Romapụ 4

Ebraham Minini Ḅụ Ḅọ́rọ́ Ḅẹ́rẹ́ Ḅárasighaḅọ Sọm

1Anịsa wa tẹ dugho bẹ Ebraham wámịna tádóḅọ gbolomanyẹ? Tẹ ọ ḅụ págháa. 2Ḅọ́rọ́ karakáráma Ebraham ḅẹ́rẹ́ ḅárasighaḅọ sọm ọ nwángị fịrị ḅụ ḅọ́rọ́, ọ pa bịpịkpọ bẹnyẹ nyánábẹm kụ́ma Tamuno ma tọ́rụ́kụ́ghaa. 3Tọ́ndiri ma dughom, <<Ebraham Tamuno mininim, ori Tamuno ma minini gosi Tamuno ori ákịm ḅẹ́ ori karakárá ibiamịẹnyẹḅọ.>> 4Fịrịnwangịapụ nnị n nwángị fịrị igbii pa n gbẹm, tumḅọ dughobịgha ḅẹ́ ọ́ n die nnị pịrịnyẹ; nnị fịrịnwangị anị pịrịm. 5Fịrịnwangịghaḅọ ma, kụ́ma Tamuno ma ḅụ tẹ́mẹ́ gbánáḅọ, siiamịẹnyẹ ḅọ mịẹsị n ḅọ ḅẹ́rẹ́ ḅarasighaḅọ sọọ, anị tumḅọ ma nnị ori ákịm sọ́ḅọ́rọ́ karakárá ibiamịẹnyẹḅọ ori minini ḅụ ḅọ́rọ́. 6Deviti anị gbẹ́rẹ́nyẹ ma dughom, ọ Tamuno karakárá ibiamịẹnyẹḅọ ḅara pa ákịḅọ ma bieḅẹlẹ dughoarị sa, n ḅọ fịrị pa kịẹbịpị suugha pa:

7Deviti dughom <<Karịiḅi fịnị

nnị nna irima nyẹ warịsó pịrịapụ,

nnị nna siiḅụḅárasi pịrịapụ.

8Karịiḅi fịnị

Kị́nị́nyánáḅọ ma nna sii pa

kịẹbịpị ḅụ suughaapụ ma pịrị.>>

9Deviti ḅẹ́rẹ́ ḅẹarị karịibima ma, anị fịnị tọ́ngọ̄ pẹ́lẹ́apụ ma ngéré pịrịị? Ọkọ fịnịgha! Anị pịghị fịnị tọ́ngọ̄ pẹ́lẹ́ghaapụ sọ pịrịm. Wa Tọ́ndiri ma dughonyẹ dughom, <<Ebraham Tamuno mininim, ori minini gosi Tamuno karakárá ibiamịẹnyẹḅọ ḅara pa ori ákịm.>> 10Mịma tẹ́ sa kiriakịị na nnị Ebraham tọ́ngọ̄ pẹ́lẹ́gha sa, anịgha nnị o tọ́ngọ̄ pẹ́lẹ́máa sáá! Anị kiriakịm na nnị ọ tọ́ngọ̄ pẹ́lẹ́gha sa, ọ tọ́ngọ̄ ma pẹ́lẹ́ma sagha. 11Ọḅụkụ́nọma nnị o tọ́ngọ̄ pẹ́lẹ́m, mịị tọ́ngọ̄ pẹ́lẹ́ma anịị pa ilíghíma sua die ḅẹ́, ori minini gosi Tamuno ori ákịm karakárá ibiamịẹnyẹḅọ ḅara, na nnị o tọ́ngọ̄ pẹ́lẹ́gha sa. Anịgo Ebraham anị Tamuno ḅụ mininiapụ mamgba daa, Tamuno pịghị nna ákịm karakárá ibiamịẹnyẹapụ ḅara, na nnị tọ́ngọ̄ pẹ́lẹ́gha n ḅẹ́sọ. 12Ori ma anị pịghị nnị tọ́ngọ̄ pẹ́lẹ́apụ ma daa, ḅẹgha ḅẹ́ nnị tọ́ngọ̄ pẹ́lẹ́m gosi, kụ́ma nnị wámịna daa Ebraham dua minini duma ma kọm, na nnị o tọ́ngọ̄ pẹ́lẹ́gha sa.

