Kan Kôranh Oh Mon 17

Y-Pôl ta ƀon Têsalônik

1Y-Pôl jêh ri Y-Silas hăn rgăn ƀon Amphipôlis jêh ri ƀon Apôlônia, jêh tât ta ƀon Têsalônik, geh du ngih rƀŭn Yuđa. 2Tĭng nâm nau vay, Y-Pôl lăp tâm ngih rƀŭn; tâm pe nar saƀat, păng tâm rlăch đah khân păng, 3sŏk Nau Brah Ndu Ngơi rblang jêh ri gĭt rah vah ma Brah Krist dơn jêh nau rêh ni, jêh ri dâk rêh tay tă bơh nau khĭt. Păng lah: “Brah Yêsu jêng Nơm gâp mbơh nkoch ma khân may aơ, Păng yơh Brah Krist.” 4Ƀaƀă bunuyh tâm khân păng bu jă hăn tĭng Y-Pôl ndrel ma Y-Silas; geh âk phung Grek ơm yơk mbah Brah Ndu, nđâp ma âk phung bu ur tâm phung bu yơk chroh Kôranh Brah đŏng. 5Ƀiălah phung Yuđa tâm rmot, jă âk bunuyh janh ƀai tâm trong sâng, tâm rgum phung âk jêh ri ƀư nau uh ah tâm ƀon. Khân păng n'hoch tât ta ngih Y-Yason, joi nhŭp Y-Pôl jêh ri Y-Silas gay ma njŭn leo tanăp phung ƀon lan. 6Joi mâu dơi saơ ôh, khân păng nhŭp têk Y-Yason jêh ri ƀaƀă phung oh nâu văch tanăp kôranh chiă uănh ƀon nây, phong: “Phung nây hŏ ƀư rŭng răng tâm lĕ neh ntu, aƀaơ aơ khân păng tât aơ, 7jêh ri Y-Yason rom khân păng! Lĕ rngôch khân păng tâm rdâng đah nau vay Sêsar, yorlah khân păng lah geh du huê hađăch êng, jêng Yêsu.” 8Tăng lĕ nau ngơi nây, phung ƀon lan jêh ri phung kôranh chiă uănh tâm ƀon geh nau uh ah. 9Pakơi nây, kôranh chiă uănh đă Y-Yason jêh ri phung êng chê̆ prăk ma chuai tĭng nau vay, jêh nây mƀơk khân păng.

Ta ƀon Bêrê

10Dôl măng nây, phung oh nâu njŭn Y-Pôl ndrel ma Y-Silas hăn ta ƀon Bêrê; tât ta nây, khân păng lăp tâm ngih rƀŭn Yuđa. 11Phung Yuđa ta aơ geh nuih n'hâm ueh lơn ma phung bunuyh ta ƀon Têsalônik; khân păng sŏk dơn nau Brah Ndu ngơi ma lĕ nuih n'hâm,#17:11 Mlr: nau ngơi, mâu lah: Nau Mhe Mhan Ueh. ăp nar ŭch nti Nau Brah Ndu Ngơi gay ma sek uănh nau nti lah di mâu lah mâu. 12Yorlah, âk bunuyh tâm phung khân păng chroh ma Kôranh Brah, geh phung bu ur tâm phung Grek bu yơk jêh ri nđâp ma bu klâu âk đŏng. 13Ƀiălah tơlah phung Yuđa ta ƀon Têsalônik gĭt ma Y-Pôl nti lĕ nau Brah Ndu ngơi ta ƀon Bêrê, khân păng hăn ta nây gay ma rkhŭk jêh ri nsŭk phung ƀon lan. 14Ƀât lât, phung oh nâu njŭn Y-Pôl hăn mpeh ta dak mƀŭt, bi Y-Silas jêh ri Y-Timôthê ăt hôm gŭ ta ƀon Bêrê. 15Phung njŭn Y-Pôl, hăn ndrel ma păng tât ta ƀon Athen; jêh ri sĭt tă bơh ƀon nây mbơh ma Y-Silas jêh ri Y-Timôthê nau Y-Pôl ntăm đă hăn tĭng păng ăn gơnh.

