Hiburuapụ 13

Kunema Againma

1Ọ jụghọ jụghọ ḅẹlẹma bịpịmú Krais asọ duaarịapụ ḅara. 2O biekóróma igoniapụ daasu ọmịna wárịbie. Jẹ́apụ imi ọkọ mịẹapụ warị anị ḅụ ḅọ́rọ́ sookumuapụ daa wárị su nimigha pa. 3Ikólibie fịnịapụ pa biekóróma, sọ́ḅọ́rọ́ ọmịnị na nnị na ikólibie ma ḅụ imii, ọ tọ́rụ́siarịarịapụ ma pa biekóróma sọ́ḅọ́rọ́ ọmịnị na nnị na tọ́rụ́siarị ma árịarị. 4Ẹ́rẹ́yáa anị kị́nị́mamgba opu osigha pa pịrị na ibinyẹ, deeapụ na taapụ na jụghọ jụghọ ḅụ minini na ibim, Tamuno ḅẹ́rẹ́kọbẹm ama dọghụapụ ma sịbị na pịghị yáakuu ḅụ ofori nwángị kọ́arịapụ ma sịbị. 5Ọ mịnị ọmịna duma fófóoma igbii ḅẹlẹma ḅụ, ọnyana nyẹ ọ tọ́rụ́ bi, Tamuno kọkọ ḅẹ́,

<<A jéné n jéné ọ warịsobịgha

a pịghị jéné n jéné ọ pa ọḅụ gbibịgha.>>

6Wamịnị anịsa kụrọ tọ́rụ́ nyáná sị dughobẹm,

<<Kị́nị́nyánáḅọ ma anị ị́yẹ́ ḅárásuaḅọ, i ḅáláfabịghaa.

Tumḅọ ine tẹ́ pa i mịẹbẹ?>>

7Ọmịnị ọmịna ḅọ́rọ́maa sịḅidaapụ pa biekóróma, Tamuno ẹ́gẹ́rẹ́ ma kọọ ọ pịrịapụ, okórómaḅo, n ḅárá warị duma kọ ḅara na pịghị n fịị ḅara sị nna minini daa nyẹ mịẹ. 8Jizọs Krais anị biaéné ḅọ ma mịmgba éné ḅọ pịghị mú ḅẹsá ḅẹsá la.

9O minima tọ́rụ́kịrịkị́rị́ dienyẹ ọ daa irima karakárá asọ ma ḅụ. Anị ibim ḅẹẹ tumḅọ biebẹ ịnyọ nyáná ḅo Tamuno tọ́rụ́kụrụkụ́rụ́ ḅụ, mịnị saghị fị́nyẹ ólóghó kokogha, ọmịna bie mị ólóghó ma kokoapụ, mị ólóghó ma so ḅárásua n pịrịgha. 10Igwagwaapụ ma Tamuno wárị ma bie fịrịnwangịarị ḅo ma kụrọ nyanagha sị ẹ́bẹ ma ọgọ́nọ́ fịnị gbẹ́rẹ́nyẹ sọ fịị.

11Juuapụ Opu Igwagwaḅọ ma nama pulo ma akuoo opu tọ́ntọ́ yọ ma ḅo si, anị pa igwagwaá sii pịrị, kụ́ma nama ma ojumẹnị ma nụ́ngọbie nnị anị dọghụmam. 12Mịma go, Jizọs sọ ama bie fịịgha, ori ine ori ọmbịnyẹ́ pa n sịrị si bẹ ḅara nna sii ḅụ. 13Anịgo, wamịnị o dama mú nụ́ngọbie ma ḅụ sị ọ́ nana ḅụ́gịrịrị ma daa. 14Bẹ mị tuminikiri wa fịnị gbámásó bẹ ama ofori, wa tọ́rụ́ pa ḅoarị ámá ma dighiarị.

15Anịgo wa sámámgba túminí igwagwaá pa Tamuno pịrị Jizọs ẹrẹ ḅụ. Mịma anịị wa dugho págháma igwaa ḅẹẹ Jizọs anịị Kị́nị́nyánáḅọ. 16O bieḅárámá ma ibi mịẹsị pịghị ḅárásua jụghọ jụghọ pịrị, tegó, mị Tamuno tẹ́mẹ́ ḅẹ́lẹ́maarị igwaa.

17Ọmịnị ọmịna sịbịdaapụ osii, pịghị n dughonyẹ mịẹ. Nnị ọmịna tẹ́mẹ́ kúruarị ịnyọsáragha pa, n pịghị dugho Tamuno pịrịbẹ ḅara n ḅárá warị o didighi ḅara. Ọ ḅọ́rọ́ nnị osisii, n bieḅẹlẹ ḅara pa nna fịrị nwángịbẹm, anịgha n sitẹ́mẹ́ pa nna fịrị nwángịbẹm. Anịma sọ́nyẹ sọọ ọ pịrịbịgha.

18Ọ pa tẹ́ghẹ̄ wa pịrị. Wa nimim ḅẹẹ wa fíafía tẹ́mẹ́ nyanam, wa pịghị karakárá nyẹ́ ma mịẹ dọghụm sámámgba. 19A opuma ọ tẹ́ghẹ̄m ḅẹẹ, o tẹ́ghẹ̄ sị Tamuno ḅọlọgha sa ḅụ, i pa ọ fịrịma.

Gbẹ́ẹ̄ Tẹ́ghẹ̄

20Mị́sa diin nyáná Tamuno ma gbámásó ọmbịnyẹ́ ma ọḅọọ ḅụ ḅọ́rọ́, wámịna Nyánáḅọ Jizọs saghịma ḅo fịị ḅụ, opu ánánákúrúḅọ ma, 21ibi gonyẹ́ gonyẹ́ ḅụ ḅárásua ọ pịrị, ọmịnị o binyẹ mịẹarị sáá ọ pịghị wámịna duma bie o tẹ́mẹ́ ḅẹlẹma nyẹ mịẹ Jizọs Krais ḅụ ḅọ́rọ́, Boma fịnị pịrịḅọ akị mú ḅẹ́ sa láa. Anị ọkọ fịnịị.

22A ọ tẹ́ghẹ̄m ị́yẹ́ mịnaapụ ḅẹ́ ọmịnị ingịrịma nyáná a gịẹḅọ ọ pịrị tẹ́mẹ́kụ́rọma ábálálá ma pịrị. Mị́sa a gịẹ ábálálá ma opuma nángwọgha. 23A dọ́ghụm o nimi wámịna numboru owitụ́wọ Timoti, ori ikólibie págháḅomam ori álála ḅo ḅo, a ọ nana ḅobẹm sị ọmịnị ori arịị. 24Ọmịnị ọmịna sịbịdaapụ bii wa piri, na pịghị Tamuno túminị́ mamgba, Ịtalị ḅụ fịnị mininiapụ oku fịrịmam ḅẹ́ nnị obii. 25Tamuno tọ́rụ́kụrụkụ́rụ́ ọmịnị mamgba na fịnị.

Currently Selected:

Hiburuapụ 13: IBY

Highlight

Copy

Compare