Joshua 17
17
Nndema waka Manase upandi golijinga lyoba
1Bandu bi likabila laka Manase jojabii nsaliwa ju utumbuli jwaka Josepu, nabombi kabee bapata nndema wabu sukupega gudugudu. Nsaliwa ju utumbuli jwaka Manase ndi jwabia ankema Makili, na atati baka Gileadi, babiya baapeki su kupega kula misi ja Gileadi na musi uku Bashani, ndaba jamanyiki kukomana ngondu nakanopi. 2Bandu bangi bi likabila laka Manase baapekia nndema wabu su kupega kula kulengana nu lukolu lwabu. Lukolu holu lwabiya londo, lukolu lwa Abizaeli na Heleki na Asilieli na Shekemu na Hepeli na Shemida babube boti baabia asaliwa akanalomi baka Manase mwana waka Josepu.
3Lakini Selopehadi mwana juka Hefeli na mwana waka Gileadi na mwana waka Makili na mwana waka Manase ngasebabii na bana akanalomi, ila jabii bana akambomba pena, na ganga ndi mahina ga bana behaba, Mahila na Noa na Hogala na Milika na Tiliza. 4Akakamwali haba bajenda kwaka nngolu Eleazali na Joshua mwana waka Nuni, na aka kilongosi bangi bapwaaga, “Bambu Sapanga anndagalakia Musa jutubagulia nndema ngati emwabaguliya akanalomi bi likabila litu.” Enu kulengana na malagalaki gaka Bambu Sapanga, Joshua jwaapekia nndema wabu ngati ebaapekia akanalomi bi likabila labu. 5Ndipala, likabila laka Manase bilijonzukia kabee nndema mala pabeli nndema wa Gileadi na Bashani gowabii upandi gongi wa losi lwa Yoludani, 6ndaba aka kamwali baka Silofeadi kuhuma mu likabila laka Manase babagulia nndema wabu ngati ebabagulia akanalomi bi likabila labu. Ndema wa Agileadi baapekia likabila lengi leliigali laka Manase.
7Nndema u likabila laka Manase la tumbulia ku Asheli nu kujenda mbaka ku Mikimetati upandi golipita lyoba luku Shekemu, kabee mpaka wabu waendalia kusini mbaka musi wa Eni Tapua. 8Nndema gwa Tapua wabiya mali gaka Manase lakini musi gwa Tapua, goguwe wabi mu mpaka wabiya mali gi likabila la Epulaimu. 9Mpaka hogu waendalia mbaka ku nkolule uku Kana. Misi jejabi upandi u kusini ja Kana jabiya ja Aepulaimu jejuje jabi mu nndema u likabila laka Manase. Kabee mpaka wapeta upandi wa kazikazini ju nkolule uku Kana nu kulindaki mu nhanga uku Meditelenia. 10Nndema uku kusini mu nkolule u likabila la Epulaimu nu nndema uku upandi uku kasikazini labiya likabila laka Manase, mpaka waki wabiya mu nhanga wa Meditelenia upandi wa golijingi lyoba. Likabila laka Asheli labiya upandi uku kazikazini nu upandu golijingi lyoba ju nndema la Manase nu upandi wa Kazikazini golipiti lyoba labiya likabila laka Isakali. 11Ahelahe mu nndema u likabila laka Isakali ni likabila laka Asheli, likabila laka Manase lapata misi ja Beti Sheani na Ebulamu pamu ni ijiji yaki, na misi ja Doli na Enidoli na Taanaki na Megido pamu na bandu bi ijiji yaki. 12Lakini bandu baka Manase ngase bawesiki kwaabenga bandu ba misi heji, ndienu Akaanani aendalia kutama homu, 13Aizalaeli ngasebabii nu makili ngase bawesa kwaabenga Akanani ila pe baahengisa lihengu sanga kupala.
Bana baka Josepu baajonzuke nndema
14Ndienu, bandu bu lukolu lwaka Josepu bumpwagila Joshua, “Ndaba jaki gutubaguli nndema gumu pena, ndaba Bambu Sapanga jutupengali twepani na jutuhengiki tubia twabingi ngane?” 15Joshua jwajibua, “Ana mmbii mwabingi ngani hata nndema wi itombi ya Epulaimu ngaguntosi kabete, enu nzendania ku kiholi mu nndema wa Apelizi na Alepai, mwakakesa kiholi hesi nu kulihenga lieneu li lukutama hoku.” 16Bandu bi likabila laka Josepu bajibua, “Sakaka nndema wi itombi gongo ngawatutose, Akanani boti baatama mu ubamba abi na magali gaalenganaki na somasoma, kabee bandu boti baatama ku Beti Shani pamu ni ijiji yaki, na batama kwi ligomba la Yezelieli.”
17Enu, Joshua jaapwagila bandu bi kibeleku saka Josepu bi likabila laka Epulaimu na Manase, “Ena, mwanganya mbii mwabingi nu mmbii nu uwesu nkolongu ngasekupalika mbiya nu nndema gumu pena, 18lakini kabee nndema wi itombi wibiya gwinu. Hata ngati sajenu gubi kiholi, mwikesa nukutama homu nu nndema hogu wibiya winu mbaka upandi gongi. Mwaabenga Akaanani, hata koni abi na magali gaalenganaki na somasoma na abii na makili.”
Currently Selected:
Joshua 17: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
