2Samweli 3
3
1Kwabia na ngondu ja masoba gingi kati ja bandu babumpala Sauli na bandu babumpala Daudi. Lakini Daudi jwaendalia kupata makili ngani nu upandi waka Sauli waendalia kuhuluka makili namangani.
Bana akanalomi baka Daudi
2Bana akanalomi bajwaapapiki Daudi ku Hebuloni, babiya Amnoni jwabiya mwana waki na anyongo baki babia Ahinoamu kuhuma ku Yezileeli. 3Kileabu jabiya mwana waki wa pili, amabaki babia Abigaili jojwabi nhwanu waka Nabali kabla jakuwa, jombi jwaumila ku Kalimeli. Abusalomu nsaliwa waki jwa tatu, anyongo baki babia Maaka jojwabia kamwali waka Talimai bambu juku Geshuli, 4Adoniya ndi nsaliwa waki junsesi amabu baki babia Hagiti, Shefatia jwabia nsaliwa waki jwa tanu na anyongo baki babia Abiatali, 5na Iteleamu jwabia nsaliwa waki wa sita anyongo baki babia Egila nhwanu waka Daudi. Haba ndi bana bajwapapiki Daudi pajwabia ku Hebuloni.
Abuneli jujongana na Daudi
6Kipindi sa ngondu kati ja bandu baka Sauli na bandu baka Daudi, Abuneli jwabia jutenda kuliandaa ili jubiya bambu nkolongu mu nyumba jaka Sauli.
7Sauli jwabia ni libangu limu lebilikema Lisipa kamwali waka Aya. Lisoba limu Ishibosheti anndalukia Abuneli, “Ndaba jaki gugoni ni libangu la atati bango?” 8Abuneli jwayoma ngamaa ndaba malobi gaka Ishibosheti jwapwaga, “Boo, guwasali nepani nhwesa kung'anambuka Sauli? Boo, guwasali nepani ndumakia bandu buku Yuda lena? Linga nepani mi na mundu jojwaajowane bandu ba atati baku Sauli, alongu baki na aka akosi baki na ngasenugukamwi nu kugupeleka kwaka Daudi mbaka lelenu. Lakini lelenu gumona nummbaja ndaba juku mmbomba. 9Sapanga jungomaa ana nganiihengi majambu gajulapiki Bambu Sapanga kwaka Daudi. 10Bambu Sapanga anndapila Daudi kubanga jwaguboa ubambu ukolongu kuhuma kwaka Sauli kujenda kwaki Daudi najombi jwiibia bambu nkolongu juku Izilaeli na Yuda kuhuma ku Dani mbaka ku Beeli Sheba.” 11Ishibosheti ngasejawesiki kulonge lilobi lokapi ndaba jwabia anzogopa Abuneli.
12Ndi Abuneli jwaatuma bandu ku Hebuloni kwaka Daudi bukumpwagila, “Boo nndema gongo waka nyane? Gujetangana nanepani, nanepani nagujangatia kuguhenga nndema uku Izilaeli gubiya mali gaku.”
13Daudi anzibua, “Hena niijetanganiya na wehapa. Lakini mbala lijambu limu kuhuma kwaku. Wiihika palongi jangu mbaka pa wanndeta Mikali kamwali waka Sauli. Hapa ndi pawimona.” 14Daudi kabee jwaatuma bandu kwaka Ishibosheti mwana waka Sauli kupwaga, “Gungelabukia nhwanu wangu Mikali jonunnzukuwa kwa ngosi mia jimu ya Afilisiti yeyapatikana kupete kuseku jandu.” 15Ndi Ishibosheti jwatuma bandu bukunnzukua Mikali kuhuma kuku nndomi waki, Palitieli mwana waka Laishi. 16Lakini Palitieli jwajenda pamu nunhwanu waki koni julela mwiindela joti mbaka ku Baulimu. Abuneli ampwagila Patilieli, “Gubuja kunyumba.” Najombi jwatenda kubuja.
17Abuneli jwalongila na aseja buku Izilaeli, jwaapwagila, “Masoba gingi gagapetiki mwapala Daudi jubia bambu nkolongu wii. 18Henu nndeta lijambu heli kwa bandu ndaba Bambu Sapanga anndagila Daudi kubanga, ‘Kupete wa Daudi untumisi wangu naahokula bandu buku Izilaeli kuhuma kwa Afilisiti na kwa abaja babu bingi.’” 19Abuneli jwalongila na Abenyamini nu kujenda mbaka ku Hebuloni kumpwagi Daudi kupete goti gabalagani kuhenga na bandu boti buku Izilaeli na bi likabila loti luku Benyamini. 20Abuneli eanzendila Daudi, jwabia na bandu ishilini na Daudi jwaahengila matola. 21Abuneli ampwagila Daudi, “Nepani niijenda nukugulete bandu boti buku Izilaeli wehapa wabambu nkolongu wangu. Biika nukuhenga lilaganu pamu na wehapa ili gubia wabambu nkolongu wabu na wehapa waalongusa boti kulengana na hewiipala.” Daudi antabuka Abuneli jujenda, najombi jwaboka kulukwali.
