Romapụ 7
7
Yaa Gboloma Ólóghó Ma
1Ịyẹa amịnáapụ, a dugho dọghụnyẹ ma ọmịnị akanyaḅobẹm tegó ọmịnị ólóghó ma nimim, ḅẹ́ ólóghó ma kụ́rọ nyánam tumḅọ dumafịnị sa gonyẹ́ gonyẹ́. 2Pa tọ́ma ḅụ, ólóghó ma deeyaa ọ́rụ́ḅọ pa a dee ḅụ kpọm, o dumafịnị sa gonyẹ́ gonyẹ́, kụ́ma ọ fịị n ḅẹḅẹ n pa nnị mmẹapụ fịna ólóghó ma ḅụ nnị a fiimamam. 3Anịsáa a mú jẹ́ owiḅọ na fịnịfịnị, deḅọ ma pa dumafịnị sa, nnị amadọghụḅọ pa a sịbẹm; kụ́ma ḅọ́rọ́ deeḅọ fịị nḅẹḅẹ́ a kpọwarị ólóghó ma ḅụ a fiimamam árị mịnị amadọghụḅọgha a ḅọ́rọ́ jẹ́ owiḅọ yaa yaa.
4Anịị anị pịghị ọ nana fịnị ḅara ị́yẹ́ amịnáapụ, anị ólóghó ma gboloma ḅara ḅụ ọmịnị so ọ fịịmam tegó ọmịnị ma anịị Krais ma oju bẹ gbẹ́rẹ́apụ; ọmịnị anị mị́sa n fịị ḅụ saghịma ḅọ ma nyẹẹ wa sọnyẹ sọ bẹ ḅara Tamuno ma fịrịkiri. 5Wamịnị ojumẹnị ḅụ duma kọ sa, ojumẹnị ma tarịarị siinyẹ, ólóghó ma timi saghị nyẹ, fịrịnwangịarị wámịna oju bie, fịị anị mịnanyẹ mamgba dighiḅọ nyẹ. 6Mị́sa, anị fịnị ḅara, ólóghó ma ḅárabie wa pághámaḅomam, tegó wa fịị parị ịkóli pa wa suanyẹ ma pịrịmam. Anịgosi wamịnị olom asọ ma duagha n gịẹ kóróma ólóghó ma bịpịsụ́ụ́ angaá, kụ́ma wamịnị ịwọ asọ ma duam Tẹ́mẹ́ ma bịpịsụ́ụ́ angaá.
Tamuno Ólóghó Ma Wámịna Sii Diepághámam
7Anịsa wa tẹ́ dugho bẹ, wa dugho bẹ ḅẹ́ ólóghó ma ibighaa? Ọkọfịnị nyẹ ofori! Kụ́ma ólóghó ma anị mịẹsị a sii pa sị nyẹ níminyẹ. Ḅọ́rọ́ ólóghó ma dughogha ḅẹ́, <<Jughonyẹ mọnịma,>> a nimibịghaa ḅẹ́ jụghọ nyẹ́mọ́ni ólóghó ma na kuragha. 8Kụ́ma anị ólóghó ma ḅụ ḅọ́rọ́ sii asọ dọghụ sị tọ́rụ́kịrịkị́rị́ ojumẹnị tarịarị kuragha nyẹ timi saghịmam ị́yẹ́ duma bie. Ólóghó ma ofori sii kụ́rọ nyanagha. 9Gbẹ́rẹ́sa biri a dumafịnịm na a ólóghó bịpị ma nimigha sáá, kụ́ma a ḅọ ólóghó ma nimiḅọ sa, sịị warị saghị kụ́rọ nyáná ịḅụ, 10anị ḅara ma a fịịm. A ḅo arịḅom ḅẹ́ duma akuodum ólóghó bịpị ma, tụ́ma fịị dighiḅọ i pịrịm. 11Sii warị ólóghó bịpị ma ḅụ ḅọ́rọ́ asọ arịị sị oḅori pa i sị warị pịghị ólóghó ma ḅụ ḅọ́rọ́ i ḅaá.
