Kukomboka 26
26
Matambiku gi hindu gaahusiki
1“Pamwiijingala nndema jejuje Bambu Sapanga, Sapanga wii jumpeke kujilisa na pamwiikuba mujijukwii nukutama nkati jaki, 2nzukua ilebi yengi yu utumbuli yenhusiki ya indu yoti yemwibia mpandiki mu luombi wa nndema goguwe Bambu Sapanga jutei kumpeke mu kitonga. Ndi wiijenda naku mbaka pandu pajupahagwi Sapanga ili kunndumbali jombi. 3Wannzendila nngolu waka Sapanga jojuhenga lihengu kipindi hesi nukumpwagi. ‘Lelenu nyetake palongi jaka Bambu Sapanga, Sapanga wangu, kubanga nyingi mu nndema goguwe Sapanga jwaalapila akahoku bitu kupwaga jwiitenda kutupeke.’
4“Najombi nngolu waka Sapanga pajwijukua kitonga hesi mu maboku gaku nukukibeka palongi ja pandu pukupiiki matambiku jaka Bambu Sapanga, Sapanga waku, 5wiipwaga malobi ganga palongi jaka Bambu Sapanga, Sapanga waku, ‘Atati bangu jabia mundu juku Ahalamu jojwabia jujendajenda koni nakoni, ndienu jwajenda ku Misili na jwatamahoku ngati nngeni. Jombi na alongu baki ngasebabii bingi pababia hoku, lakini babia bandu bunndema nkolongu na babia bingi na bana makili. 6Amisili batenda kutubone nu kutung'alisa koni butuhengesa mahengu makolongu ngati atumwa. 7Ndienu, tunndelila Bambu Sapanga, Sapanga wa Ahoku bitu, najombi jwajojwini kilelu situ na kugabona mang'aliku gitu na mahengu gaganonwipi na mang'aliku gatwabia tutenda kugapata. 8Ndienu, Bambu Sapanga jutupia ku Misili kola sukutumii makili gaki makolongu na nginyuli na ndondukela. 9Jutuleta pamba nukutupeke nndema gongo jejibii sapi kukupugi na kulema. 10Ndienu nunndete Bambu Sapanga ilebi yu utumbuli yenhusiki mu migonda jagu mu munndema gojumbeki.’
“Ndienu wiibeka kitonga pai palongi jaka Bambu Sapanga, Sapanga waku, nukulumbali palongi jaki. 11Nawehapa wiitogulia majambo goti gaamboni gajugupeki Bambu Sapanga, Sapanga waku, wehapa na alongu baku. Nabombi biitogulia pamu na wehapa. 12Kila eipeta yaka itatu, kila mundu kati jiinu jwiipia pandu pamu pa komi pi ilebi yaki yoti kwa ndaba ja Alawi na ageni na akeba na akambomba baawii alomi babu ili apata posu joti jeapala paakuba mu misi jinu. 13Ndienu wiipwaga palongi jaka Bambu Sapanga, Sapanga winu hana. ‘Nyumba jangu jipiiki lipungu la sapi nakwaapeke alawi na ageni na akeba na akambomba baawii alomi babu ngati hegunagalaki nhenga. Ngasengotwiki kuhenga malagalaki gaku wala ngasenyegwike. 14Ngasenakuliki pandu pa komi pokapi panabia nakalobalakia, ngasenapagusiki panabia ngasenyetakiki palongi janku wala ngasenapia pandu pakomi pe hapa kwa ndaba ja mahoka. Nugujowani wa Bambu Sapanga, Sapanga wangu, nu kuhenga kila sindu segunagalaki. 15Gulingalia pai kuhuma kunani kwa maundi kogutama sapi, gwapengila bandu baku Aizilaeli nu nndema goutupeki ngati hegwaalapi aseja bitu nndema gogunyambiki kupugi nu kulema.’
Musa jaalakali bandu baka Bambu Sapanga
16“Lelenu Bambu Sapanga, Sapanga winu, junndagalaki kukamu miilu na malagalaki ganga. Mmbia monndingalaki kuhenga kwa mwoju goha na loho joha. 17Lelenu nzetaki kupwaga Bambu Sapanga kuba ndi Sapanga wino na mwiipwata indela yaki nukukamu mihilu yaki na malagalaki gaki nukunzoane jombi. 18Najombi Bambu Sapanga lelenu junzetaki mwanganya kubanga mwabandu baki ngati hejunndagila kupwaga mpalika kukamu malagalaki ni miilu jaki joti. 19Jwanhenga mwanganya kuba bandu akolongu ngani kupeta bandu bi milema jengi bajabombiki. Nanamu mwampekiya Bambu Sapanga ulumbi ni isima yaki. Mwanganya mwiibia mwabandu baka Sapanga ngati hejalagalaki.”
Currently Selected:
Kukomboka 26: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
