1Samweli 18
18
1Sauli pajajomula kulonge na Daudi, Yonasani mwana waka Sauli ampai ngamaa Daudi, ampai kwa mwoju waki gwoa ngati ejilipai mweni. 2Kutumbuli lisoba heli, Sauli anzukua Daudi kujenda nnyumba jaki, na ngaseanzetaki kukelabuka kunyumba ja atati baki. 3Ndaba Yonasani ampai ngamaa Daudi ngati ejilipai mweni, jahenga naku malaganu, 4Yonasani jahula ingobu yejaweti kumpeke Daudi na hindu yaki yukukomane, hata upanga nu lupendi nu nkanda waki. 5Kwokapi Sauli koantuma Daudi, Daudi lihengu lokapi lebuntuma kuhenga jahenga sapi. Ndienu Sauli anhenga kuba kilongosi wa alonda baki. Lijambu heli laahenga bandu atoguliya mbaka atumisi baka Sauli.
Sauli ammbone wipu Daudi
6Alonda pababiya atenda kubuja kunyumba, pamu na Daudi baada jukunkoma Npilisti, akammbomba kuhuma kila musi guku Izilaeli bapita kujenda kunzopa bambu nkolongu Sauli. Akammbomba behaba babiya ajemba miambu jukutogule, koni ajemba imbelakete ni ilimba. 7Kabee babiya ahina nu kujemba miambu nukupengana ana,
“Sauli jukomiki maelupu,
na Daudi jukomiki makomi elupu.” 8Sauli ngasejalenganiwi na malobi gu nhwambu hogu, ndienu jayomiki ngamaa. Kupwaaga, “Ampeki Daudi makomi elupu, lakini nepani ammbeki maelupu pena. Sekihigalii ngiti ampekiya Daudi ubambu nkolongu.” 9Kutumbulii lisoba heli, Sauli jabiya ammbone wipu Daudi nukunndingali sa pambipi.
10Kilabu jaki, loho ji kihakau jejalekakiwi na Sapanga, apalapa junzingala Sauli, jabiya julopoka ngati mwana mangongu kunyumba jaki. Daudi jabiya juhona kilimba ngati ejabiya juhenga masoba goti. Sauli jabiya nu nkoa mu kuboku jaki, 11ndienu, anhomila Daudi nkoa mala pabeli jabiya juwasali ana, “Nammbana Daudi mu lumatu.” Lakini Daudi jatenda kujepa mala yoti ibeli.
12Sauli jabiya anzogopa Daudi ndaba Bambu Sapanga jabii pamu najombi, lakini Bambu Sapanga jabiya anndei Sauli. 13Ndienu Sauli ammboa Daudi kunyumba jaki nu unhenga jubiya kilongosi jwa alonda elupu jimu, najombi Daudi jaalongusa sapi mu kukomana. 14Kila sindu sejahenga Daudi jahenga sapi, ndaba Bambu Sapanga jabii pamu najombi. 15Sauli pajalinga Daudi jutenda kuwesa kila sindu, jaaendaliya kunnzogopa nakanopi. 16Lakini Bandu boti buku Izilaeli na Yuda bumpai ngamaa Daudi, ndaba jaalongusa sapi mu kukomana na kwaakelabuu sukuwesa.
Daudi anzukuu kamwali waka Sauli
17Sauli ampwagila Daudi, “Hajo ndi Melabu kamwali wangu nkolongu, nugupeke jubiya nhwanu waku ku mihilu haje. Gubiya gu nndonda wangu wogubii nganganganga na gogujoane, gukomana ngondu yaka Bambu Sapanga.” Sauli jabiya juholale ana kwi indela heji Apilisti baankoma Daudi, ili lihengu heli jalihenga mweni.
18Daudi ampwagila Sauli, “Nepani na nya hata bambu nkolongu jubia nkoanu wangu? Bandu bu lukolu lwangu ndi akanyane na hata bandu bu nyumba ja atati bangu ngaseamanyikana pa Izilaeli pani.” 19Ndienu pasahika kipindi saka Daudi bumpekiya Melabu, ndienu Melabu kamwali waka Sauli buntogulisa kwaka mundu jongi jobunkema Adilei juku musi uku Mehola.
20Hata hela, Mikali kamwali jongi waka Sauli ampai Daudi. Sauli eampwagila jatogulii ngamaa. 21Sauli jaholaliya, “Lenda numpekiya hajo ili jubiya ntegu kwaki.” Ndienu Sauli ampwagila Daudi mala ja pili, “Henu ngiti miya nu nkoanu waku.” 22Ndienu Sauli jaalagalakiya atumisi baki kupwaaga, “Longila kwa sili na Daudi kumpwaagi, ‘Bambu nkolongu gunndengani ngamaa, hata atumisi baki boti kabee bugupai.’ Ndienu jetakiya kuba gunkoanu wake.”
23Ndienu, atumisi baka Sauli bumpwagila Daudi malobi haga kwa sili, najombi jaapwagila, “Nepani na mundu nhagu ngamaa. Boo gunholale bambu nkolongu ndi juwesa kuba nkoanu wango leniheli le ndi lijambu lelijojwike?”
24Atumisi bala bunndandila Sauli ngati Daudi ejupwagiki. 25Sauli jaapwagila, “Mumpwagila Daudi ana, ‘Sejupala bambu nkolongu gupia ngati mali ili gunzukua kamwali waki ndi gumpekiya ngosi yukuseku jandu mia jimu yeyuye yewaasekula Apilisti, ili alepisa kisasi sa abaja baki.’” Hela ndi Sauli ejapanga kunkoma Apilisti. 26Atumisi bala babunndandila Daudi gajupala Sauli, Daudi jatogulii ngamaa kuba nkoanu waka bambu nkolongu. Kabula ji lisoba la ndoa, 27Daudi na bandu baki bajenda, kwaakoma Apilisti mia mbili nukujuku ngosi yukuseku jandu mbaka kwaka bambu nkolongu Sauli. Hapa bummbalangiya idadi joti ili bambu nkolongu jubia nkoanu waki Daudi. Ndienu Sauli ampekiya Daudi kamwali waki Mikali jubiya nhwanu waki.
28Lakini Sauli pajabona ana Bambu Sapanga jubii pamu na Daudi, na kamwali waki Mikali ampai ngamaa Daudi, 29Sauli jaendaliya kunzogopa Daudi. Sauli jabiya mbaja waka Daudi masoba goti gukutama kwaki.
30Alonda ba Apilisti bajenda kukomana ngondu na Aizilaeli, lakini kila ebakomana ngondu, Daudi jabiya jutenda kuwesa kupeta atumisi baka Sauli, ndienu liina laka Daudi jaendaliya kumanyikana nakanopi.
Currently Selected:
1Samweli 18: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
