Uamusi 1
1
Bandu bilikabila la Yuda na Simoni bunkamu bambu nkolongu Adonibezeki
1Baada ja kuwa kwaka Joshua Aizilaeli bunndalukia Bambu Sapanga, “Likabila boo leliilongulia kujenda kukomana na Akaanane?”
2Bambu Sapanga jajibua, “Likabila laka Yuda ndi leliilongulia kujenda, numpeki nndema hogu gubia wabu.”
3Ndi bandu bi likabila laka Yuda baapwagila alongu babu bi likabila la Simeoni, “Bajenda pamu na twepani mu nndema gobutupeki, ili tuwesa kukomana na Akaanani. Twepani kabee twiijenda pamu na mwanganya pandu pii pabumpeki.” Ndi bandu bi likabila la Simeoni bajenda pamu nabombi. 4Ndienu, bandu bilikabila la Yuda bajenda kukomana, najombi Bambu Sapanga jaajangatiya kwaawesa akanani na Apelizi, nabombi baakoma bandu elupu komi buku Bezeki. 5Mu musi we hogu bunketania bambu nkolongu Adoni Bezeki, bakomana najombi na kwaawesa Akanani na Apelizi. 6Bambu nkolongu Adoni Bezeki kabee jwatenda kutila nabombi bumpwatalia nukunkamu nu kunseku ngonzi igumba yumu maboku ni igumba yumu magolu. 7Ndi bambu nkolongu Adoni Bezeki japwaaga, “Sapanga jutei kunepa ndaba pamwandi naakamula aka bambu akolongu sabini, naasekula ngonzi yumu lugumba yumu maboku na mumagolu na nalasimisa kula posu jejihigali jejihabuki pai ja mesa jangu.” Ndienu bumpelika ku Yelusalemu najombi jatenda kuwa hoku.
Likabila la Yuda laawesa bandu ba musi uku Yelusalemu nuku Ebuloni
8Bandu bi likabila la Yuda bakomana na bandu ba musi uku Yelusalemu nukugukamu musi wabu. Baakoma bandu ba musi hogu na kwaatini tipitipi kwa mwotu.
9Baada ja haga bandu bi likabila la Yuda bajenda kukomana na Akaanani bababia atama mu nndema ututombi, upandi ukusini na punndema wanga ni tutombi. 10Bandu likabila la Yuda bajenda bakomana na Akaanani bababia atama ku Hebuloni goguwe bugukemika Kiliati Alaba, hoku baawesa bandu bu lukolu lwa Sheshati na Himani na Talimai.
Alonda baka Otinieli baawesa bandu buku musi uku Debili
Joshua 15:13-19
11Kuhuma hoku bandu bi likabila la Yuda bajenda kukomana na bandu bababia atama ku Debili, musi wehogu pamwandi gwabia bugukema Kiliati Sefeli. 12Ndienu Kalebu japwaaga, “Mundu jojwaawesa Akiliati Sefeli nampekia kamwali wangu Akisa jubia nhwanu waki.” 13Ndi Otinieli mwana waka Kenazi nnuna waka Kalebu jwatenda kugukamu musi, najombi Kalebu ampekia kamwali waki jobunkema Akisa kuba nhwanu waka Otinieli. 14Akisa pajwahika kwaka Otinieli ampwagila anndoba litui Kalebu atati baka Akisa. Akisa jabia jukwei pi liponda na pajwahuluka kuhuma panani ji liponda laki Kalebu anndalukia, “Boo nukuhengila kike?” 15Jajibua, “Noba gumbekiya nhupi jengi ngani. Ndaba gumbeki nndema gu upandi u Kusini, kabee noba mmbekia pandu papabii na kalosi.” Kalebu ampekia pandu papabii na kalosi kapanani na kapai.
