1Samweli Ulongulelu
Ulongulelu
Itabu ya 1Samweli na 2Samweli pu utumbuli sabia kitabu simu kikolongu sesamanyikana ngati Kitabu saka Samweli. Puutumbuli kitabu senze sabaganwa na kuba itabu ibeli yebiikemika “Litoleu la Septuagenti.” Heli labiya lihengu lukutumbuli lukuandika Lilaganu la Mwandi kuhuma mu malobi giki Ebulania kujenda ku malobi giki Kiyunani. Liina liki kitabu hesi lilangi kubanga bandu babaandika kitabu sehesi babia asomi sabini au sabini na abeli bi Kiyahudi babaandika kitabu sehesi. Mu kitabu sehsi seandiki kwi Kigiliki, kitabu ya 1Samweli na 2 Samweli biikemika 1 Akabambu Akolongu na 2 Akabambu Akolongu na mu kitabu seandiki kwa malobi gi Kilatini sebabiya aandiki baada ja hesi, itabu yeheyi biing`anambua nukuikema 1 Akabambu Akolongu na 2 Akabambu Akolongu. Ndienu itabu heyi yeimanyikana lelenu ngati 1 Akabambu Akolongu na 2 Akabambu Akolongu biikema mu litoleu heli 3 na 4. Itabu ya 1Samweli na 2Samweli ilandi Samweli ejutamika na bambu nkolongu Sauli na bambu nkolongu Daudi. Samweli jabiya ndi kilongosi ja mwisu kipindi bandu buku Izilaeli pabanga'anambuka kuhuma mu kulongoswa na baatemu, nu kutumbuli kulongoswa na akabambu akolongu. Samweli jojakaninya mahuta Sauli na Daudi kuba akabambu akolongu abeli bukutumbuli ku Izilaeli. Itabu ya 1Samweli na 2Samweli ilandi majambu ga bandu bu nndema uku Izilaeli etamika kipindi hesi.
Nga mundu joamanyiki jojuandiki 1Samweli na 2Samweli. Jojuandiki ngasejililogwi mweni nkati ji itabu heyi, lakini kuwesikana jabii mwomi mu kipindi soti su ulongosi waka bambu nkolongu Daudi, pangi jahigali mwomi hata baada ju ulongosi hogu, na kabee jawesa kulinga nu kusoma makalatasi gangi gagalandi kutama kwaka Sauli na Samweli. Kulengana na hali heji jejiyongolota kutambuliswa mundu au bandu baandiki itabu heyi. Kabee ngasekumanyakini itabu heyi iandikwi lile.
Gagabii nkati
Kusaliwa nu kukemwa kwaka nndota Samweli mu utumisi waka Sapanga. Mulipungu 1-3
Kilandi namuna Apilisti ebajukua Lisanduku li Lilaganu laka Sapanga kuhuma kwa Aizilaeli na namuna elaleta mang'aliku Apilisti kipindi palabii mu musi wabu. Mulipungu la 4-7
Kilandi Aizilaeli ebapala kuba na bambu nkolongu wabu, kabee namuna Samweli eannzakaniya Sauli mahuta na namuna Sapanga eankana Sauli mwenikatai. Mulipungu la 8-15
Tusoma namuna Samweli eannzakaninya mahuta Daudi jubiya bambu nkolongu jwa pili juku Izilaeli na namuna Sauli ejalenga kunkoma Daudi mbaka pamwisu ukutama kwaki. Mulipungu 16-31.
Currently Selected:
1Samweli Ulongulelu: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.