Rôm 16

Y-Pôl Nau ngơi nhhơ H'Phêbê bu ur kơl kan

1Gâp dăn nkoch lor ăn khân may, yuh H'Phêbê jêng oh yuh he, ăt jêng bu ur kơl kan tâm Phung Ngih Brah Ndu ƀon Senkrê. 2Ăn khân may vơt rom păng ma nau khư jêh tâm amoh Kôranh Brah tâm ban vơt rom ma phung kloh ueh, jêh ri sâm kơl păng ăp tơ̆ păng ŭch ma khân may; yorlah păng yơh hŏ tă kơl âk bunuyh, jêh ri nđâp ma gâp tâm ban lĕ.

Nau mbah jô̆ khâl

3Dăn ăn gâp geh nau mbah jô̆ khâl H'Phrisil jêh ri Y-Akilas, phung bunuyh ndrel pah kan đah gâp tâm Brah Yêsu Krist,#Kan 18:2. 4jêng bar hê khân păng sân săk khĭt gay tâm rklaih nau rêh gâp; mâu di knŏng geh gâp tuy nau yô̆ ma bar hê khân păng, ƀiălah lĕ rngôch Phung Ngih Brah Ndu phung bu năch tâm ban lĕ. 5Dăn nau mbah jô̆ khâl đŏng ma Phung Ngih Brah Ndu tâm rƀŭn ta ngih bar hê khân păng. Mbah khâl đah Y-Êpanetus, nơm mĭt jiăng gâp rŏng, jêh ri jêng play bôk yan ma Brah Krist tâm n'gor Asi. 6Mbah khâl đah H'Mari, nơm hŏ kan pah hŏt r'ah yor ma khân may. 7Mbah khâl đah Y-Andrônikus jêh ri Y-Junias#16:7 Ƀaƀă nau rblang ntơm saơm nchih: Jiulia. jêng phung băl#16:7 Geh nau rblang: ƀon ndrel. jêh ri mĭt jiăng gŭ krŭng ndrel ma gâp, ăt jêng bar hê khân păng ntoh lư tâm phung kôranh oh mon jêh ri jêng phung khân păng ma Brah Krist lor gâp. 8Mbah khâl đah Y-Ampliatus, nơm gâp rŏng ngăn tâm Kôranh Brah. 9Mbah khâl đah Y-Urbanos, nơm mĭt jiăng pah kan ndrel ma gâp tâm Brah Krist, jêh ri Y-Stakis, nơm mĭt jiăng gâp rŏng. 10Mbah khâl đah Y-Apêlês, nơm dơi sŏk dơn tâm Brah Krist. Mbah khâl đah phung bunuyh gŭ tâm rnăk vâl Y-Aristôbul. 11Mbah khâl đah Y-Hêrôdion, du huê băl mpôl gâp. Mbah khâl đah phung bunuyh gŭ tâm rnăk vâl Y-Narkisus, jêng phung bunuyh gŭ tâm Kôranh Brah. 12Mbah khâl đah H'Triphena jêh ri H'Triphôsa, jêng bar hê phung yuh hŏ pah kan hŏt r'ah yor ma Kôranh Brah. Mbah khâl đah H'Pêrsit, bunuyh yuh gâp rŏng, hŏ pah kan hŏt rgănh ma Kôranh Brah. 13Mbah khâl đah Y-Ruphus, nơm Kôranh Brah săch jêh, jêh ri mbah jô̆ khâl đah mê̆ păng ăt jêng mê̆ gâp lĕ.#Mark 15:21. 14Mbah khâl đah Y-Asinggrit, Y-Phơlêgôn, Y-Hêrmês, Y-Patrôbas, Y-Hêrmas, jêh ri phung oh nâu gŭ ndrel ma khân păng. 15Mbah khâl đah Y-Philôlôgus jêh ri H'Juli, bar hê oh ruh Y-Nêrê jêh ri oh bu ur păng, Y-Ôlimpas, jêh ri lĕ rngôch phung kloh ueh gŭ ndrel ma khân păng. 16Mbah khâl hom ndrăng khân may ma nau chŭm kloh ueh. Lĕ rngôch Phung Ngih Brah Ndu Brah Krist mbah jô̆ khâl đah khân may.

Nănh njrăng ma nơm ƀư nau tâm nkhah mpôl

17Hơi oh nâu, gâp nkah ma khân may, uănh njrăng hom ma mbu nơm ƀư nau tâm nkhah mpôl jêh ri ƀư chêh prah, tâm rdâng đah ma nau ntĭm nti khân may nti jêh. Der hom khân may ngai đah khân păng. 18Yorlah phung pônây mâu pah kan ma Brah Krist, Kôranh Brah he ôh, ƀiălah pah kan ma ndŭl khân păng nơm; khân păng sŏk nau ngơi ueh, ngơi rnê gay ma ndơm mƀruh lĕ nuih n'hâm phung sŏng. 19Lĕ rngôch bunuyh gĭt jêh ma nuih n'hâm khân may tông bâr; yor ri, gâp răm maak ma khân may, ŭch ma khân may geh nau blau mĭn ma nau ueh jêh ri ăn kloh ma nau mhĭk. 20Brah Ndu nau đăp mpăn mra gơnh jot Satan tâm dâng jâng khân may. Mbơh sơm dăn nau yô̆ bơh Kôranh Brah he jêng Brah Yêsu gŭ ndrel ma khân may!#16:20 Geh ƀaƀă nau rblang ntơm saơm mâu geh trong aơ ta aơ ƀiălah ntop ta lôch trong 24 mâu lah 27.

Nau mbah jô̆ khâl tă bơh phung mĭt jiăng Y-Pôl

21Y-Timôthê, nơm pah kan ndrel ma gâp mbah jô̆ khâl đah khân may; Y-Lusius, Y-Yason jêh ri Y-Sôsipater, jêng phung băl#16:21 Mlr: bunuyh ƀon ndrel. gâp đŏng mbah jô̆ khâl đah khân may.#Kan 16:1. 22Gâp jêng Y-Tertius, nơm nchih samƀŭt aơ, mbah jô̆ khâl đah khân may tâm Kôranh Brah. 23Y-Gaius, nơm vơt rom gâp jêh ri lĕ rngôch Phung Ngih Brah Ndu mbah jô̆ khâl đah khân may.#Kan 19:29; I Kô 1:14; II Ti 4:20. 24Y-Êrastus, kôranh mât uănh jay prăk ƀon toyh, jêh ri Y-Kuartus, nâu he, mbah jô̆ khâl đah khân may tâm ban lĕ.

Nau lah ueh

25Mprơ tâm rnê Nơm geh nau dơi ƀư nâp ktang ma khân may tĭng nâm Nau Mhe Mhan Ueh gâp jêh ri ma nau nti lah ma Brah Yêsu Krist, tĭng nâm nau tâm mpơl ma nau khlay ndâp hŏ pôn ndâp jêh ntơm bơh rbăn kăl e, 26ƀiălah aƀaơ, tĭng nau Brah Ndu ntăm gŭ rêh mro mrăng jêh ri bơh tâm lĕ ndrom samƀŭt nau mbơh lor, nau khlay ndâp dơi mpơl ma lĕ rngôch mpôl băl bunuyh gĭt, gay djôt leo khân păng tât ta nau chroh tâm nau tông bâr, 27jêh ri tâm Brah Yêsu Krist, knŏng êng Brah Ndu jêng Nơm blau mĭn, geh nau chrêk rmah n'ho ro mâu blau lôch! Amen.

Currently Selected:

Rôm 16: CMO2023

Highlight

Copy

Compare