Alawi 22
22
Matambiku gaka Sapanga
1Ndienu Bambu Sapanga ampwagila Musa, 2“Gumpwagila Aloni na bana baki akagolu biihengila isima hindu yeyuye Aizalaeli ambiiki nepani Bambu Sapanga ili balisapu liina langu la sapi. Nepani ndi Bambu Sapanga. 3Kabee waapwagila ana, ‘Ana jumu kati ji ibeleku yi yoti jaihegaliya hindu yaka Sapanga yeyuye Aizalaeli aibei palongi jangu nepani Bambu Sapanga, anajwibia ngasejujetakeka kunumbali, mundu hoju mwantenga kutali na nepani. Nepani ndi Bambu Sapanga.’”
4“Mundu jokapi mukibeleku saka Aloni anajubii nu ugonzu wa ngosi au kumpita uwila, jwiikula hindu ya sapi mbaka pajwibia jujetakiki kunumbali nepani Bambu Sapanga. Mundu jokapi anaangusiki mundu jwanga kujetakeka kunndumbali Bambu Sapanga sukugusa ntuhi waka mundu au jojupitiki ni imbeju zake, 5au anajugusiki kiumbi sokapi sekikwamba sesungenga mundu kuba jwanga kujetakeka au mundu jojuwesa kunhenga jukuba jwanga kujetakeka kunumbali nepani Bambu Sapanga kwa sindu sokapi sela, 6mundu hoju jwikuba jwanga kujetakeka kwaka Bambu Sapanga mbaka pakamii ngajupaliki kula posu ja sapi mbaka pajwibia juhogiki. 7Lyoba palijingala ndi pajwibia jujetakeki kunndumbali Bambu Sapanga, mwenikatai juwesa kula posu ya sapi ndaba heji ndi posu jaki. 8Nngolu waka Sapanga jwiikula inyama jokapi jikinyama sekiwii kazika seni au kukomeka ni kinyama sumwikioli, sanhenga jwijetakeka palongi jaka Bambu Sapanga. Nepani ndi Bambu Sapanga. 9Ndienu, kupalika akaagolu baka Sapanga kupwata malagalaki gangu ili biihenga mahakau nakuwa ndaba jukusindwa kujetakwa na nepani Bambu Sapanga ndi nenaanhenga abiya bandu bangu.
10“Mundu jokapi jwanga kuhuma lukolu wa agolu baka Sapanga ngakwiipaliki kula posu ja sapi hata nngeni juku nngolu waka Sapanga au jojuhenga lihengu joakemiki kuntumaki nngolu waka Sapanga ngakwiipaliki kula. 11Lakini ana ngolu andombiki ntumwa jubiya jwaki, ndienu, ntumwa hoju juwesa kula posu heji na kabee bandu baasaliwi nnyumba jaki. 12Ana kamwali jwaka nngolu waka Sapanga jutoguliki pandu na mundu jwanga nngolu waka Sapanga, hata kunndeka kula posu ja hindu yu matambiku ga sapi. 13Ana kamwali juku nngolu waka Sapanga juweliwi nu ndomi waki au atei kuntalika na ngase jubi na mwana, najwombi jubujiki kunyumba ja atati baki nu kutama naku ngati ejabi kamwali, enu, juwesa kula posu ja atati baki. Hata hela ngeni ngasejupalika kula posu heyi.
14“Ana mundu jongi jukuliki posu ja sapi sanga kumanya, ndienu, jwiilepa pandu pa asilimia ishilini ja posu jejukuliki nu kunkelubuki nngolu waka Sapanga. 15Nngolu waka Sapanga jwaihenga posu yeapia hiikuba yanga kujetakeka palongi jaka Sapanga jejuje Aizilaeli ampiiki Bambu Sapanga, 16sakwaaleke bandu bangi kula posu heji nakwahenga abia na makosa gakwaalaja alepa. Nepani Bambu Sapanga ndi neniibeka posu ibiya ya sapi.”
17Ndienu, Bambu Sapanga ampwagila Musa, 18“Gumpwagila Aloni na bana baki baabi aka agolu baka Sapanga na Aizalaeli boti ana, ‘Ana mundu jokapi pikilanda jinu au ngeni jokapi jojutama na Aizilaeli, ana jupiiki litambiku laki, jikubi jukutimisa nazili au litambiku lukupala mweni kumpiki Bambu Sapanga sukutinii, 19ndi kwiipalika jupiya ng'ombi likambaku au lipongu likondoo yanga ni kilema sokapi ili juwesa kujetakewa. 20Nhilu kupia kinyama sekibii ni kilema sokapi ndaba Bambu Sapanga ngajwiijetake litambiku heli, 21Mundu jokapi pajumbiki nepani Bambu Sapanga litambiku lulukwali ili kutimisa sejulagi au litambiku lukupala mweni kuhuma mu likundi laki li mipugu, ili jujetakiwa ndi kupalika kinyama hesi kibia sanga ni kilema sokapi. 22Wiimbiki nepani Bambu Sapanga kinyama sokapi sangakulinga au kilema au sekitunwiki kugolu au ilonda yeipita uwila, akotuka kuipia kuba litambiku lukutinii pa mwotu pandu pukupikii litambiku paka Bambu Sapanga. 23Likambaku au likondoo lelibii ni kiungu simu kilasu au kijipi kupeta ekupalika guwesa kumpia litambiku kukupala wamwete, lakini heli nkotuka kulipia kuba litambiku lukutimisa nazili. 24Nkotuka kumbiki kinyama sesuse heu jaki atei kuboto au kukitunu au atei kukiseku, mwiilenga hata pasikipi kumbiki nepani Bambu Sapanga, wiihenga sindu sa namuna aje mu nndema waku. 25Kabee, kotuka kujopa kuhuma kwa ageni inyama ya namuna heji nukumbiki nepani Sapanga waku ngati posu. Inyama heyi ibii ni kilema kwa ndaba atei kwiiboto nepani nganaijetake.’”
26Ndienu, Bambu Sapanga ampwagila Musa, 27“Litoli la ng'ombi au lipongu li likondoo au li imbui lipongu lelibeliki kupalika liitama na nyongo waki kwa masoba saba. Lakini mu lisoba la nani nhuwesa kupiya kwaka Bambu Sapanga ngati litambiku lukutinii pa mwotu. 28Lakini wiisinza ng'ombi au likondoo lisoba limu pamu na katoli kaki kwandaba jukumpiiki bambu Sapanga litambiku. 29Egwimbikia nepani Bambu Sapanga kinyama silitambiku lu kunnzengu wiipia ngati ekupalika ili nagujetakaliya. 30Inyama jikinyama hesi ndi kwiipalika kula lisoba lele lukupia, mwiihigaki mbaka kilabu jaki pulukela. Nepani ndi Bambu Sapanga.
31“Ndienu mwagapwata nu kunhenga malagalaki gango. Nepani ndi Bambu Sapanga. 32Mwahenga bandu alitondula liina langu la sapi, ndaba kupalika bandu boti Aizilaeli anhengila isima. Nepani Bambu Sapanga nenunhagwii mmbia mwabandu bangu. 33Nepani Sapanga wino ndi nenumpia ku nndema uku Misili. Nepani ndi Bambu Sapanga.”
Currently Selected:
Alawi 22: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
