Kukomboka 22
22
1“Ana gwijibwe ng'ombi au likondoo luku nndongu waku litei kuhoba, waileka ila waikelabua kukunndogu waku. 2Lakini ngati anakunyumba juku nndongu waku ngase kubii pambipi au ngati ngasegumanyiki mweni, ndienu wijenda naku kinyama hesi kunyumba jaku, wiitama naku mbaka pajwiihika mweni, nawehapa wankelabukia. 3Wiihenga helahe kwi liponda au ingobu au sindu sokapi sejuhoiki nndongu waku. Kupalika kunnzangati.
4“Ana gulibweni liponda au ng'ombi juku nndongu waku jihabwiki mwiindela, wiikotoka kunzangatila nndongu waku, wanzangatiya nndongu waku kulitondabea.
5“Akambomba biiwata ingobu yakanalomi na akanalomi biiwata ingobu ikimmbomba. Jojihenga hela sibiya sindu sukusukisa kwaka Bambu Sapanga, Sapanga winu.
6“Ana wikiketani kitundu si kijuni mu nkongu au mwiindela, kibii ni ibana au maombi ni kijuni seni kibii papu kitenda kugajobate, waakijukuu kijuni hesi ni ibana yaki. 7Wakileka kijuni hesi kijenda, lakini guwesa kujukuu ibana yaki. Anaguhengiki hela Sapanga jagupengila na wiiwesa kutama masoba gingi.
8“Egwisenga nyumba inyai, gusenga nu lumatu mulutengu ju nhaga, ananga kuhenga hela mundu anajuhabwiki nakuwa jagulelila wehapa. 9Gwiipanda mimea jengi mu litui laku li mizabibu, ana guhengiki hela ilebi yaku yoti nga ikubi yaku nga matunda gagupandiki pe gala ila kabee matunda gi mizabibu.
10“Wiilema nngonda sukutumi ng'ombi ni liponda pamu sukukonga kingolingoli simu.
11“Wiiwata ingobu yealokiki sukutumi mangoma gi inyama na yealokiki kwi migoji ji kitambaa kihuu. 12Konga mahundu nsesi ga nyusi mu ingobu jaku.”
Malagalaki ga ndou
13“Ana mwanalomi anajuntoi mmbomba nukugone naku, na mwenikatai jupala kunndeka, 14koni junkopaki nu kunkema liina lilihaa kupwaga, Nuntola mmbomba ajo, lakini enagonila naku jabonikana juwaiki kugone na akanalomi jongi.”
15Ndienu, atati baki na amabaki mmbomba hoju biileta sindu sukulangi kamwali wabu ngasejuwaiki kugone na mwanalomi kwa akikilongosi bi pi litanga la musi nukumpwaga, 16“Tumpiiki kamwali witu mundu ajoo kuba nhwanu waki, lakini sajenu ngase apai kabete, 17henu ankopaki kamwali witu kupwaaga kubanga ankoli kamwali witu jubii jojuwaiki kugone na mwanalomi jongi kabula jaki. Hata hela tuletiki ingobu jejilangi kubanga ngasejuwaiki kugone na mwanalomi jongi. Ndienu bajihatambula ingobu jejibii na sindu sekilangi kubanga ngasejuwaiki kugone na mwanalomi palongi ja akakilongosi ba musi. 18Akakilongosi ba musi bala ndi banzukua mwanalomi jola nu kundimanga iboku. 19Kabee baampwagila julepa ipandi mia jimu ya madini ga feza na kwaapekee atati baka kamwali hoju kwa ndaba mwanalomi hoju anhengiki jubiya ni iyoni kamwali juku Izilaeli. Kamwali hoju jiendalia kuba nhanu waki na ngajiwesi kulekana naku mu kutama kwaki kwoti.” 20Lakini ana magambu haga gabii sakaka, na ngase kibii sindu sekilangi kubanga kamwali hoju ngase juwaiki kugone na mwanalomi jongi, 21bampelika kamwali hoju pi litanga la nyumba ja atati baki na akanalomi ba musi hogu bandapula malibu mbaka kuwa, ndaba juhengiki kihakau mu nndema uku Izilaeli sukuhenga uselati koni jubii kunyumba ja atati baki. Hapa ndi emwakiboa kihakau ngati hesi pikilanda jinu.
22“Ana mwanalomi anabunkamwi ugoni nu nhwanu ukunzaki, boti abeli, mwanalomi nu mmbomba ndi kupalika kwaakoma. Hela ndi emwakiboa kihakau pikilanda jinu.
23“Ana mwanalomi anketani kumusi kamwali joasumbiki, najombi kujenda kugone naku, 24mwaapiya boti kunza ja musi nukwaalapu kwa malibu mbaka akuwa. Kamwali hoju ndi kupalika bunkoma ndaba ngasejajamali bunzangatia hata ngati jabii ku musi, na mwanalomi hoju ndi kupalika kunkoma kwa ndaba anhengiki nsumba mundu jongi. Sukuhenga hela ndi emwakiboa kihakau pikilanda jinu.
25“Lakini ana mwanalomi juketangini ku kiholi na kamwali joansumbiki nu kunkamu kwa makili, ndienu mwanalomi pena jojipalika kunkoma. 26Mwanhengee kamwali hoju sokapi, jombi ngase jubii ni kihakau sekipalika kukomeka. Lihengu laka mwanalomi ndi ngati lihengu lukundapu mundu nukukoma, 27kwa ndaba mwanalomi hoju ankamula kwa makili kamwali hoju kukiholi hata ngati jajamali ili ahika kunzangati ila ngasejabii mundu jukunzangatila.
28“Ana mwanalomi ankamwi anndimba kamwali jwanga kunsumba, 29Mwanalomi hoju jwaalepa atati buku mmbomba jola ipandi amusini ya madini ga feza ndaba jutei kunndimba nu mmbomba hoju jibia nhwanu waki, wala jwaandeka hata kulenga mu kutama kwaki kwoti ndaba ampoiki liyamu.
30“Mwanalomi jokapi jwiilenga kugone nu nhwanu wa atati baki.
Currently Selected:
Kukomboka 22: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
