Joshua 18
18
Nnndema goguhigali nawombi atenda kubagana
1Aizalaeli boti akusinyika pandu pamu ku Shilo ebabiya buguwesiki nndema gola bajemika lihema lu kuketangane. 2Lakini gahigali makabila saba ga Aizilaeli gaguge ngase bagabaguli nndema.
3Ndienu Joshua jwaapwagila Aizalaeli, “Boo mwilendalia mbaka lile ili kujingi kutama mu nndema goampeki Bambu Sapanga, Sapanga wa akahoku bino? 4Mwaahagula bandu atatu kuhuma kwa kila likabila naatuma pundema woti ili bukugulinga nu kuandika kulengana na makabila gabu na anetila majambu gaki. 5Nabombi bagubaganisa nndema hogu pandu saba. Likabila laka Yuda lihigalia na pandu paki pu upandi uku kusini na makabila gaka Josepu lihigalia na pandu paki pu upandi wa kazikazini. 6Nanamu emwijomuliya kuandika majambu kupete pandu saba hapa nu kunetela. Hapa ndi nipega gudugudu palongi jaka Bambu Sapanga, Sapanga witu, kupete pandu pa kila likabila lino. 7Ila likabila laka Alawi ngalipati pandu pokapi kati jino, ndaba bombi baapeki lihengu lukumpiki matambiku Bambu Sapanga. Likabila la Gadi na Lubeni na nusu jilikabila laka Manase babiya apatiki pandu pabu upandi golipita lyoba wa losi lwa Yoludani. Bapata nndema hogu kupete Musa ntumisi waka Bambu Sapanga.”
8Enu, bandu haba batumbuliya sapwali jukujenda kugusungusa nndema. Kabee Joshua jwalagalakia ana, “Nzendania mu nndema woti na mkaandika majambu ga sakaka kupete nndema hogu gubii boo, na mwikelubuka kuhika kumbwagi, na nepani niipega gudugudu palongi jaka Bambu Sapanga.” 9Akanalomi haba bayongulata nndema hogu woti, baandika majambu gagatosanii pa maeneu saba pamu na misi jaki, nu kukelabu majibu kwaka Joshua ku likambi lu ku Shilu. 10Ndenu, Joshua jwahagula sukupega gudugudu ku Shilu palongi jaka Bambu Sapanga, na kwaabaguli Aizalaeli, kila likabila na nndema waki.
Nndema gu likabila laka Benjamini
11Likabila lu utumbuli kupata nndema sukupega gudugudu labiya laka Benjamini kulengana nu lukolu lwabu. Nndema gobaapekiya bandu haba wabiya pikilanda ji likabila laka Yuda ni makabila gaka Josepu. 12Mpaka waki gu upandi wa kasikazini watumbulia losi lwa Yoludani nu kupete upandi uku kasikazini mwa musi wa Yeliku nu nndema wii itombi kulongo upandi wa golijingi lyoba mbaka ku lungwenza lwa Beti Aveni. 13Kuhuma hoku mpaka waki walongua upandi u kusini kujenda Kuluzu kupete Beteli nukuhele mbaka ku Ataloti Adali, ku kitombi sekibi upandi u kusini ja Beti Holoni juku mosu. 14Mpaka gogubi upandi golijingi lyoba wi kitombi hesi sesabi kusini ja Beti Holoni, mpaka wang'anambuka kujenda upandi u kusini mbaka ku Kiliati Baali, kabee musi wi likabila laka Yuda gobugukema Kiliati Yealimu. 15Upandi ukusini mpaka waki watumbulia mmusi wa Kiliatimu Yealimu nu kujenda mbaka ku kiliba sa masi ku Nefutoa. 16Ndienu, wahulukiya kumosu wapeta pulutengu ji kitombi sesabi pambipi ni ligomba laka mwana Hinomu, lelule labi pandu pu upandi wa kazikazini mwi ligomba la Alepai. Kabee mpaka gwaelala kumosu ku ligomba luku Hinomu, upande wa kusini ukutombi sa Ayebusi, waendalia kuhele mbaka ku Eni Logeli. 17Mpaka gwahuluka kujenda upandi uku kasikazini ja Eni Shemasi, wapetila Geliloti gowabiya gulingalani ni indela ja Adumini nu kuhele mbaka ku lilibu la Bohani mwana mwanalomi waka Lubeni. 18Mpaka waendaliya mbaka ku itombi yuku kazikazini yeibii ku Alaba na wahelala mbaka ku ligomba la losi Yoludani. 19Kabee waendalia upandi uku kazikazini wi kitombi sa Beti Hogula nu kulindaki ku kazikazini ju nhanga nkolongu wa Mwinyu, pandu palujingali losi lwa Yoludani. Gongoo ndi mpaka waki upandi u kusini. 20Losi lwa Yoludani ndi lwabiya mpaka waki upandi golipita lyoba. Mipaka heji jabia mu nndema gobaapekiya lukolu lu likabila laka Benyamini.
21Misi ju lukolu ju likabila laka Benyamini ndi jenze, musi uku Yeliku na Beti Hogula na Emeki Kesisi, 22musi uku Beti Alaba na Zemalaimu na Beteli, 23musi uku Avimu na Pala na Ofula, 24musi uku Kefali Amoni na Ofini na Geba. Misi jebaapekia jabiya ndi komi ni mibeli pamu ni ijiji yaki. 25Misi jengi ndi Gibeoni na Lama na Beeloti 26musi uku Misipa na Kefila na Moza, 27musi uku Lekemu na Ilipeeli na Talala, 28Zela na Ha Elefu na musi gwa Ayebusi gobugukema kabee Yelusalemu na Gibea na Kiliati. Misi jebaapekiya jabiya komi nu nsesi pamu ni ijiji yaki. Hogundi wabiya ulisi gobaapekiya likabila laka Benyamini kulengana nu lukolu lwabu.
Currently Selected:
Joshua 18: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
