Rôm Nau ngơi nhhơ
Nau ngơi nhhơ
Samƀŭt bơh Pôl njuăl ma phung chroh ta Rôm gay mbơh nau jêh ri ndrăp lor ma nau khâl Phung Ngih Brah Ndu păng ta nây. Y-Pôl tâm nal mra khâl jêh ri mbơh nkoch Nau Mhe Mhan Ueh ta Rôm du mông nar, jêh ri pakơi nây bơh nau khân păng kơl, Y-Pôl mra hăn ta Spanish. Tâm samƀŭt njuăl, Y-Pôl rblang ma nau rnơm Brah Christ jêh ri lĕ nau vay dŏng tâm nau rêh phung chroh. Samƀŭt Rôm prăp nau rblang bêng tŏng lơn ma nau mbơh Nau Mhe Mhan Ueh tă bơh păng.
Pakơi nau mbah jô̆ khâl ma phung chroh ta Phung Ngih Brah Ndu Rôm jêh ri lah đah khân păng pô aơ păng mbơh sơm mro ma khân păng, Y-Pôl ŭch lah bôk samƀŭt njuăl: “Tâm Nau Mhe Mhan Ueh aơ, nau sŏng srăng Brah Ndu dơi tâm mpơl tă bơh nau chroh tât nau chroh, tâm ban geh nau nchih pô aơ: Bunuyh sŏng srăng mra rêh yor nau chroh” (1:17).
Jêh nây, Y-Pôl ƀư nau ntơm bôk mpơl pô aơ lĕ rngôch bunuyh, nđâp ma phung Yuđa ăt tâm ban đŏng ma du huê bu năch ŭch dơi kơp sŏng srăng da dê tanăp măt Brah Ndu, yorlah lĕ rngôch kon bunuyh gŭ da dê tâm dâng nau dơi ktang bơh nau tih. Kon bunuyh dơi kơp sŏng srăng jêng bơh nau chroh tâm Brah Yêsu Krist. Thoi dŏng, Y-Pôl nkoch nau rêh mhe phung chroh tâm nau tâm rnglăp đah brah Yêsu, nâm bu ntĭt play tă bơh nau tâm gop mhe đah Brah Ndu. Bunuyh chroh Kôranh Brah geh du nau rêh đăp mpăn jêh ri bơh Brah Huêng Ueh gay dơi tâm rklaih bơh nau dơi ktang nau tih jêh ri nau khĭt. Tâm lĕ kô̆ 5 tât 8, Y-Pôl ngơi nau ŭch ma Nau Vay brah Ndu jêh ri nau brah Brah Huêng Ueh tâm nau rêh phung chroh. Jêh ta nây, nơm kôranh oh mon rblang ma nau ƀư mâm nau ma lĕ phung Yuđa nđâp ma phung bu năch tâm di da dê đah nau dăp ƀư tâm rklaih Brah Ndu ma kon bunuyh. Păng lah nglĕ dŭt pô aơ nau phung Yuđa dun Brah Yêsu jêng du kô̆ tâm nau brah Ndu ndrăp ƀư gay djôt leo lĕ rngôch kon bunuyh văch ma nau yô̆ ma nau Brah Ndu tâm rklaih tâm Brah Rklaih Yêsu. Y-Pôl mĭn đŏng pô aơ nglĕ dŭt phung Yuđa mâu mra hôm dun Brah Yêsu đŏng ôh. Kô̆ kêng lôch samƀŭt njuăl Y-Pôl nti nkah ma nau rêh bunuyh Brah Krist, lor lơn jêng ăn rêh tâm nau rŏng đah ndrăng nơm, nau rêh đah kôranh chiă uănh, jêh ri nau nuih n'hâm sŏng. Y-Pôl rdŭt kêng lôch samƀŭt njuăl ma nau mbah jô̆ khâl ăp nơm jêh ri tâm rnê Brah Ndu.
KÔ̆ DĂP
Ngơi nhhơ jêh ri ntơm bôk (1:1-17)
Nau ŭch ma nau tâm rklaih ma kon bunuyh (1:18 – 3:20)
Brah Ndu ƀư ma nau tâm rklaih (3:21 – 4:25)
Nau gŭ rêh mhe tâm Brah Krist (5:1 – 8:39)
Tâm nau phung Yuđa ndrăp ƀư ma nau Brah Ndu tâm rklaih (9:1 – 11:36)
Nau gŭ rêh bunuyh Brah Krist (12:1 – 15:13)
Rdŭt kêng lôch jêh ri nau mbah jô̆ khâl (15:14 – 16:27)
Currently Selected:
Rôm Nau ngơi nhhơ: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.