رِسالَة ثاني إلَیٰ قُرَنتیین 12
12
شوک إلْلي بي جِسِم پولُس
1کون أفتِخِر؛ وَلو ما یِحصُل نَفِع مِن ذاک، أمَّن أنا أستِمِر وَ راح أتکَلَّم مِن الْرُؤیٰ وَ مُکاشفات الرَّب. 2أعرُف شَخُص إلْلي بي الْمَسیح إلْلي أربَعتَعَش سَنه گَبُل إنْخَطَف لِسَماء الْثَالثه، ما أدري بي جِسِم راح لِلْسَماء لو خارِج مِن الْجِسِم، الْإلَه یِدري. 3وَ أدري إلْلي إنْخَطَف إلَیٰ الْفَردوس، بي الْجِسِم لو خارج الْجِسِم، الْإلَه یِدري. 4وَ سِمَع أشیَاء إلْلي ما یِتْسولِفَن، إلْلي ما یِجوز لِلْإنسان یِتْکَلَّم عَنهِن. 5أنا أفتِخِر بي هِیچ شَخُص. أمَّن عَني، ما أفتِخِر غِیر بي ضَعفي. 6حَتَّیٰ لو أرید هَم أفتِخِر، ما أصیر غَبي، لِأن أگول الْحَقیقه. أمَّن أتْراجَع مِن هَذا الْعَمَل خاطِر أحَد لا یِظُن أنا أکثَر مِن شي إلْلي یِشوفه بیِه وَ یِسِمعَه مَنّي.
7چَا خاطِر عَظمَة هِل مُکاشفات لا یِسَوَنّي مُتَکَبِّر، حَطُوا شوکه بي جِسمي، یَعني طارِش الشَّیطان، خاطِر إیْأَذیني وَ یِمنَعني مِن الْتَکَبُّر. 8ثِلِث مَرَّات دَخَلِّت مِن الرَّب إلْلي أتْخَلُص مِنها. 9أمَّن هُوَّ گِلّي: «لُطفي یِکفیک، لِأن کَمال قُدُرتي تِکمِل بي الْضُعُف.» چَا بي فَرح أکثَر أفتِخِر بي ضَعفي خاطِر قُدرَة الْمَسیح تِسکَن عَلِي. 10چَا بي سَبَب الْمَسیح، أنا راضي بي الْضُعُف، الْشَتایِم، الْصُعوبات، الضِّیم وَ الْمَشاکِل وَ الْبَلاوي، لِأن وَکت إلْلي أکون ضَعیف، بي ذاک الْوَکِت أکون قَوّي.
11صِرِت غَبي! أنتُم جُبَرتوني بي هَي. أنتُم کون مِن گَبُل مَادْحینّي. لِأن وَلو أنا مو شي، أصلاً ماني أقَل مِن هِذول ”کُبَار الْرُسُل“. 12نِیشان فِرِد رَسول حَقیقي، ظَهَر بِینکُم مَعَ فِرِد صَبُر کامِل، بي نِیاشین وَ مُعجزات وَ قُوّات. 13لِأن بي شِنهي إتْگَصَر وَیَّاکُم مِن باجي الْکِلیسات، غِیر هَذا إلْلي أنا بي نَفسي ما چِنِت حِمِل عَلَیٰ أچتافکُم؟ سامحوني لِهَي الْغَلطه!
14هَسّه جاهز لِمَرَّه الثَّالثه أیّي لِزیارَتکُم. و ما أکون حِمِل عَلَیٰ أچتافکُم. لِأن ماني وَراء أموالکُم، بِل أریدکُم أنتُم. چِن الْأولاد ماهوم إمْکَفِّلین یِکِدّون عَلَیٰ والِدینهُم، بِل الْوالدین یِکِدّون عَلَیٰ أولادهُم. 15أنا بي فَرَح چِثیر أصرُف عَلَیٰ نُفوسکُم وَ هَم صَرَفِت. لو أنا أکثَر أحَبّکُم، هَل أنتُم کون أقَل إتْحِبّوني؟
16أمَّن حَتَّیٰ لو تِقِبلون إلْلي أنا ما چِنِت حِمِل عَلَیٰ أچتوفکُم، لابُد إتگولون أنا چِنِت فِرِد إمْحَیِّل وَ کون بي شِکِل مَتْنَفَع مِنکُم. 17هَل بي واسِطَة ذاکول إلْلي وَدِّیتهُم عَندکُم إستَغَلِیتکُم؟ 18أنا طُلبَت مِن تیتوس إلْلي ایّي عَندکُم و وُدِّیت أخونا هَم مَعَه. هَل تیتوس إستَغَلکُم؟ هَل إحنَا هَم ما عَمَلنا بي نِفس الرّوح؟ و ما خِطَیْنا نَفس الْخُطوات؟
19هَل لِحَد أهنَا چَنتُم تَتْصَورون إلْلي نِسعي نِدَافِع مِن نَفَسنا جِدَّامکُم؟ بي حُضور الْإلَه چِنَّا نِحچي بي الْمَسیح، وَ یا أعِزَاء کِل شي إلْلي نِعِمله، لِبِنائکُم. 20لِأن أخاف بِلکَة وَکت إلْلي أیّي عَندکُم لا ألگاکُم مِثِل ما أتْمَنَّیٰ، وَ أنتُم لا تِلْگوني مِثِل ما تِتْمَنّون، بِلکَة بَینکُم أکو جَدَل، حَسَد، غَضَب، خُصومه، تُهمه، غِیبَه، تَکَبُّر وَ مِن دون نِظام. 21أخاف وَکت إلْلي أیّي لِزیارَتکُم مَرَّه أخریٰ، الْإلَه یِجعَلني مُتواضَع بي حُضورکُم، چِثیرین إلْلي ذَانْبین بي الْماضي وَ مو تَایْبین مِن الْنَجاسه، وَ الزِّنَاء وَ وَناسِتهُم، أحزِن عَلِیهُم.
Currently Selected:
رِسالَة ثاني إلَیٰ قُرَنتیین 12: ACM
Highlight
Share
Compare
Copy
Want to have your highlights saved across all your devices? Sign up or sign in
©️2024 Korpu Company
