2Samweli 13
13
Amunoni na Tamali
1Abusolomu jwabii nu ndombu waki jobunkema Tamali. Ndi kwaika kipindi Amunoni mwana jongi mwanalomi waka Daudi ampala ngamaa Tamali. 2Amunoni jwang'aliki ngamaa mbaka julikopakia jutenda kulwala ndaba juku ndombu waki Tamali, ndaba Tamali jwabi kamwali jwanga kummanya mwanalomi, na kwabonikana lijambu langa kuwesikana kwaka Amunoni kuhenge sindu sokapi jwombi. 3Lakini Amunoni jwabia nunkosi waki jobunkema Yonadabu, mwana waka Shamu nndongu waka Daudi. Yonadabu jwabia mundu jojubii nuumanyi ngamaa. 4Yonadabu ampwagila Amunoni, “Wehapa wamwana waka bambu nkolongu, ndaba jaki gutenda kukombala na gubonikana ngasegutogule kila lisoba? Ndaba jaki ngasegupala kumbwagila.” Amunoni, ampwagila “Numpala Tamali ndombu uku nndongu wangu Abusolomu.”
5Yonadabu ampwagila, “Weapa uligonika pikitanda ulikopakia gunngonzu. Atati baku pabiika kugubona undoba, ‘Ndagalakia dada wangu Tamali juhika junetila libumunda nhwesa kula na junhandalia posu palongi jangu koni nijibona na mweti na junea posu jeheji.’” 6Ndienu Amunoni jwaendalia kugone pikitanda, koni jukopake jutenda kulwala. Bambu nkolongu ejajenda kumbona, Amunoni ampwagila, “Nuguloba kumpwagila Tamali dada wangu juhika pamba jundelakia posu kasokopi koni nundingalila, na mweni juneyaje.”
7Ndi Daudi ampwagila Tamali jujenda kunyumba juku nhwasa waki Amunoni akuntelakia posu. 8Ndienu Tamali jwajendakola anketania Amunoni jugoni. Jwajukua uwembi nukuuhunya nukuntelake posu palongi jaka Amunoni. 9Posu je jela pajabia jikupiki, Tamali jujipia mu supulia. Nukumpelake Amunoni lakini Amunoni jwakana kula, jwapwaga kila mundu jupita kunza na boti bapita kunza. 10Ndienu Amunoni ampwagila Tamali, “Henu gunetila posu jeheji mu sumba sango nu gunea.” Tamali jwajukua posu jela nukugapeleka kusumba suku nhwasa waki Amunoni. 11Pajwabia ampeke poso jela, Amunoni ankamula nukumpwagi, “Guika gugonila nanepani.”
12Lakini Tamali ampwagila, “Ngahela nhwasa wango wiinasimisa. Lijambu ngati ale ngase lihengeka mu nndema wa Izilaele. Wiihenga lijambu liking'ang'a alele. 13Kuupandi wangu nepani nganhwesi kuinakali iyoni ayeye. Nu kuupandi waku wehapa wiibia jumu kati ja bandu ang'ang'a munndema wa Izilaeli. Henu, nuguloba gulongila na bambu nkolongu ndaba ngajukukani kunyuku mia nu nhanu wako.” 14Lakini Amunoni ngasejwapala kunzowane na ndaba jwabii na makili kupeta jombi ankamula nukunndimba.
15Ndienu Amunoni ansuki Tamali ngamaa. Ansukia Tamali kupeta eampala puutumbuli, Ampwagila Tamali, “Boka pamba.”
16Tamali anzibua, “Ngahela nhwasa wango, ubaja nkolongu go guhenga gukumenga nepani ndi ukolongu ngani kupeta go gunhengiki.”
Lakini Amunoni ngasejwapala kunzowane. 17Ankema nkombu waki jojwabia joantumakia nukumpwagi, “Mpia mbomba ajo palongi jangu. Nu nndyangu ugupunga nikipanda.” 18Amunoni nu nkombu jola bumpiya nu kugupunga nndyangu kukipanda. Tamali jwabia juweti ingobu nasu jejibii na maboku malasu ndaba hela ndi heakubika awata bana baka bambu nkolong akakamwali. 19Ndi Tamali julipakia maliu kukimutu nukulipapu lingobu laki nukubeka maboku gaki kukimutu, ndi jwaboka koni julela kwa sauti. 20Abusolomu nhwasa waki paambona andalukia Tamali, “Boo, Amunoni nhwasa waku jugoni nawehapa? Gutumbala nndombu wango. Jombi ndi nhwasa waku. Walibeka lijambu heli mu mwoju waku.” Ndi Tamali jwatama mu nyumba jaka Abusalomu koni jubii nu usungu nukulibona jubii kanzika jaki. 21Bambu nkolongu Daudi pajwajowana lijambu heli jwayomiki ngamaa. 22Abusoloni ansuki Amunoni ngamaa hata ngasejwabia julonge nako, ndaba akamula nndombu waki Tamali nukunndimba.
