Hiburuapụ 1

Tamuno Ọ Tụwọ Ḅụ Ḅọ́rọ́ Ẹ́gẹ́rẹ́ Kọm

1Ḅọ́rọ́maa saa Tamuno tọgha sáá ḅụ ẹ́gẹ́rẹ́kọọ wámịna tádọ́apụ pịrịm ọrẹ ikiakoroapụ ḅụ ḅọ́rọ́ pịghị tọ́rụ́kịrịkị́rị́ asọ ḅụ. 2Kụ́ma mị kunema éné ma, ori ọ Tụ́wọ ḅụ ḅọ́rọ́ ẹ́gẹ́rẹ́kọọ wa pịrịmam. Ori anị ọ tọ́ọ ḅọ nyẹ gonyẹ́ gonyẹ́ nyánáákịbẹḅọ. Ọ ḅụ ḅọ́rọ́ anịị o so na kiri na tẹ́mẹ́nyẹ. 3Tụwọ ma anịị Tamuno ipine ma bia ḅára diepághámaarịḅọ, Ọ Tamuno na kịkam asọ gonyẹ́ gonyẹ́ ḅụ, ọ pịghị ori kụ́rọ nyáná ẹ́gẹ́rẹ́ pa so na kiri ma dighi sẹ́mam, ọ wámịna sii sịrị si faá ma sáá, ọ kpọrọfịnịm Tamuno ámáḅara angaá, kụrọmamgba nyánáḅọ sobie.

Tụwọ Dụḅaḅá Sookumuapụ Ma Nẹngịm

4Tụwọ ma dụḅaḅá sookumuapụ ma nẹngịm, tegó Tamuno ma pa o sị ẹrẹ, Tụwọ, dụḅaḅá nna ngá ẹ́rẹ́ nẹ́ngị ḅara.

5Tamuno na jẹ́ éné sookumuapụ ma ḅụ gbẹ́rẹ́ḅọ ḅẹgha ḅẹ́,

<<Ịrị i Tụwọ;

mịmgba a Daa sọ ị pịrịmam.>>

Anị gbẹ́rẹ́ ḅara ma Tamuno na jẹ́ éné jẹ́ éné sookumuapụ ma gboloma ḅara ḅụ, gbẹ́rẹ́ḅọ so ḅẹgha ḅẹ́,

<<A Daa sọọ ọ pịrịbẹm,

ori pịghị Tụwọ sọọ i pịrịbẹm>>?

6Kụ́ma Tamuno ori tarị yii Tụwọ fịrịma tuminikiri ḅoo dọghụ sa, o dughom ḅẹẹ,

<<Tamuno sookumuapụ mamgba susi ọ pịrịị.

7Kụ́ma sookumuapụ ma gbolomanyẹ Tamuno ḅẹm,

<<Ori ọrẹ sookumuapụ ma

mịẹm n fọ́rụ dighi,

Ori fịrịnwangịapụ kọrịfịnị.>>

8Kụ́ma ọ Tụwọ gbolomanyẹ Tamuno ḅẹm,

<<Yei Tamuno, Ị́yẹ́ imine fịnị

mú ḅẹsá ḅẹsá lábẹm,

I karakárá ibiamịẹnyẹ pa

ịyẹa túminị́ taábẹm.

9I karakárá ibiamịẹnyẹ ḅẹ́lẹ́mam,

kụ́ma irima nyẹ ma ị́ ḅẹlẹmagha.

Anịma go anịị Tamuno,

ị́yẹ́ Tamuno, i dighi sóghólóma

ị jẹ́apụ nẹngịmam,

o bieḅẹlẹ dighiarị pulo

pa ị sịbị sara ḅara.>>

10O pịghị ḅẹm,

<<Ịrị Kị́nị́nyánáḅọ, súghú saghị sa,

súghúise tuminikiri ma pịrịm,

ị pịghị ị ḅara na so ma tẹmẹm.

11Nnị ẹmẹẹ́fafámabẹm,

Kụ́ma ịrị ị fịnịbẹm;

Nnị bịtẹ olom ḅara pa olombẹm.

12I bịtẹ ikoḅára ma

pa nnị ikobẹm;

bịtẹ ḅara ma nnị dimabẹm.

Sámámgba ị fịnị ḅára

anịị ị fịnịnyẹ.

Ị́yẹ́ duma kunema nyanagha.>>

13Tamuno jéné na ọrẹ sookumuapụ ma ḅụ gbẹ́rẹ́ḅọ ḅẹgha,

<<Iyẹ amaḅara angaá kpọrọfịnị

ákị mú a ị́yẹ́ iruonaapụ pa

ị́yẹ́ ḅụ́ọ́gbána ịkasị mịẹ

ị ḅụọ sughubie>>?

14Anịsa sookumuapụ ma, nnị ọ tẹ́apụ? Sookumuapụ ma nnị anịị fịrịnwangị Tamuno pịrịarị tẹ́mẹ́, ọ fịrịma sị nnị ḅo fịrịnwangị dụaḅọ́rọ́ma nyánábeapụ pịrị.

Currently Selected:

Hiburuapụ 1: IBY

Highlight

Copy

Compare