Yoabu ankoma Abuneli
22Mweni katai Yoabu pamu na bandu bangi baka Daudi babuja kuhuma kukukomana ngondu, baleta hindu hingi ye biinyagiki. Lakini Abuneli ngasejwabi pamu na Daudi ku Hebuloni kola ndaba Daudi jwabia antabwiki jujenda, najombi jwaboka ku lukwali. 23Yoabu pajwabuja koni jubii na akomana ngondu baki boti bajwabia naku, bumpwagila kubanga Abuneli mwana waka Neli jwahikiki kummbona bambu nkolongu Daudi najombi antabwiki jujendaje, najombi jubokiki ku lukwali. 24Yoabu anzendila bambu nkolongu nu kumpwagi, “Henu guhengiki kii? Linga Abuneli jwahika kwaku, ndaba jaki gunndekiki jujendaje? 25Boo, gumanyiki Abuneli mwana waka Neli jwahikiki kugukonga? Jwahikiki ili jumanya majambu gaku na kila seguhenga.”
26Yoabu pajwahuma kulonge na Daudi jwaatuma bandu ajenda kunkema Abuneli na bombi bunketania ku kiliba suku Sila nu kunkelabu, lakini Daudi ngasejwamanyiki lijambu hele. 27Abuneli pajwabuja ku Hebuloni, Yoabu anzukua pulutengu ji litanga ngati kummbole sindu. Ndi Yoabu ansekula Abuneli mu lutumbu ndaba Abuneli jwabia ankomiki Asaheli nndongu waki na Abuneli jwatenda kuwa. 28Daudi pajwajowana hela jwapwaga, “Nepani nu ubambu wangu ngasetubii na makosa palongi jaka Bambu Sapanga kupete Abuneli mwana waka Neli. 29Likosa lukukoma hoku libia panani jikimutu saka Yoabu na bandu boti ba kwaatati baki! Aka alongu baka Yoabu biikosa mundu jojubii nu ugonzu wikisononu au ugonzu ukulela nhyega au mundu jojujende mikongu au kukomeka ku upanga au inzala!” 30Yoabu nu nndongu waki Abishai bunkoma Abuneli ndaba jwabia junkomiki nndongu wabu Asaheli kipindi sukukomana ku ngondu ku Gibeoni. 31Ndi bambu nkolongu Daudi ampwagila Yoabu na bandu boti bababia pamu najombi ajendula ingobu yabu awata magunii ili bunndobalakia Abuneli. Kipindi sukuntaga Bambu nkolongu Daudi jwabia jujenda mu nyuma ji lisanduku. 32Abuneli buntaga ku Hebuloni na bambu nkolongu jwatenda kunndele kwa sauti koni jubi pulutengu ji litenge, kabe bandu bangi boti bahenga ahelahe. 33Bambu nkolongu anndelila Abuneli koni jupwaaga,
Boo, kwabii boo Abuneli jwakuwa ngati nng'ang'a?
34Maboku gaku ngasebagakongike
na magolu gaku ngasebagakongiki pengu.
Jukuiki ngati mundu jobunkomiki bandu abaja! Na bandu boti bunndelila kabee.
35Ndi bandu boti bajenda kunkolo Daudi jukula libumunda pakwabia kwakona mui. Lakini Daudi jwalapa koni jwaapwagi, “Sapanga jungoma anaonziki libumunda au sindu sokapi kabula lioba kujingi.” 36Bandu boti bagabona majambu haga, nabombi kwatenda kwaalengane ngati kila sindu sejwahenga bambu nkolongu hesaalengani. 37Ndi lisoba lela Aizilaeli boti bamanya kubanga ngaselabii liwasu laka bambu nkolongu Daudi kunkoma Abuneli mwana waka Neli. 38Bambu nkolongu jwaapwagila atumisi baki, “Boo, ngase mmanya lelenu mundu nkolongu na jojumanyikana namangani jukuhiki pa Izilaeli pane? 39Hata ngati nnyakani mauta ili mia bambu nkolongu, lakini lelenu nepani nzokiki makili. Bana baka Seluya haba abaja ngamaa. Bambu Sapanga jwaalapula abaja haba kulengana nu ubaja wabu.”
Currently Selected:
2Samweli 3: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
