِل. 41أمَّن الْمَرکَب صاب بي وَحده مِن صُخور وَ گِعَد بي الْطین، أمَّن وَراء الْمَرکَب بي سَبَب ضَربات الْأمواج أنکَسَر.
42الْجِنود قِصدَوا یِقِتلون الْسُجَناء خاف أحَد بي الْسِباحه یِشرد. 43أمَّن ضابط الْرُومي إلْلي چان ایرید یِنَجّي پولُس، مِنَعهُم وَ آمَر أوَّل أشخاص إلْلي یِگِدرون یِسِبحون، یِذِّبون نَفِسهُم بي الْبَحَر، وَ یِوَصلون نَفِسهُم لِلْیِباس. 44الْباجي هَم کون عَلَیٰ قَطَعات مِن الْمَرکَب یِوَصلون نَفِسهُم لِلْیِباس. بي هِل شِکِل الْجَمیع بي السَّلامه وَصلَوا لِلْیِباس.
Currently Selected:
أعمال الرُّسُل 27: ACM
Highlight
Share
Compare
Copy
Want to have your highlights saved across all your devices? Sign up or sign in
©️2024 Korpu Company
