Romapụ 15

Jẹ́apụ Mịẹ Nnị Bieḅẹlẹ Ịḅụ Ngéréghaa

1Wamịnị kụ́rọ sẹapụ wámịna minini ḅụ ḅárásua nna minini kụrọghaapụ ma pịrị na ibim sị nna ikúnyẹ ma dighi. Wamịnị wámịna bie ngéré mịẹ ḅẹ́lẹ́mabịgha. 2Ọ́rụ́ḅọ ọ́rụ́ḅọ amịna mị́naḅọ tẹ́mẹ́ miẹḅẹ́lẹ́ma bẹnyẹ mịẹ nna ibi ḅụ, mịẹsị n sẹ́nịbẹnyẹ minini ḅụ. 3Krais ọ ḅụ go ọ mịẹnyẹ mịẹgha o bieḅẹlẹ bẹ ḅará, anịmanakaragha, n gịẹ kóróma ḅara Tọ́ndiri ma bie, <<O wiriapụ ma pa o wiri wirinumo ma ịḅụ ọgọnọ saramam.>> 4Ḅọ́rọ́maa sa n gịẹnyẹ ma gonyẹ́ gonyẹ́, n gịẹm pa nyẹ pa wa die bẹ ḅara, sị wamịnị tọ́ndiri ma bie saghị ḅo inema na tẹ́mẹ́kụ́rọ, wamịnị ine tọ́rụ́ dighinyẹ nyáná bẹ ḅara. 5A Tamuno ma tẹ́ghẹ́arị ingịrịma na tẹ́mẹ́kụrọ ḅára saghị ḅoarịḅọ mịẹsị ọ gbẹ́rẹ́ bịpịfie ọ Krais Jizọs ma duarị ḅara, 6sị ọmịnị ine gbẹ́rẹ́ tẹ́mẹ́bie na gbẹ́rẹ́ pụghọ pa Tamuno ma túminị́, wámịna Nyánáḅọ Jizọs Krais Daá ma.

7Ọ jụghọ jụghọ daakị, Krais ma sọ anịsa ọ daákịmaá ḅara sị túminị́ Tamuno ma túmíní. 8A dugho ọ pịrịm ḅẹẹ, Krais o Juuapụ ómóniḅọ dighimam Tamuno karakáráma ḅụ, pa die ḅẹẹ, o minini nna tádọ́apụ ma pịrịnyẹ ori anị mịẹbẹm. 9Juughaapụ ma Tamuno ma túmíní bẹ ḅara ori lolomakúkúbie gosi, Tọ́ndiri ma bie n gịẹ ḅara:

<<Anịgosi a ị túmíníbẹm

Juughaapụ ma ogbobie;

A núme suu pa

ị́yẹ́ ẹ́rẹ́ túmíníbẹm.>>

10Anị pịghị jẹ́ pa dughom,

<<Ọmịnị Juughaapụ,

ọmịnị Tamuno túminị́ na dụrụkụụ.>>

11Pịghị jẹ́,

<<Kị́nị́nyánáḅọ ma túmíní

ọmịnị Juughaapụ mamgba,

si pịghị núme suu o túmíní,

ọmịnị sẹ gonyẹ́ gonyẹ́.>>

12Aizaya pịghị jẹ́ pa dughom,

<<Jesi furotụ́wọ págháḅobẹm,

Saghị sị sẹ gonyẹ́ gonyẹ́

ma taá bẹḅọ;

Juughaapụ ma ọ ḅụ tẹ́mẹ́ gbánabẹm.>>

13A tẹ́ghẹ̄arị ḅẹ́, Tamuno ma, tọ́rụ́dighi nyẹ ḅara saghị ḅoḅọ opu bieḅẹlẹ na diin pa ọ pịrị, ọmịnị ọ ḅụ nyáná minini ḅụ ḅọ́rọ́ sị ọmịna tọ́rụ́ dighinyẹ sẹnị tórúku tórúku mú Tọ́ntọ́ Tẹ́mẹ́ ma kụrọ ḅụ.

Pọl Go Ọ Gịẹnyẹ Ma Gịẹnyẹ

14I jẹa minini mịnaapụ, ịrị ịḅụgḅọrụ mininim ḅẹ́ ọmịnị opuma ibim, ọ pịghị níminyẹ gonyẹ́ gonyẹ́ nyanam, ọ pịghị ine nyẹ pa jụghọ jụghọ diebẹm. 15Mịị diri ma bie a ḅáláfaghaa ḅara pa jẹa ẹ́gẹ́rẹ́ sịbị kọmam, pa sima anị pa ọmịna biekóróma. Tamuno nyáná i pịrị tọ́rụ́kụrụkụ́rụ́ gosi, a ḅáláfá nyánágha 16ḅẹ́ a Krais Jizọs fịrịnwangịḅọ sọọ Juughaapụ ma pịrị sị Tamuno ma igwagwaḅọ ḅara a Tamuno ma ibi oku dugho wásámaarị, Juughaapụ ma warị ḅo Tamuno daakị bẹ agba sọ, Tọ́ntọ́ Tẹ́mẹ́ fófóoma ọ pịrịnyẹ.