12Anịgo ólóghó ma ḅụgbọrụ tọ́ntọ́, ólóghó bịpị ma tọ́ntọ́, karakáram, pighi ibim. 13Kụ́ma mịma anị die ḅẹ́, ibinyẹ ma ị́yẹ́ fịị dighiḅom? Ọkọfịnịnyẹ ofori. Sịị anịị anị mịẹnyẹ, sii ibinyẹ ma pa fịị dighiḅọ i pịrịm, sị túminị́ anị karakárá fịnị ḅara árị bẹ ḅara. Anịgosi, ólóghó bịpị ma ḅụ ḅọ́rọ́, sii anị ḅụ diem anị sii láa ḅara.
14Wa nimim ḅẹ́ ólóghó ma tẹ́mẹ́ ḅụ imi; kụ́ma irị a Tẹ́mẹ́ ḅụ ofori, nnị pa sii dẹrị ómóniḅọ ḅara. 15A akanyaḅogha a mịẹarịnyẹ; tegó a mịẹ dọghụnyẹ a ine mịẹgha, kụ́ma a mịẹ dọghụgha nyẹ anịị a mịẹarịnyẹ. 16A a mịẹdoghugha nyẹ ma mịẹarị sa, anị dughoarị ḅẹ́ a minim ḅẹ́ ólóghó ma karakáram. 17Ịrị anịị mịnanyẹ ma mịẹarịḅọgha; tụ́ma ị́yẹ́ oju bie ngáarị sii ma. 18A nimim ḅẹ́ ibi ibiebẹ ngagha, anịị ị́yẹ́ duma bie. 19A mịẹ dọghụ ibi ma a ine mịẹgha, anịmanakaragha a mịẹ dọghụgha siinyẹ ma anịị a mịẹarịnyẹ. 20A ḅọ́rọ́ a mịẹ dọghụgha nyẹ ma mịẹmịẹ, anị dughoarị ḅẹ́ mịnị irịgha nyẹ ma mịẹarịḅọ; anịmanakaragha anị mịẹarịnyẹ anịị ị́yẹ́ duma bie ngáarị sii ma.
21Anịgo a arịḅom ḅẹ́ mịị ólóghó ma fịrị ḅụ imi: a ibinyẹ mịẹ dọghụ sa, siinyẹ anị torukudaarị nyẹ. 22Bẹ ị́yẹ́ duma bie Tamuno ólóghó ma koko i pụghọ tárịm. 23Kụ́ma a jẹ́ ólóghó arịm fịrịnwangịarị nyẹ ị́yẹ́ oju bie, owu pa ikúkúbie miniakị ólóghó ma pághámaarị nyẹ. Anị i mịẹm a ikólinaḅọ sọ pa sii ólóghó ma pịrịm, ị́yẹ́ oju bie fịrịnwangịarị nyẹ. 24Irị anịị bieḅẹlẹgha owitụ́wọ! Tụọ i dụaḅọ́rọ́ma bẹ, mịị fịị dighiḅọ i pịrịarị oju ma ḅụ? 25Imiẹḅa fịnị Tamuno pịrịị, i duaḅọ́rọ́maarịḅọ wámịna Nyánáḅọ Jizọs Krais ḅụ ḅọ́rọ́!
Anịgo mị́sa ịrị ịḅụgḅọrụ kúkúbie ngéré anị a pa ine Tamuno ólóghó ma koko bẹnyẹ, ị́yẹ́ ojumẹnị warị sii dighiḅoarị ólóghó ma koko.
Currently Selected:
Romapụ 7: IBY
Highlight
Share
Compare
Copy
Want to have your highlights saved across all your devices? Sign up or sign in
©2024 Luke Initiative for Scripture Translation
