Puu Findi 20

Jizọs Kụ́rá Mmẹẹ́ Ndẹ́ẹ Oyia Si Findi Pa Taám

1Anịsáa a sookumuḅọ arịm sobie sághị kóróḅoarịḅọ, ọ ḅárabie ori sughu nyánágha póghóló kiri ma igodo findinyẹ ọlọm na pịghị iku ikólina nyẹ. 2Ọ ḅụọ nyáná ódódó ma kuum, olom sáá ódódó ma anị́ị́ ẹ́kpẹ́dua ma anịgha Satanị. Warị ịkóli suanyẹ pa o sua, kụ́rá mmẹẹ́ a ndẹ́ẹ oyia si findi. 3Sookumuḅọ ma o gbi pa sughu nyánágha póghóló kiri ma bie suam ori ikasii pịghị ọ gbẹpalị, sị ọmịnị ine jẹ́ pa oḅori pa sẹ ma sịbịgha ḅara; ákị muu kụ́rá mmẹẹ́ a ndẹ́ẹ oyia si findi ma kara sáá láa. Anịsáa nnị ọ fị́ma ḅẹm kálá satuo ḅụ.

4Anịsáa a tọgha imine arịm, anị ọ́gọ́nọ kpọrọfịnịapụ nnị kụrọ pa n pịrịm ḅẹẹ nnị ḅẹ́rẹ́kọọ. A pịghị n sịbị pẹ́lẹ́apụ ma biebẹ duma arịm ḅẹẹ nnị Jizọs diepágháma karakárá ma na Tamuno ẹ́gẹ́rẹ́ ma dugho wásámam. Na nnị susi ḅáláfama nama ma pịrịgha anịgha n tẹ́mẹ́ sị pa anị pa biekóróma bẹnyẹ, anịgha anị ilíghíma nyáná nna fụ́ḅára ogbo anịgha nna ḅara. Nnị pịghị ḅoo dumam sị Krais na taa ámányánáapụ ḅara kụ́rá a mmẹẹ́ ndẹ́ẹ oyia si findi. 5(Mịnaapu ma sima, isi fịịapụ mamgba fịị ḅụ sághịgha ákị muu kụ́rá a mmẹẹ́ ndẹ́ẹ oyia si findi ma kara sáá láa.) Mịma anịị parị fịị ḅụ sághị ma. 6Karịiḅi na tọ́ntọ́ fịnị parị fịị ḅụ sághị ma bie sọapụ pịrịm, Mmẹẹ́ kárámá fịị ma nna ḅụ kụ́rọ nyanagha; nnị Tamuno na Krais igwagwaapụ sọbẹm, nnị pịghị ori na taábẹm kụ́rá a ndẹ́ẹ oyia si findi.

Satanị Sọ́ḅa

7Kụ́rá a ndẹ́ẹ oyia si findi ma ḅọ́rọ́fáma sáá, nnị Satanị ma fímabẹm ori ikóliwarịbie, 8ọ pịghị pághábẹm sị muu oḅori pa tuminikiri gbọrụ ḅụ n gálágáláma sẹ ma sịị, mịná sẹ ma anịị Gọgu na Magọgu. Satanị nnị kị́nị́mamgba akuoo kobiri pa ọ́mụ́gbi ḅoobẹm. Nna kịẹbịpị sọ́ḅọ́rọ́ posie aka fịnị onwo. 9Nnị tuminikiri ma nwángị ikélémam na pịghị Tamuno ḅẹlẹma opu ama ma. Kụ́ma fịnị sághị sobie kóróḅom sị n dọ́ghụ́ma. 10Anịsáa oḅori pa n sị ẹ́kpẹ́dua ma nnị ọ pa ọpọlịḅuruma pa dọghụarị kọrịfịnị ésiḅe bie gbi suam, n ḅáláfama nama ma na iruo ikiakoroapụ ma gbi suamaa ngaa, nnị n pa tọ́rụ́siarịmabẹm dii na ḅáa na ákị muu ḅẹsá ḅẹsá láa.

Kunema Ḅẹ́rẹ́kọọ

11Anịsáa a ḅoo opuma dụḅa pị́na imine arịm na pịghị anị ọ́gọ́nọ kpọrọfị́nị́ḅọ. Tuminikiri na so na mangịm ọ fịnị angaá n pịghị mịnị jẹ́ pa fịnịngaa nyanagha. 12A pịghị fịịapụ ma arịm, duḅaapụ na káláapụ na sẹ́fịnịarị imine ma tórúku. Nnị tọgha diri findim anịsáa n pịghị jẹ́ diri findim, duma diri. Fịịapụ ma nnị n sịbị ḅẹ́rẹ́kọm n mịẹmáa nyẹ ḅụ ḅọ́rọ́ diri mamgbabie n gịẹ kóróma ḅara. 13Anịsáa tọ́rụ́ ma anị bie fịnị fịịapụ mamgba pághámaḅom, fịị na duaama nna bie fịnị fịịapụ mamgba pághámaḅom. Nnị nnị kị́nị́mamgba sịbị ḅẹ́rẹ́kọm nnị mịẹ maá nyẹ ḅụ ḅọ́rọ́. 14Anịsáa fịị na duaama ma nnị n gbi pa kọrịfịnị ésiḅe ma ḅụ gbi suam (Mịị kọrịfịnị ésiḅe ma anịị mmẹẹ́ kárámá fịị ma). 15Nnị nna ẹrẹ gịẹghaapụ dumaapụ ma diri bie nnị n pa kọrịfịnị ésiḅe ma ḅụ gbi suam.

Currently Selected:

Puu Findi 20: IBY

Highlight

Copy

Compare