Abusolomu julepa kisasi
23Eyabiya ipetiki yaka ibeli Abusolomu jwabia na lihengu lu kuseku makondoo gaki mangoma ku musi uku Baali Hasoli, pambipi nu mpaka nuku Efulaimu. Jwaakoka bana boti baka bambu nkolongu akanalomi. 24Abusolomu anzendila bambu nkolongu Daudi nukumpwagi, “Linga nepani ntumisi waku nenzeku makondoo gaku mangoma. Nuguloba wa bambu pamu na atumisi baku, nnzenda pamu nanepani, ntumisi waku.”
25Bambu nkolongu jwajibua, “Ngahela mwanawango twiijenda twaboha, twiikuba nsigu kwaku.” Hata ngati Abusolomu jwaendalia kunndoba jujenda lakini bambu jwatenda kukana jwatenda kumpenge.
26Ndienu Abusolomu ampwagila, “Ana ngagujendi nala gunndeka nndonguwangu Amunoni tujenda najombi.” Bambu nkolongu jwajibua, “Lakini ndaba jakii jujenda pamu na mwanganya?” 27Lakini Abusolomu jwaendalia kunndobalake, na mwisu wee bambu nkolongu Amunoni na bana baki bangi ajenda ku tipati heji. 28Abusolomu jwaapwagila atumisi baki, “Munndingalia Amnoni pajwibia jukunywiki divai nukulobee nakanopi. Panampwagila, ‘Munndapula Amunoni,’ mwankoma. Ganiaga ndi malagalaki gangu kwinu mwanganya. Mwiijogopa na mmbia na makili.” 29Ndienu atumisi baka Abusalomu bunhengila Amunoni ngati hebabia alagalakiwi na Abusolomu ndi bana akanalomi bangi baka bambu nkolongu batenda kuboka kila jumu jwakwela kinyama saki sebikikema nyumbu nukutila.
30Pababia bakona mwiindela, Daudi jwamanya kubanga Abusolomu jwaakomiki bana baki boti ngasejuigali hata jumu. 31Bambu nkolongu Daudi jwajumuka nukujendu mangobu gaki kuusungu nukugone pai. Hata na atumisi baki boti bababia ajemi pambipi najombi bajendula mangobu gabu. 32Lakini Yonadabu, mwana waka Shimea nndongu waka Daudi ampwagila, “Bambu wangu jwiiwasali kubanga bana baki boa atei kwaakoma. Amunoni kajikajaki ndi jobunkomiki. Majambu haga Abusalomu jwapangi kugahenga toka kipindi Amunoni paandimbiki Tamali nndombu waki. 33Henu wabambu wangu wiiwasali mu mwoju waku kubanga bana baku boti atei kuwa. Amunoni kajika jaki ndi jobunkomiki.”
34Lakini Abusalomu jwabia jutiliki. Najwombi nkombu jojwabia zamu jaki juulonda apalapa jwabona likundi la bandu ahika kuumi ku kitombi muindela jukuumi ku Holonaimu. 35Yonadabu ampwagila bambu nkolongu, “Lingalia bambu nkolongu, bana baku aika ngati henugupwagi nepani ntumisi waku.”
36Ntumisi jola pajajomula pe kulonge bana akanalomi baka bambu nkolongu batenda kujingi, batumbulia kulela kwa sauti. Bambu nkolongu na bandu boti batumbulia kulela kuusungu.
37Lakini Abusalomu jwatilila kwaka Talimai mwana waka Amihudi bambu nkolongu wa musi uku Geshuli. Bambu nkolongu Daudi andelila mwana waki Amunoni kwa masoba gingipi. 38Abusolomu jwatilila kumusi uku Geshuli, jwatama kola kwa yaka itatu. 39Baada jaka bambu nkolongu Daudi kutuli kupete kuwa kwaka Amunoni mwanawaki, jwatumbulia kutokule kummbona mwanawaki Abusalomu.
Currently Selected:
2Samweli 13: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
