1Samweli 13
13
Aizilaeli akomana na Apilisiti
1Sauli jabii na yaka selasini, pajabiya bambu nkolongu, jalongusa Izilaeli yaka alubaini ni mibeli. 2Sauli jaahagula alonda elupu itatu kuhuma pikilanda ja bandu buku Izilaeli. Alonda elupu ibeli jutamika naku jombi ku Mikimashi mwi itombi yuku Beteli. Nabombi alonda elupu jimu babiya pamu na Yonasani ku Gibea nndema uku Benjamini. Alonda bangi babahigali jaapwagila kila mundu jubuja kunyumba jaki.
3Yonasani jaashambulia ngomi ja Apilisti ku Geba na Apilisti bajoana majambu haga. Ndienu Sauli jaalagalakiya ajemba imbata nndema woti nu kutangasa, “Aebulania ajoana!” 4Ndienu Aizilaeli boti bajoana majambu kupwaaga, “Sauli jusambulii ngomi ja Apilisti, nahenu Apilisiti baasuki ngamaa, Aizilaeli baakema kujenda kujongana na Sauli ku Giligali.”
5Nabombi Apilisti bakusanyika ili kukomana na Aizilaeli koni abii na magali elupu itatu na alonda elupu sita babakwela maponda ni likundi la alonda baajenda kwa magolu bingi ngati nsangi ukujenda ku mbwani, boti bakwela panani nu kutama ku Mikimashi, upandi golipiti lyoba uku Beti Aveni.
6Aizilaeli boti ebalinga abii mu mang'aliku batumbuliya kujoba. Bangi bajoba mu makolu, bangi mu mabomba na bangi mu malibu na bangi mu matenge na bangi mwi iliba yanga na masi. 7Bangi baalombuka losi lwa Yoludani mbaka ku nndema uku Gadi nu nndema uku Gileadi.
Lakini Sauli jabiya jakona ku Giligali alonda boti babumpwatiki koni abagaja kwi kiholu. 8Sauli anndendila Samweli kwa masoba saba, ngati Samweli ejapwaaga. Lakini Samweli ngasejahiki ku Giligali na bandu batumbuliya kunndeka Sauli.
9Ndienu, Sauli jaapwagila bandu, “Netila matambiku ginu gukutini gala nu gulukwali.” Najombi jaapia matambiku gu kutini. 10Apalapa pajajomula pee kupia matambiku gukutini, Samweli jatenda kuhika. Sauli japita kunza kujenda kumpengana Samweli. 11Samweli anndalukiya, “Guhengiki kyane?”
Sauli anzibua, “Panabona alonda bangu atenda kuneka na wehapa ngaseguhiki kwa masoba gawapwagiki, na kabee panaabona Apilisti alipangiki kukomana ku Mikimashi, 12naholaliya ana Apilisti biika kushambulii ku Giligali. Kabee nabiya ngasembiiki litambi ili kunndoba Bambu Sapanga junyangatiya. Ndienu nabona ngasemii na sengi sukuhenga ndienu napalika kupia namweti matambiku gukutini.”
13Samweli anzibua Sauli, “Guhengiki ung'ang'a. Ngasewajetaki ejugulagalakiya Bambu Sapanga, Sapanga waku. Ana ukunzoani Bambu Sapanga jukuguhenga guendaliya kulongosa wehapa na bana baku ku Izilaeli. 14Lakini henu ubambu ukolongu waku ngagutamaki ndaba miilu jejugulagalakiya Bambu Sapanga ngase ujijetaki. Bambu Sapanga jutapwiti mundu jongi jojuwe jiitenda kunnzetake kwa mwoju woti, na hoju ndi joanhagwi kuba kilongosi jakwaalongosa bandu baki.”
15Samweli jaboka kuhuma ku Giligali nu kujenda ku Gibea mu nndema wi likabila la Benjamini.
Sauli pajaabalanga alonda bajabii naku, jabona abii alonda mia sita pena. 16Sauli na mwana waki Yonasani, pamu na alonda bajabii naku, batama kambi ku Gibea mu nndema wi likabila la Benjamini na Apilisti batami ku Mikimashi. 17Apilisti baboka mu likambi labu kujenda kwaashambuli babiya abii ikundi itatu. Kikundi simu sajenda ku Opula mu ndema waka Shuali. 18Kikundi sengi sajenda ku Beti Holoni ni kikundi sengi sajenda indela juku ligomba luku Seboimu, kujenda ku lukoba.
19Kipindi sehesi ngasejabii mundu jojuhugati mu nndema gwoa guku Izilaeli, ndaba Apilisiti bapangi kwapengale Aebulania ili bilenganake mipanga ni mikoa. 20Kila Nizilaeli japalika kwaajende Apilisti kuyola ligela lukuhutwa na ng'ombi au sulu au lipengu au kijipi sukuhusi. 21Aizilaeli babiya alepa ipandi ibeli ya Shekeli kuyola ligela na suluu. Na lupija lukuyole lipengu na magela yabiya kipandi simu sa shekeli. 22Ndienu lisoba heli mu ngondu ngasejwabii mundu jokapi jojabii nu upanga wala nkoa kati ja bandu buku Izilaeli ila pee Sauli na Yonasani jojabii mwana waki.
23Apilisti bapelika kikundi sa alonda kujenda kulenda pandu pukulobuke ku Mikimashi.
Currently Selected:
1Samweli 13: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