13Tamuno minini Ebraham na o furobie págháḅoapụ pịrị sa ḅẹ́ tuminikiri ma o nyẹ́ sọ́bẹm, ori ọkọ mịẹm ḅẹgha ḅẹ́ Ebraham ólóghó ma kokom, kụ́ma o mininim Tamuno warị karakárá ibiamịẹnyẹḅọ ḅara pa ori ákị. 14Ḅọ́rọ́ Tamuno minini nyẹ́ ma n pa ólóghó ma kokoapụ pịrịm, anịsa minini bẹnyẹ bẹnyẹ ḅụ ofori, Tamuno ma minini nyẹ́ ma pịghị sọnyẹ ḅụ oforibịgha. 15Ólóghó ma Tamuno igani dighi kórómaarị; kụ́ma ólóghó ma ófórigha angaá, ologho kóró so ofori.

16Mịma go mini pịrịnyẹ́ ma minini ḅụ saghịḅom, túminị́ árị bẹ ḅara ḅẹ́ mini pịrịnyẹ́ ma anịị Tamuno ḅara saghị ḅo diepịrịnyẹ, ọmịnị pa Ebraham furobie págháḅoapụ mamgba pịrịm, ólóghó ma kokoapụ ngéréghaa, kụ́ma Ebraham minini ḅara pa mininiapụ. Tegó Ebraham anịị wamịnị kị́nị́mamgba daa. 17Tọ́ndiri ma dugho ḅara, <<A ị pa tọgha tọgha sẹ daḅọ mịẹmam.>> Ori anịị wámịna daa, Tamuno ma tórúku, ọ ḅụ mininiḅọ, fịịḅọ mịẹsị n ḅọ dumaḅọ sọ, ḅẹnyẹ ḅẹnyẹ ófórigha ngá ḅụ nyẹ tẹ́mẹ́ pághámaḅoḅọ.

18Ebraham mininim pịghị tọ́rụ́ dighinyẹ nyáná, ọ pa ḅara ọlọ sị tọ́rụ́ dighinyẹ nyáná bẹnyẹ ofori so, anị ḅụ ḅọ́rọ́ tọgha tọgha sẹ daḅọ sọọ. Tọ́ndiri ma dugho ḅara, <<Lolia ma bii ḅara anịị ị furobie págháḅoapụ bii bẹ ḅara.>> 19Anịsa ma, kálányẹ kọm ori kụ́rá sọ́nọ́ a si láa, ori minini pa kụ́rọ bịpị múm, ọ pịghị ḅo árị sa ḅẹ́ ori oju fịịfịịḅara fịnịm, táaḅọ Sira so ine fura awọ yiigha. 20Tamuno mini ọ pịrịnyẹ́ ma ḅụ, ori minini anị ḅụ jighegha, ori minini ịnyọ pa ọ ḅụ suam sị o boma pa Tamuno pịrịm. 21Ori ibima nimitẹ́lẹ́mam ḅẹ́ Tamuno kụrọ nyáná pa o minini nyẹ́ ma mịẹbẹm. 22Anịị, <<Tamuno go Ebraham ákị nyẹ karakárá ibiamịẹnyẹḅọ ḅara ori minini ḅụ ḅọ́rọ́.>> 23Nnị gịẹ kóróma ẹ́gẹ́rẹ́ ḅẹ́, <<Karakárá ibiamịẹnyẹḅọ pa ori ákịm,>> nnị gịẹ pa ori ngéré pịrịgha. 24Nnị gịẹ pa wamịnị sọ pịrịm Tamuno ákị bẹapụ ḅẹ́ wamịnị karakárá ibiamịẹnyẹapụ. Wa Tamuno ma ḅụ mininim wámịna Nyánáḅọ Jizọs saghịma ḅọ fịị ḅụ. 25Wámịna sii gosi nnị ọ saghị fịị ḅarabie suam warị pịghị duma ḅụ ọ saghịma, sị ọ wa pa Tamuno na karakárá ḅụ warị bẹ ḅara.

Currently Selected:

Romapụ 4: IBY

Highlight

Compare

Copy