Romapụ 13

Túminị́ Táarịapụ Ma Bịpị Pughu

1Fịnịḅọ fịnịḅọ táarịapụ ma bịpị pughu, tegó gbẹ́rẹ́ḅọ sọ ine taá kụrọ ma nyánábịgha ḅọ́rọ́ Tamuno anị pa n ḅọ pịrịgha, pịghị mị́sa táarịapụ ma Tamuno anịị nnị pa anị kiri ma ḅụ kóróma ḅọ. 2Anịgosi táarị kụrọ ma osigha ḅọ gonyẹ́ gonyẹ́, Tamuno tọ kórómanyẹ osigha, ọkọ mịẹḅọ Tamuno ḅẹ́rẹ́kọ akuoo n ḅọ ḅụ pịrịarị. 3Táarịapụ ḅáláfanyẹ́ dighi karakárányẹ ma mịẹarịapụ pịrịgha, kụ́ma irima nyẹ ma mịẹarịapụ. Ị dọghụ ḅẹẹ, ị ịḅụ fọ́nyá pághámaḅo táarịḅọ ma ḅáláfa ḅarabie? Anịsa karakárányẹ ma mịẹ, n pịghị ị túmíníbẹm. 4Tegó nnị ma anịị Tamuno fịrịnwangịapụ ị́yẹ́ ibi go. Kụ́ma ị siinyẹ mịẹmịẹ á tegó nnị papa áláápụ́-ágidi ma dighigha. Nnị anịị Tamuno fịrịnwangịapụ siiamịẹnyẹ mịẹapụ pa tọ́rụ́siarịma. 5Anịgo anị ḅụ́gbẹm ị ḅụsímínímá táarịapụ ma pịrị, Tamuno ma ḅara saghị ḅo bẹ tọ́rụ́siarị ngéréghaa kụ́ma ị kúkúbie ịḅụ na ḅẹ́rẹ́kọ gosi.

6Mịma go anịị o go ósó igbii gbẹ́ẹ́arị nyẹ, tegó táarịapụ ma nnị anịị Tamuno fịrịnwangịapụ, nna sa mamgba pa taa fịrị ma pịrịmáapụ. 7Ọ́rụ́ḅọ ọ́rụ́ḅọ ḅara ịrị ọlọnyẹ gbẹ́ẹ̄; ị ḅárákū ósó igbii na ị́yẹ́ ngọ ósó igbii gbẹ́ẹ̄, osigha na kuu pa nnị kị́nị́mamgba pịrị.

Túminị́ Jụghọ Jụghọ Na Ngá Bẹ Ḅara

8Gbẹ́rẹ́ḅọ ḅara sọ sáá ọlọ ma, ọmịnị ọlọ sáá anịị jụghọ jụghọ ḅẹlẹma toruku mú. Jẹ́apụ ḅẹlẹmaapụ gonyẹ́ gonyẹ́ ólóghó ma dughonyẹ mịẹmam. 9Ólóghó bịpị ma, dughonyẹ ḅẹ́, <<Amadọghụ ma, Kị́nị́ ḅáama, Fúrúma, Jụghọ nyẹ mọnịma,>> mịị mamgba na pịghị jẹ́ jẹ́ na n pa sua gbolomam mịị gbẹ́rẹ́ ólóghó bịpị ma ḅụ, <<Ị jẹa tumḅọ ḅẹlẹma ịrị ịḅụ ḅẹlẹma ḅara.>> 10I ḅọ́rọ́ kị́nị́ ḅẹlẹma jẹ́ ene jẹ́ ene ị siinyẹ pa n ḅọ mịẹbịgha, kị́nị́ ḅẹ́lẹ́maarị ḅọ, ólóghó mamgba kokomam.

11Ọ mịma mịẹnyanam, tegó ọ nimim ḅẹẹ, sa ma láamam ọ múno ḅụ saghị, tegó wámịna dụaḅọ́rọ́ma anị kikiaḅaá wa parị minini sa nẹngịm. 12Díi ma ḅọlọ ju lámam, énéḅa ḅárákúu imi, anịgo o ḅo wa kánákáná fịrị ma pa angaá ḅọ́rọ́ma sị warị baá ọ́mụ́gbinyẹ ma ákị sua. 13O ḅo wa karakárá ḅara pa wámịna duma kọọ, éné bie baá ḅụ duma kọọarịapụ ḅara, fị na ḅụ na ḅugha anịgha iru ḅụ tọ́rụ́ḅáma, sẹfị duma anịgha yáakuu ḅụ ófórigha nwángị, bịpị ogbosogha na tọ́rụ́akụ, 14Tụ́ma bịtẹ sua ḅara Kị́nị́nyánáḅọ Jizọs Krais ma sua si mịnị sịbịbie kiẹma ị ḅara warị ojumẹnị ma biiarị siinyẹ pa anị pịrịbẹ ḅara.

Currently Selected:

Romapụ 13: IBY

Highlight

Compare

Copy