Ta ƀon Athen

16Rnôk nây, Y-Pôl gŭ kâp Y-Silas jêh ri Y-Timôthê ta ƀon Athen, păng ji nuih lah saơ ƀon nây bêng ma rup brah. 17Pônây, păng tâm rlăch nchră đah phung Yuđa jêh ri phung bu năch tĭng nau phung Yuđa chroh tâm ngih rƀŭn, tâm ban đŏng đah phung bunuyh vay mâp ăp nar ta nkual toyh. 18Geh ƀaƀă phung kan tâm nau mĭn tâm bar phung nti Nau Maak #17:18 Nrn: Êpikur, jêng mpôl nau ntĭm nti dŭt blau tĭng Y-Êpikur (Epicurus) bunuyh Grek. jêh ri Nau Dăng#17:18 Nrn: Stôikjêng mpôl nau ntĭm nti dŭt blau tĭng Y-Sênô jêh ri Y-Chrysippus (Sênô jêh ri Chrysippus). tâm nchră đah păng đŏng. Nơm ôp: “Moh nau bunuyh ƀôch ƀôr aơ ŭch lah?” Nơm êng lah: “Tâm ban ma păng mbơh nkoch ma lĕ brah bu năch” — yorlah Y-Pôl mbơh nkoch Nau Mhe Mhan Ueh ma Brah Yêsu jêh ri nau dâk rêh tay. 19Khân păng nhŭp Y-Pôl njŭn leo ta Arêôpa #17:19 Ntŭk tâm rƀŭn mpôl kôranh phat dôih ƀon Athen. jêh ri ôp pô aơ: “Dơi lĕ may ăn hên gĭt moh nau nti mhe may nkoch nây? 20Yorlah lĕ nau may nti, hên iăt êng ngăn. Yor nây, hên ŭch gĭt mâm rblang lĕ nau nây.” 21N'hêl nanê̆ ngăn, lĕ rngôch bunuyh ƀon Athen jêh ri phung bu năch gŭ ta nây prăp mông nar gay ma ngơi jêh ri iăt nau mhe dơm.

22Rnôk nây, Y-Pôl dâk ta nklang Arêôpa, lah pô aơ: “Hơi khân may jêng phung ƀon Athen, gâp saơ lĕ kan, khân may jêng phung bunuyh yơk mbah ma brah âk ngăn. 23Yorlah dôl gâp nsong tâm ƀon khân may, treng uănh lĕ ntŭk khân may prăp yơk mbah, gâp saơ du nơng ƀư brah geh nchih rplay samƀŭt: YƠK MBAH BRAH BU MÂU MÂP GĬT NĂL. Pôri, Nơm khân may yơk mbah, ƀiălah mâu gĭt năl nây, Nơm nây yơh gâp nkoch mbơh ma khân may. 24Brah Ndu jêng Nơm rhăk njêng neh ntu jêh ri lĕ rngôch mpô mpa gŭ rêh tâm nây, jêng Kôranh ma trôk jêh ri neh ntu, Păng mâu gŭ ôh tâm lĕ jây rhŏ brah tă bơh ti bunuyh ƀư.#I Hađăch 8:27; Êsai 42:5; Kan 7:48. 25Păng mâu đŏng ŭch ma ti bunuyh pah kan tâm ban ma Păng ŭch ti bunuyh kơl, yorlah Păng yơh jêng Nơm ăn nau rêh, n'hâm nsôr jêh ri ăp ntil ndơ ma lĕ rngôch bunuyh. 26Ntơm bơh du huê, Păng njêng lĕ rngôch mpôl băl bunuyh jêh ri ƀư ăn khân păng gŭ lam bri neh. Păng tâm nal jêh rnôk jêh ri n'har ma khân păng gŭ, 27gay ma khân păng joi, srôih joi Brah Ndu jêh ri mra dơi mâp Păng, nđâp tơlah Păng mâu gŭ ngai đah ăp nơm he. 28Yorlah gŭ tâm Păng yơh, he geh nau rêh, nau blau mpât jêh ri nau jêng bunuyh, tâm ban ƀaƀă bunuyh blau mprĭng khân may lah pô aơ: ‘He luh tă bơh ndŭl mpôl Păng yơh.’ 29Pônây, jêng ndŭl mpôl Brah Ndu, he lơi mĭn Nơm Brah jêng tâm ban ma rup brah ma mah, prăk, mâu lah lŭ bơh nau blau jan jêh ri nau blau mĭn bơh kon bunuyh ƀư. 30Pôri, Brah Ndu hŏ sŏk lơi lĕ tâm rnôk rluk mâl nây, ƀiălah aƀaơ aơ, Păng ntrŭnh ma lĕ rngôch bunuyh gŭ ăp ntŭk tâm rmal nau tih khân păng. 31Yorlah Păng tâm nal jêh du nar, Păng mra phat dôih neh ntu ma nau sŏng srăng bơh Bunuyh Păng hŏ rdâk jêh. Jêh ri gay ma nau mbơh ăn nanê̆ ma lĕ rngôch bunuyh saơ, Păng hŏ ƀư ma Bunuyh dâk rêh tay jêh bơh nau khĭt.” 32Tơlah khân păng tăng Y-Pôl ngơi ma nau dâk rêh tay bơh nau khĭt, ƀaƀă bunuyh gơm mưch, ƀiălah ƀaƀă bunuyh êng lah: “Hên mra ŭch iăt may nkoch bri nau aơ du tơ̆ đŏng.” 33Pôri, Y-Pôl du luh tă bơh khân păng. 34Ƀiălah geh ƀaƀă bunuyh tĭng ndô̆ păng jêh ri chroh ma Kôranh Brah, tâm phung nây geh Y-Dênis jêng du huê kôranh phat dôih Arêôpa, jêh ri du huê bu ur, amoh păng H'Damaris, ndrel ma phung êng đŏng.

Currently Selected:

Kan Kôranh Oh Mon 17: CMO2023

Highlight

Compare

Copy