Makabila ga Yuda na Benjamini gatenda kuwesa
16Akenani babube babia ibeleku ya akohanu baka Musa, balongana na bandu buku Yuda kuhuma ku musi wi mitendi, yaani musi uku Yeliku, mpaka lukoba lwa Yuda pambipi nuku Aladi, nabombi batama kola. 17Ndienu bandu buku Yuda bajenda na alongu babu bandu bi likabila la Simeoni kukomana na Akanani baatama ku musi uku Sefati nabombi bugualabana musi gola woti tipitipi. Ndi musi gola bugukema Holima. 18Ahelahe kabee bandu bi likabila la Yuda bakamula musi uku Gaza, na musi uku Ashikeloni na musi uku Ekiloni, na kila musi ni mipaka jaki. 19Bambu Sapanga jwaajangatia bandu bi likabila Yuda. Bugukamula nndema wi itombi lakini ngasebawesike kwaabenga bandu babatama mu nndema guubamba gola, ndaba babia na magali gabu ga ngondu gabiya gi isomasoma gukuhutwa ni inyama yebiikema falasi. 20Musi uku Ebuloni, bumpekiya Kalebu kulengana na malagalaki gaka Musa. Kalebu ndi jojabenga bandu bu lukolu itatu yaka Anaki. 21Lakini bandu bi likabila la Benjamini basindwa kwaabenga Ayebusi bababia atama Yelusalemu, mbaka lelenu Ayebusi atama momu pamu na bandu bi likabila la Benjamini.
Likabila laka Epulaimu na Manase buguwesa musi uku Beseli
22Ndienu bandu bi likabila laka Josepu bakomana na bandu ba musi uku Beseli, najombi Bambu Sapanga jwabia jutenda kwaajangati. 23Pabaatuma bandu kujenda kulaluki majambu guku musi guku Beseli gogugwe pa mwandi bugukema Luzu. 24Bandu baalaluki majambu bala bumbona mundu juhuma kumusi, nabombi bumpwagila, “Tulangia namuna jukujingi ku musi na twepani ngatwagukomi.” 25Ndienu jwalangia indela jukujingi ku musi, nabombi bunkoma kila mundu, lakini bunndeka mwomi mundu jola na alongu baki boti. 26Mundu jola jwajenda mbaka ku nndema ja Ahiti, kokuje juusenga musi nu kugukema Luzu, lelule ndi liina la musi hogu mbaka lelenu.
Aizilaeli ngasebaabengiki bandu bamba
27Lakini bandu bi likabila la Manase ngase baabenga bandu buku Beti Sheni ni ijiji yaki na bandu buku Taanaki ni ijiji yaki, na bandu buku Doli niijiji yaki na bandu buku Ibileamu ni ijiji yaki na bandu buku Magidu ni ijiji yaki lakini Akaanani baendalia kutama mu ijiji hei. 28Aizilaeli pabajonzukika na kuba na makili, ngasebaabengiki Akaanani ila baalasimisa baahengila mahengu ngati atumwa.
29Bandu bi likabila la Efulaimu ngase baabengiki Akaanani bababia atama ku musi Gezeli na Akaanani haba baendalia kutama momu pamu na bandu bi likabila la Efulaimu.
30Helahela Bandu bi likabila la Zebuloni ngasebaabenga Akaanani bababia atama ku musi uku Kituloni, wala bababia atama ku musi uku Nahaloli, babube babaendaliya kutama pamu na bombi koni baahengesa mahengu ngati atumwa.
31Wala bandu bi likabila la Asheli ngasebaabenga bandu bababia atama ku musi uku Ako nuku musi uku Sidoni nuku musi uku Ahilabu nuku musi uku Akizibu nuku musi uku Heluba nuku musi Afeki wala nuku musi uku Lehobu. 32Ahelahe kabe bandu bi likabila laka Asheli batama pamu na Akaanani benei bu nndema gola.
33Nabombi bandu bi likabila la Nafutali ngase baabenga bandu bababiya atama ku Beti Shemeshi wala baatama ku Beti Anati, lakini batama pamu nabombi. Hata hela Nafutali jaahengisa benei ba misi jela mahengu ngati atumwa.
34Bandu bi likabila la Aamoli baabenga bandu bi likabila la Dani ku nndema u tutombi na wala ngasebaaleka ahuluka kujingi pandu panga nu tutombi. 35Bandu bi likabila la Aamoli baendalia kutama mu misi jejibi mu tutombi tuku Helesi na Aiyaloni na Shaalubimu. Lakini bandu ba makabila gaka Manase na Efulaimu pabajonzukika kuba bingi nakuba na makili baawesa Aamoli, na kwaahenga ahenga mahengu ngati atumwa.
36Mpaka wa Aamoli wabia ku kasikasini juku Sela, kupete pandu pukulobuke pabapakema kipelela.
Currently Selected:
Uamusi 1: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
