Kukomboka 29
29
Lilaganu laka Bambu Sapanga mu nndema uku Moabu
1Haga ndi malobi gi lilaganu lelule Bambu Sapanga anndagalakiya Musa juhenga na Aizilaeli mu nndema uku Moabu, kulekana ni lilaganu Bambu Sapanga lejahenga nabu ku kitombi sa Helobu. 2Musa jaakema Aizilaeli boti jaapwagila, “Mwabweni mwabeti namuna Bambu Sapanga eanhengila bambu nkolongu Falau juku Misili, na akakilongosi na atumisi baki nu nndema woti. 3Mwagabweni mwabeti majambu gajahengiki Bambu Sapanga gaguge ndi mang'aliku makolongu, nginyuli na majambu gukusangasa. 4Lakini mbaka lelenu Bambu Sapanga ngasejaapeki malangu gukumanya, gamwapeti gala miu gukulinga wala makutu gukujoa!
5“Kwa yaka alubaini, nepani naalongusa kulukoba, ingobu inu yemwawati ngaseyalaile wala ilatu inu ngaseyalaile mu magolu ginu. 6Ngasemwabii na mabumunda wala kunywa divai au sindu sukulobe, lakini Bambu Sapanga jajangatiya kwaapeke goti haga ili mmanya kubanga Bambu Sapanga ndi Sapanga winu.
7“Pamwahika pandu hapa, bambu nkolongu Sihoni juku Heshiboni na bambu nkolongu juku Bashani bahika kukomana na twepani, lakini twatenda kwaawesa, 8twajukua nndema wabu, twaagabagila makabila gaka Lubeni na Gadi na nusu ji likabila laka Manase gubiya gwabu. 9Ndienu nhangaliya nu kukamu malobi goti gi lilaganu hale ili majambu gi gajenda sapi mu mahengu ginu goti.
10“Lelenu nnzemiki palongi jaka Bambu Sapanga, Sapanga winu, mwanganya mwaboti na akakilongosi ba makabila, aseja binu, akaapisa binu, 11ahanu binu na bana binu na ageni baatama mu makambi ginu babube aseku hanzu na kwaateke masi. 12Mmbii pamba lelenu ili kuhenga lilaganu lende lelule Bambu Sapanga winu juhenga lelenu, 13kubanga jaalangia lelenu kuba ndi bandu baki najombi jibiya Sapanga winu, ngati ejaalapila mwanganya na akahoku binu, Abulamu ni Isaka na Yakobu. 14Wala ngasehenga lilaganu hale na mwanganya kajika pena nu kulogo yaambamba yaki. 15Ila kabee kwa ndaba ja bandu banga kuba pamu ni ibelaku itu yeyuye ngaseisaliwi. Ngahengi kwa ndaba ja bala pena baabii pamu na twepani lelenu palongi jaka Bambu Sapanga, Sapanga witu.
16“Mmanyiki namuna etwabiya tutama ku Misili na namuna etwabiya tujenda mu nndema wa bandu bangi mbaka patuhikiki pamba. 17Mwiibweni imong'umong'u yabu yeisukisa yebabiya atenda kuilumbali hei ndi isapanga imikongu na malibu ga madini ga feza na zahabu. 18Nndingaliya kupwaaga nga mwanalomi wala mmbomba, lukolu au likabila lokapi lelijema pamba lelenu lelandeka Bambu Sapanga, Sapanga witu, kujenda kutumaki isapanga ya bandu bi milema jengi. Lijambu heli libiya ngati mikega jejimela nu kupapa matunda gagababa na gagabii na sumu. 19Ngati baada jukujoa malobi gi lilaganu hale lelule ntei kuliga ndienu mundu anajilipwagi mweni mmwoju jaki nibiya sapi hata ngati ngasengamu mihilu je heji, heli laankoma mwaboti mwaabaja na baamboni. 20Bambu Sapanga ngabanndekake mundu hoju, nayombi inyela yaka Bambu Sapanga na wipu waki yanyakila mundu hoju, yaambamba yoti yeiandikwi mu kitabu senze yanhikila, najombi Bambu Sapanga jaliputa liina laka mundu hoju kuhuma pu nndema. 21Bambu Sapanga ambeka kutali kati ja makabila goti guku Izilaeli ili jupata mang'aliku kulengana na yaambamba yoti i lilaganu leliandikwi mu kitabu senze sa malagalaki. 22Mu ibeleku yeihika, ibeleku inu kuhuma kunndema uku kutali biibona namuna Bambu Sapanga ejuguletila nndema gongo mang'aliku na kuwa. 23Nndema waku wibiya guhalabiki sukutwele malibu gikibiliti na mwinyu ngasindu sokapi sesimela wala manyoi ngagimeli. Ndema winu wibiya ngati Sodoma na Gomola au Adima na Seboimu jejijihalabana Bambu Sapanga pajaakoma kwi inyela yaki ingali . 24Hena, bandu bangi bi milema jengi biipwaaga, ‘Ndaba jakii Bambu Sapanga juguhengii nndema hogo? Inyela hei ngolongu jiilangi kike?’ 25Ndi biipwaga, ‘Ndi ndaba batunula lilaganu laka Bambu Sapanga, Sapanga jwa aseja babu jahenga nabu pajapia mu ndema juku Misili, 26bajenda kujitumakii nu kuilumbali isapanga yengi, yeyuye ngasebamanyiki pu utumbuli, jejuje Bambu Sapanga jaakana bajilumbali. 27Ndienu inyela yaka Bambu Sapanga yanyaka kupete bandu bu nndema gongo, nu kujilete mang'aliku kulengana na yaambamba yeiandikwi mu kitabu senze. 28Hesi ndi sesunhenga Bambu Sapanga, jaaboa kuhuma mu nndema wabu jaayomi ngamaa na jaapelika mu milema ji kigeni na abii hoku mbaka lelenu.’
29“Majambu gagajobiki ndi gaka Bambu Sapanga, Sapanga witu, lakini gabagayekwi ndi gitu ni ibeleku itu yaka yoti, ili tuhenga malobi goti ga malagalaki ganga.”
Currently Selected:
Kukomboka 29: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
