Kukomboka 31
31
Joshua jujuku napwasi jaka Musa
Esabu 27:12-23
1Ndienu Musa jaendaliya kulonge na Aizilaeli boti, 2jaapwagila, “Nepani henu ndi mina yaka mia jimu ni ishilini na ngasemii kabee na makili gukuhenga mahengu nakanopi. Kabee Bambu Sapanga jumbwagi kubanga nganomboki losi lwa Yoludani. 3Bambu Sapanga, Sapanga winu, jaalonguliya na kwaakoma bandu bu nndema gongi baatama hoku, ili nndema hogu gwiibiya jinu. Joshua jiibiya kilongosi winu ngati ejapwaaga Bambu Sapanga. 4Bambu Sapanga jiitenda kwaakoma bandu baatama mu nndema hogu ngati ejaakoma Sihoni na Ogu, bambu nkolongu jwa Aamoli, nu nndema wabu. 5Bambu Sapanga jaanhenga mwaawesa bombi, nanamu mwaahengila ngati enunndagalakiya. 6Mmbiya nganganganga na mwoju ukuwesa wala mwaajogopa haba ndaba Bambu Sapanga, Sapanga winu ndi jojujenda pamu na nanamu. Jombi ngajiikotoki kwaajangati na ngajaaleke.”
7Ndipala Musa ankema Joshua, palongi ja bandu boti buku Izilaeli ampwagila, “Gubiya nganganganga na mwoju ukuwesa, ndaba wehapa waalongusa bandu haba kujenda kugujuku nndema goguwe Bambu Sapanga jaalagila akahoku babu, na wehapa wakabisa gubia gwabu. 8Bambu Sapanga ndi jojaalongosa, jombi jibiya pamu nanamu, jombi ngajikotoki kunzangatii na ngajaandeki. Ndienu mwiijogopa wala mwiihangajika mioju jii.”
Kusoma malagalaki kila saka sa saba
9Ndienu, Musa jaandika malagalaki haga, jaapekiya agolu bu lukolu lwa Lawi babube babiya na mahengu gukutoto Lisanduku li Lilaganu laka Bambu Sapanga, kabee jaapekia aseja boti buku Izilaeli. 10Ndienu jaalagalakiya, “Kila mwisu wa saka sa saba siibiya saka sakwalekake bandu. Mwiisoma malagalaki haga kwa sauti, kipindi sa matola gi indamba, 11kipindi bandu buku Izilaeli paahika kunndumbali Bambu Sapanga pandu pajupasagwili mwaasomila bandu boti buku Izilaeli malagalaki ganga. 12Waakusanya bandu, akanalomi na akammbomba bana na ageni baatama mumisi jinu, ili kila jumu jujoa malagalaki haga gukulibola kunntende isima Bambu Sapanga, Sapanga winu, na kuba baangali kugahenga malagalaki ganga. 13Nabombi ibeleku yabu yeyuye ngaseagamanyiki malagalaki gaka Bambu Sapanga, Sapanga winu, awesa kugajoane nu kulibola kunzoane Bambu Sapanga, Sapanga winu, kipindi soti momwiitama mu nndema goguwe gonzenda kutama kwii ja losi lwa Yoludani.”
Malagalaki gamwisu gaka Bambu Sapanga kwaka Musa
14Ndienu, Bambu Sapanga ampwagila Musa, “Lisoba laku lukulitabuka nndema guhegalii. Nkema Joshua, nhika pamu mu Lihema lukuketangane ili numpekiya malagalaki.” Ndienu Musa na Joshua bajenda mu lihema lukuketangane, 15najombi Bambu Sapanga japitila homu mu nguzu ja mahundi jejuje jajema munndyangu ulihema heli.
16Bambu Sapanga ampwagila Musa, “Guhegalii henu kujomoka, na hegwiibia gujomwiki, bandu biitumbuliya kuneka nu kuijende isapanga yu mu nndema hogu goguwe biijenda kutama, biineka nu kutunu lilaganu lenagani nabu. 17Lisoba heli nanhyomila ngamaa nukunndeka, nukuhiya pamihu jangu pambipi naku, biitenda kukomeka. Majambu gingi na mang'aliku giitenda kumpata mbaka biimanya mahakau gala gaapatiki ndaba Sapanga wabu ngasejubii kati jabu. 18Sakaka nepani nga nanzangati ndaba ahengiki majambu gilia nu kung'anambuki isapanga yengi.
19“Henu andika nhwambu gongo, waabola bandu buku Izilaeli ili malobi gaki galangia abii na makosa ndaba ngasebanyetaki nepani. 20Paapelika mu nndema gongo mu nndema gogulengana kupugi nu kulema, ngati enaalagila akahoku banu, nabombi biikula nu kutupi, biing'anambukia isapanga yengi nukuitumaki, biitenda kunoong'ama nu kutunu lilaganu langu. 21Pabiipata mang'aliku gingi na majambu gingi giliya, nhwambu gongo waakumbukia abii na makosa ndaba ngabagujewi bombi ni ibeleku yabu. Sajenu, kabula ngasenaapeliki mu nndema gonumpeki, nijimanyika mipangu jeapangiki.”
22Ndienu, Musa jaandika nhwambu lisoba lelele, na kwaabola Aizilaeli.
23Ndienu Bambu Sapanga anndagalakiya Joshua, mwana waka Nuni, ampwagila, “Gubia nganganganga na mwoju ukuwesa, ndaba walongua Aizilaeli mu nndema goguwe naalapi kwaapeke, nanepani niibiya pamu nawe.”
24Musa pajajomula kuandika malobi ga malagalaki haga tumbuka puutumbuli mbaka mwisu, 25jaapwagila Alawi, bababii ni lihengu lukutoto Lisanduku li Lilaganu laka Bambu Sapanga, 26“Nnzukua kitabu sa malagalaki hase, mmbeka pambipi ni lisanduku li lilaganu laka Bambu Sapanga, Sapanga winu, ili Aizilaeli awesa kumanya paakose. 27Ndaba manyiki emmbii mwabandu mong'anambuka na biniing'omu. Ana mmbii moung'anambuka Bambu Sapanga kipindi enabii namwomi pamu na mwanganya, kwibiya boo baada ya kuwa kwangu? 28Akusanya palongi jangu akakilongosi boti ba makabila ginu na akolongu bii mbata kupwaaga malobi haga ajoaninya, nakwombi kunani kumaundi nu nndema ijowaa paniibia naapwagi bandu abaa. 29Ndaba manyiki kubanga baada ja kuwa kwangu sakaka mwiibiya mwaabaja nu kujileka indela jenuundagila mwijipwata. Na mu masoba gagahika gaampata mang'aliku na majambu giliya kubanga mwiihenga kihakau palongu jaka Bambu nu jombi kuyome kwa mahengu ginu.”
Nhwambu waka Musa
30Ndienu, Musa jaajembila nhwambu gongo palongi ju nkutanu gwoti gwa Aizilaeli.
Currently Selected:
Kukomboka 31: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
