Hiburuapụ 3

Jizọs Mosis Nẹngịm

1Anịgo ị́yẹ́ tọ́ntọ́ mịnaapụ, Tamuno pịghị ọ ḅara na sịapụ, o Jizọs gboloma kóróma ngéré nyáná nnị nfịrịmaḅọ pa sịḅọ pịghị Tamuno igwagwaá áláḅọ. 2Ọ sẹ́ kụ́rọ Tamuno pịrịm, ọ sẹlẹakịḅọ ḅẹ́ ọ mị fịrị ma nwángịị, Mosis sọ sẹ kụ́rọ ḅara Tamunowarị ma bie. 3Kụ́ma Jizọs dụḅaḅá kuu nyáná Mosis nẹngịm, wárị namaḅọ ma dụḅaḅá kuu nyáná wárị ma nẹ́ngị ḅara. 4Wárị gonyẹ́ gonyẹ́ tumḅọ anịị anị nama nama ḅọ. Kụ́ma Tamuno anịị nyẹ gonyẹ́ gonyẹ́ namaḅọ 5Mosis Tamuno fịrịnwangịḅọ ḅara, ọ sẹ́ kụrọm Tamuno wárị ma bie ọ pịghị dugho túminị́ ma pịrịm Tamuno tórúku dugho ḅẹnyẹ gbolomanyẹ. 6Kụ́ma Krais Tamuno Tụ́wọ, ọ sẹ kụrọm Tamuno wárị ma bie, ori anịị sịbịdáḅọ, wamịnị anịị wárị ma, wa ḅọ́rọ́ wámịna biekpọ na tẹ́mẹ́kụ́rọ ọlọsẹma nḅẹḅẹ́, wa pa ine bịpịkpọ ḅẹnyẹ.

Birinụ́nụ́ Mininigha Go

7Anịgo Tọ́ntọ́ Tẹ́mẹ́ ma dugho ḅara ḅẹ́:

<<Mịmgba, ọ ḅọ́rọ́

Tamuno pụghọ náa nḅẹḅẹ́,

8Ọ kụ́rọ kúkúbie suama

ọ kụ́rọ kúkúbie sua ḅara

ọ Tamuno bịpị pughughaa sa,

ọmịna daádighi sa elesiri ma ḅụ.

9Anị angaá ọmịna tádọ́apụ

ḅara pa i tọ́rụ́ tọmam,

nnị i daádighim

nnị amịẹnyẹ mamgba árị sọ

kụ́rá mmẹsi findi ma ḅụ.

10Anịị a goo anị ḅụ́ọ́apụ

ma dighi igani nyẹ,

sị ḅẹ́,

<Mịnaapụ ma mịnị ị́yẹ́ asọ ma duagha,

n pịghị mịnị ị́yẹ́ ólóghó

ma kokogha.>

11Anịgo a ọḅọọ fịịm

ị́yẹ́ igani ḅụ ḅẹ́,

<Nnị ị́yẹ́ ịnyọ́sárá yọ

ma sọbịghaa.> >>

12I jẹa mininiapụ, ọ ḅụ ẹḅịị sị ọmịna bie gbẹ́rẹ́ḅọ sọ mininigha sị kúkúbie nyánábịgha ḅara sị n ḅọ ọḅụ pa dumafịnị Tamuno ma gbiibiegha ḅara. 13Anịmanakaragha ọmịnị ịnyọ pa jụghọ jụghọ ḅụ sua éné gbọrụ. Anịị nnị pa <<Mịmgba éné>> sị nyẹ gonyẹ́ gonyẹ́ sị sii oḅori pa kị́nị́ sị mịẹbịgha ḅara sị wa kụ́rọ kúkúbie sua. 14Wa ḅo Krais bie diekiri nyánámam, wa ḅọ́rọ́ wámịna tarị minini ma ọlọ kụrọma mú kunema ma láa. 15Mịị anị Tọ́ndiri ma dughonyẹ:

<<Mịmgba ọ ḅọ́rọ́

Tamuno pụghọ náa nḅẹḅẹ́,

ọmịnị kụ́rọ kúkúbie suama

o kụ́rọ kúkúbie sua ḅara ọ

Tamuno bịpị pughugha sáá.>>

16Tẹ́apụ Tamuno ẹ́gẹ́rẹ́ ma náa, sị mịnị anị pughugha? Mosis Ijipiti bie taa págháapụ ma, n niigha? 17Tẹ́apụ kụ́rá mmẹsi pa Tamuno iganima? Siinyẹ mịẹsị fịịapụmagha elesiri ma ḅụ? 18Tamuno ọ tẹ́apụ ḅẹ́ ḅẹẹ nnị jẹ́ éné jẹ́ éné ọrẹ ịnyọ́sárá yọ sọbịgha osigha pa ọ pịrịghaapụ ma nnigha? 19Anịgo, wamịnị arịm ḅẹẹ nnị ine ori ịnyọ́sárá sọgha n minini nyanagha gosi.

Currently Selected:

Hiburuapụ 3: IBY

Highlight

Copy

Compare