Uamusi 3
3
Bandu ba makabila babaigali mu nndema uku Kaanani
1Bamba ndi bandu bajwaaleka Bambu Sapanga ili kwaapema Aizilaeli boti bababia ngaseawaiki kukomana ngondu jokapi mu nndema uku Akaanani, 2jwahenga hela ili pe kwiibola ibeleku ya Aizilaeli kukomana ngondu yeyabia ngaseawaiki kukomana pa mwandi. 3Jaaleka Afilisti bababii pai jaka akabambu akolongu nhwanu na Akaanani boti na Asidoni na Ahivi baatama mu itombi yuku Lebanoni kutumbuli kitombi sa Baali Helimoni mbaka Lebo Hamoti. 4Baaleka bandu ba nndema heji ili kwaapema Aizilaeli ana biijetakia miilu jaka Bambu Sapanga yejwabia jwaapeki akahoku babu kupete Musa. 5Aizilaeli batama pamu na Akaanani na Ahiti na Aamoli na Apelizi na Ahivi na Ayebusi. 6Baajukua akakamwali babu kuba akahanu babu, nabombi baaboa akakamwali babu abia akahanu babu bandu bi milema jela na kabee nukuitumaki isapanga yabu.
Otenieli
7Aizilaeli bahenga majambu mabaja palongi jaka Bambu Sapanga, bunzegwa Bambu Sapanga, Sapanga wabu nukuitumaki imong'umong'u Baali na Maashela. 8Ndienu Bambu Sapanga jayomi ngamaa Aizilaeli, najombi anhenga bambu nkolongu Kushani Lishataimu juku Mesopotania jaalapula, nabombi batenda kuntumaki kwa yaka nani. 9Ndienu Aizilaeli pabunndelila Bambu Sapanga, Sapanga jwaahagulia mundu jwakaakombula, Otinieli mwana waka Kenazi nnuna waka Kalebu jojuwe ndi jojwaakombula. 10Ndienu, Loho waka Bambu Sapanga juhikila Otinieli ndi jwabia nhamusi jwa Aizilaeli. Ndienu jwajenda ku ngondu kukomana na Kushani Lishataimu bambu nkolongu juku Mesopotania, Bambu Sapanga anzangatiya kunhwesa. 11Ndienu bandu bupundema babiya nu lukwali kwa yaka alubaini mbaka Otinieli mwana waka Kenazi pajwakuwa.
Ehudi
12Aizilaeli bakotuka kabee kunzetake Bambu Sapanga su kuhenga mahakau, Ndienu Bambu Sapanga anhenga Eguloni bambu nkolongu juku Mohabu ili jaawesa Aizilaeli. 13Eguloni jwaakema pamu Ahamoni na Ahamaleki ajongana najombi, jwahika kukomana na Aizilaeli nabombi bugujukua musi wi mitendi, liina lengi la musi we hogu akemika Yeliku. 14Aizilaeli buntumakiya bambu nkolongu Eguloni juku Moabu kwa yaka komi na nani.
15Ndienu, Aizilaeli bunndelila kabee Bambu Sapanga, najombi jwaahagulia nkombosi, Ehudi mundu jojutumi kuboku kwa mangega, mwana waka Gela, mundu ju likabila la Benyamini. Aizilaeli buntuma Ehudi jupelika nhupi yabu kwaka Eguloni bambu nkolongu juku Moabu. 16Henu Ehudi julilenganaki mpamba nkolongu gogutema koni na koni, ulasu waki wabia sendimita hamsini, jugukonga upanga we hogu nkati ji ingobu yaki mu nhungu waki guupandi uku malele. 17Ankabisa nhupi Eguloni bambu nkolongu juku Moabu jojuwe jwabia nneni ngamaa. 18Ehudi ejabiya jukabisi nhupi yela, jaapwagila bandu bababia atotwi nhupi yela jwaapwagila abokaninya. 19Lakini jombi jalongana na bombi mbaka pi imong'umong'u ya malibu yebabia abasiki pambipi na Giligali, ankelabukia Eguloni nukupwaga, “Bambu nkolongo mii na malobi gaku ga sili.” Najombi bambu nkolongu jaapwagila atumisi baki “Ntuleka kajika jitu.” Nabombi baaleka nukubokane. 20Ndi Ehudi anhegalia pajwabia jutemi kajika jaki mu sumba sukunani sa nyumba jaki ju ubambu sekijingisa nhwai sejutumii palumu nukupwaga, “Mii na malobi gaku kuhuma kwaka Sapanga.” Bambu hejwabia jujumuka pikiteu saki, 21Ehudi jwanyosha kuboku kwaki kwa mangega nukuguholomoo upanga gojwabia juukongiki mu nhungu waki uku malele nukuntonga mu lutumbu lwaka bambu nkolongu Eguloni kwa makili. 22Mbaka mpini wajingala mu lutumbu pamu nu upanga wene, nu mpamba nkolongu we wapitila mu nngongu waki. Ehudi ngasejwahopwi upanga wehogo, 23Ehudi jwapita kunza pabalasa nukunzigali milyangu ya sumba sukunani kwa punguu. 24Ehudi ejabiya juboi, atumisi bahika nukuketane milyangu ya sumba sukunani ajigi kwa punguu. Bapwaga, “Pengi kwaa jupiti kukelo mu sumba saki sukunani.” 25Balendalia ngamaa mbaka batumbuliya kuhola, ndaba jwabia ngasejuhogo bajukua pungu nukuhogo. Ndi bumbona bambu nkolongu wabu jugoni pai koni juwii.
26Pababia bakona aendale kulendale, Ehudi jwatenda kutila nukujenda mbaka kwi imong'umong'u ya malibu nu kutili ku Seila. 27Pajwahika kola jwajemba imbata mu nndema yiitombi yuku Efulaimu, nabombi Aizilaeli bahuluka pamu najombi kuhuma mu itombi koni jombi jutenda kwaalongule. 28Jwaalagalakia, “Mmbwata nepani ndaba Bambu Sapanga junzangati kwaawesa Amoabu abaja binu.” Henu bahelala nukumpwata mbaka pandu pukulomboka puku Yoludani nu kwaanyaga Amohabu, nukupengale mundu jokapi jwiipeta. 29Muda wehogu baakoma Amohabu akanalomi elupu komi babube boti babia baabii na makili na banga kujogopa nga hata jumu jojabiya jutiliki. 30Lisoba leheli Aizilaeli baawesa Amoabu nu nndema wabia nu lukwali kwa yaka semanini.
Shamugali
31Baada jaka Ehudi jwahika Shamugali mwana waka Anati, jwaalapula Afilisiti mia sita kwa ndonga jejionguliwe jukulongulake ng'ombi. Najombi jwaaokula Aizilaeli.
Currently Selected:
Uamusi 3: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