17A Krais Jizọs na gbẹ́rẹ́ḅụ ḅụ fịnị ḅara ma, a ine bịpịkpọ ị́yẹ́ Tamuno fịrị ma pịrịm. 18A bịpị findi jẹ́nyẹ gobịgha, kụ́ma Krais i pa nwángịmáa fịrị ngéré gbólómanyẹ anịị a dugho bẹnyẹ, anịị asọ pa Juughaapụ ma die ḅẹ́ nnị Tamuno ma osii. A mịma mịẹmam ẹ́gẹ́rẹ́ ḅụ na pịghị fịrị ḅara ḅụ, 19kụ́rọ ilíghíma na ḅụ́gbérépuma fịrị, Tọ́ntọ́ Tẹ́mẹ́ ma kụ́rọ ḅụ ḅọ́rọ́. Jerusalem ákị mú Ilirikum párángáa mamgba láa, a bii ḅara pa Krais ma ibi oku ma dugho wásámāmam. 20I pụghọ tarị sị a mịẹ dọghụnyẹ anịị ibi oku ma dugho wásáma jẹ́ éné na nnị Krais gbolomanyẹ naagha angaá, sị a jụghọ súghúise angaá námabịgha ḅara. 21Tọ́ndiri ma bie n gịẹ kóróma ḅara:

<<Nnị o gbolomanyẹ

dugho pịrịghaapụ árịbẹm,

na o gbolomanyẹ

naaghaapụ akanyaḅobẹm.>>

22Anịgosi, tọgha sa nnị i kikimam sị a ọ damaḅo ma.

Pọl Tọm Ḅẹ́ O Rom Muu

23Kụ́ma mị́sa a ị́yẹ́ fịrị nwangisómaá ḅara ma mịị párángáa, a pịghị ḅọ́rọ́maa tọgha kụ́rá ḅụ dọghụmam ḅẹ́ a ḅo ọmịna arịị 24mị́sa a ọkọ mịẹbẹm. A dọghụbẹm a ọmịnị arịị a ḅọ́rọ́ ḅọ́rọ́ Spaini múuarị sa, a pịghị dọghụbẹm ọ ḅárásua ị pịrị sị a ine mú anị ngá ma láa, mịma anịị a kálá sa pa ọmịnị na fịnị fama sa. 25Mịị gbẹ́rẹ́kiri anị fịnị ḅara, a Jerusalem muarị si a ḅárásua akuoo Tamuno túminị́ ma pịrịbẹ ḅara anị ngá. 26Masidoniya na Akaya bie fịnị sọsị ma bieḅẹlẹ ḅụ nyẹ ósó pa ḅárásua Jerusalem bie fịnị sị minini igonyiapụ ma pịrịm. 27Nnị bieḅẹlẹ ḅụụ anị mịẹm, anịị nnị nna ḅara ọlọ sa. Ḅọ́rọ́ Juughaapụ ma Juuapụ ma tẹ́mẹ́ju karịibima ma ḅụ diekiri nyanam, nnị Juuapụ nna ḅara sa ọlọm sị nna tuminikiri ngọ pa nnị na die. 28Mịị fịrị ma i ḅara faá sa a pịghị n sịbị go daa ḅo igbii ma saghị n ḅárabie sua fama sa, a ḅọ́rọ́ ḅọ́rọ́ Spaini mubẹm sị agbā túlúma o dighi. 29A nimim ḅẹ́ a ḅo ọ fịnịnga láa sa a bifụfụ Krais karịibima na ḅobẹm.

30Mịnaapụ, a wámịna Nyánáḅọ Jizọs Krais ẹ́rẹ́ na pịghị Tẹ́mẹ́ ma pịrịarị ḅẹlẹma pa ọ tẹ́ghẹm: ḅẹ́ ọ ḅárásua sị Tamuno tẹ́ghẹ̄ kụrọma i sịbị go. 31Ọ tẹ́ghẹ̄ ḅẹ́ ori i dụaḅọ́rọ́ma mininighaapụ ma ḅárabie Judiya bie, ḅẹẹ, Tamuno túminị́ Jerusalem ḅụ fịnịapụ ma a akuoo ḅárásua ma daákịbẹm. 32Mịma gosi, a opu bieḅẹlẹ ḅụ ọ dámáḅobẹm, ḅọ́rọ́ anị Tamuno ma ḅụ ḅẹlẹḅẹlẹ, i bieḅẹlẹ bẹ ḅara sị ịnyọ́sárá. 33A tẹ́ghẹ̄m ḅẹ Tamuno, diin pa wa pịrịarịḅọ ọmịnị kị́nị́mamgba na fịnịị. Anị ọkọ fịnị.

Currently Selected:

Romapụ 15: IBY

Highlight

Compare

Copy