Alawi 21
21
Malagalaki kwa agolu baka Sapanga
1Bambu Sapanga ampwagila Musa, “Waapwagila, agolu baka Sapanga babube ndi bana baka Aloni kubanga kwiikuba na mundu jokapi nkati jinu jojwalihenga kuba jwanga kujetakeka kunumbali nepani Bambu Sapanga sukugusa mitui ja alongu babu baawii, 2ila pee ntui hogu uku nndongu waki wapambipi au amabaki au atati baki au mwana waki au kamwali waki au mmbeli waki. 3Ahelahe ndombu waki joanhobale jwanga kutoguleka na mwanalomi nu jutama kunyumba jaki kwa ndaba ja haba juwesa kugusa mitui nakuba jwanga kujetakeka kunndumbali Bambu Sapanga. 4Jiilenga hata kasokopi kuba jwanga kujetakeka kunndumbali Bambu Sapanga wamweti kupete bandu bagumanyini naku kupete kujukuana nukulihenga gubia wangakujetakeka kwaka Bambu Sapanga. 5Kibeleku saka Aloni siilenga hata kasokopi kumoga lupanza wala biimoga mulutengu ji indeu yabu au kulilembe nhyega jabu ili abonikana alelanika kunndele mundu jojukuwiki. 6Kwiipalika abiya sapi kwangu nepani Bambu Sapanga wabu wala balitondoo liina langu nepani Bambu Sapanga wabu. Kwa ndaba bombi ndi baapiki matambiku gukutinii pa mwotu kuba posu jaka Bambu Sapanga wabu, ndi kwiipalika abiya bandu ba sapi. 7Kwa ndaba ngolu ambei palongi jaka Bambu Sapanga, jwiilenga hata kasokopi kunnzuku mmbomba nselati, jiihenga hela ndaba nepani Bambu Sapanga nu nsapi. 8Bandu bummbona mwanganya mwa bandu baka Sapanga kwa ndaba ambekiki palongi jaka Sapanga. Bombi ndi baambeke nepani posu, nepani Bambu Sapanga ndi na sapi, nepani numbei mbanganya kuba mwa sapi. 9Ana kamwali juku ngolu jokapi ana juhengiki uselati nakuba jwanga kujetakeka, ndienu mwantinia kwa mwotu ndaba jwaapoa lihamu atati baki.”
10Nngolu nkolongu jokapi ndaba jombi ndi nkolongu kupeta jokapi na anzakani mahuta mu kimutu saki nu kumbeka palongi jaka Bambu Sapanga ili juwata ingobu yi kigolu, jwagaleka majunzu gaki sanga kugayekale wala jwiijendu ingobu jaki kwa ndaba jukulelaneka. 11Kotuka kuguhegale ntui wokapi gola hata ngati ukubi wa atatibaku au amabu baku ili wiikuba wanga kujetakeka kunndumbali Bambu Sapanga. 12Ndaba anhagwi jundumakiya nepani Bambu Sapanga sukunzakanii mahuta mu kimutu, ndienu jukotuka kuboka pandu papajetakiki paka Sapanga wala jwapahenga pandu hapa kuba pangakujetakeka. Nepani ndi Bambu Sapanga, Sapanga wino. 13Nngolu nkolongu annzukua pee kamwali jwanga kummanya mwanalomi sukugone naku. 14Nngolu ngasekupalika hata kulenga kunzukuu mmbomba jojuweli nu ndomi waki, mmbomba joamanyi mwanalomi sukugone naku wala nselati. Ndienu kwiipalika jwiitola kamwali jwanga kumanya mwanalomi sukugone naku kuhuma mu lukolu lwaki mweni, 15jwaahenga bana mundu kuba banga kujetakeka kunndumbali Bambu Sapanga mweni. Nepani ndi Bambu Sapanga nenunhenga jubiya jwa sapi.
16Ndienu, Bambu Sapanga ampwagila Musa, 17“Gumpwagila Aloni ana, ‘Mundu jokapi jojubii mwi ibeleku yaku yoti yeihika jojibia ni kilema nhyega, ngakwiipaliki kuhegale nukumbiki posu, nepani Bambu Sapanga litambiku li libumunda. 18Mundu jokapi jojubii ni kilema sokapi jwiihegale kumbiki matambiku, jukubi joju sindwa kulinga jojubii ni kilema au jojuhalabiki pamihu jaki au jojubii kiungu kilasu kupeta hekupalika, 19au jubii nu kugolu au jojubii nu kuboku gogulemii, 20jojutupiki pungongu au nzipi kupeta ekupalika au jojubii na mihu mabohu au jojubii au ugonzu wa ngosi au jojubii ni liputi au joammbotwii, hoju jiinhegale nukumbiki nepani Bambu Sapanga. 21Mwana jokapi juku nngolu Aloni jojubii ni kilema jwiihegale nu kumbiiki matambiku gukutini pa mwotu, kwa ndaba jubii ni kilema, ndienu jwinhegale kumbiiki nepani Bambu Sapanga litambiku la posu. 22Mundu hoju juwesa kula posu jeambiki nepani Bambu Sapanga waki, hindu ya sapi na ya sapi ngani. 23Ndaba jubii ni kilema ndienu jalihegale lipazia wala mesa jukupiki litambiku ndaba jubii ni kilema, jwapahenga kuba panga kujetakeka palongi jaka Bambu Sapanga pandu pa sapi, kwa ndaba nepani Bambu Sapanga ndi nenunhenga mwanganya mmbia mwabandu bango.’”
24Musa ampwagila Aloni na bana baki na Aizilaeli boti majambu haga goti.
Currently Selected:
Alawi 21: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
