Galesiaapụ 4

1Kúru a jẹ́ ḅara pa anị dugho, tụwọ ma daḅọ ma ngọ nyánáakị bẹḅọ ma kịrịgha ómóniḅọ ḅụ, ori ma ịrụ sa gonyẹ́ gonyẹ́, tụ́manyẹ ḅẹ́ nyẹ gonyẹ́ gonyẹ́ o nyẹ so nị. 2Tụwọ ma pa ịrụ sa, didighiapụ ḅara anịị ọ fịnị sẹ́nị págháḅo daḅọ ma tọ sáá ma la bẹnyẹ. 3Anịị anị fịnị ḅara wamịnị ịrụ sáá, wamịnị omoni sọ tuminikiri ma táarị tẹ́mẹ́ pịrịm, akị mú wa ḅo sẹnị sa láa tẹ́mẹ́ju. 4Kụ́ma karakárá sáá ma ḅo láa sa, Tamuno ọ Tụwọ fịrịmaḅom, ọ́rụ́ḅọ o yiim, Juuapụ ólóghó ḅara ḅụ ọ sẹ́nị págháḅom. 5Tamuno ọ fịrịmaḅom, o ḅo wa dụapághámaḅo, ólóghó ma sughubie fịnịapụ si wamịnị ori awọ sọ bẹ ḅara. 6Túminị́ árị bẹ ḅara ḅẹ́ ọmịnị mị́sa ori awọọ, Tamuno ọ Tụwọ Tẹ́mẹ́ fịrịmaḅom anị ḅo o bie fịnị. Tẹ́mẹ́ anịị owuarị nyẹ, <<Daa, i Daa.>> 7Mị́sa ịrị mịnị omoniḅọgha, kụ́ma Tamuno tụ́wọ, ịrị ọ tụwọ gosi ọ nyánányẹ mamgba ịnyee.

Pọl Ḅáláfa Nyáná Galesiaapụ Ma Minini Ḅụ Pághá Bẹnyẹ Pịrịm

8Ḅọ́rọ́maa sáá, ọ Tamuno nimigha, anị sáá ọmịnị omoni sọ kịrịkị́rị́ tamuno pa siinyẹ pịrịm, kụ́ma nnị karakárá tamunoghaa. 9Mị́sa ọ Tamuno nimimáa sáá (anịgha a dugho bẹ ḅẹ́ Tamuno ọmịnị nimimam) ọ tegósi ọḅụpịrị dọghụ mú kụrọ nyanagha na nyẹ ḅụ ofori tuminikiri táarị tẹ́mẹ́ ma pịrịdọ́ghu. O tégósi mú sima omoni sọ dọghụ? 10Ọmịnị éné, akalụ́, sáá na kụ́rá kụ́rá bie álálị wárim. 11Anị i tẹ́mẹ́bie ḅụḅáláḅálá pa i pịrịarị bẹ ị́yẹ́ tọ́rụ́siarị mamgba ọmịna ḅụ anị ḅo papanyẹ sọm.

12A ọ tẹ́ghẹ̄m ịyẹa mịnaapụ, ọmịnị; a fịnị ḅara fịnị. Tegó ịrịsọ ọ fịnị ḅará fịnịm. Ọ gbẹ́rẹ́ siinyẹ sọ pa i mịẹgha. 13Ọ́ kọ́kọ́ nimi ḅẹ́ a goo ine Krais ibi oku ma akuoo ọ pịrịnyẹ, parị sáá ma ḅụ ọ ḅẹ́ a obim gosi. 14Karakárányẹ ḅẹẹ, ị́yẹ́ obi ma, anị ọmịna ḅụ daádighi, kụ́ma ọmịnị i dighisimagha anịgha i sịghịị. Anịmanakaragha ọmịnị i daa kórómam ọmịnị sobie sághị kóróḅo sookumuḅọ daákóróma bẹ ḅara; ọmịnị i daákịm ọ Krais Jizọs daakị bẹ ḅara. 15Ọmịna bieḅẹlẹ parị ma, anị tẹ́ angaá imii tẹ́ pághá sị mịnanyẹ mamgba dima? Ịrị ḅụgbọrụ a ine dughobẹm ḅẹ́ ḅọ́rọ́ ọmịnị ine bẹ ọkụ́ma, ọmịnị ọmịna tọ́rụ́ sọghụ sị, anị pa i pịrịbẹm. 16Mị́sa a ọmịna iruonaḅọ sọ ma, a tụ́manyẹ ma dugho ọ pịrịm gosi?

17Isiapụ ma mịẹarị so ḅọ́rọ́ọ́ nnị opuma ọ ḅẹlẹma nyẹ, kụ́ma nna tẹ́mẹ́bie fịnịnyẹ ọmịna ḅụ ibighaa. Nnị dọghụarị ọmịnị i wáriso sị n dua bẹ ḅara, sị sághị nnị dughonyẹ mịẹ. 18Mị́sa anị ibim tumḅọ ọkọfịnị opu ḅẹlẹma nyáná ḅọ́rọ́ kịrịnyẹ nna tẹ́mẹ́bie ofori, mịma anị sámámgba miẹnaibi nyẹ a ọ nana fịnị sa ngéréghaa. 19A ḅẹlẹma ibi awọ, yii ọlọ ọ́rụ́ḅọ naarị ákụ ma anị mị́sa a nyáná ọ pịrị jẹ́ ákụ akị mú ọ sẹ́nị ḅo tumḅọ sọ sáá láa Krais bie. 20Anị i tarịarị ḅara sọ́ḅọ́rọ́ mị́sa ma ḅụ a ọ nana gbẹ́rẹ́ angaá imim, a nimi bẹ ḅara a bịpị warị ẹ́gẹ́rẹ kọọ ọ pịrịbẹ ḅara. Ọmịna fịnị ḅara i ḅụ́ḅáláḅálámaarị.

Sẹra Na Haga Ḅụ Fịnị Dáwọnyẹ

21Dugho i pịrị, ọmịnị ólóghó ḅara ḅụụ ngá dọghụapụ, ólóghó ma dughonyẹ ọ naagha? 22Tọ́ndiri ḅẹm ḅẹ́ Ebraham mmẹẹ́ awọ nyánam ori omoni ọ́rụ́ḅọ tụwọ gbẹ́rẹ́ḅọ yiim, furotụ́wọ ọ́rụ́ḅọ isi ḅo yiim. 23Ori omoni ọ́rụ́ḅọ tụwọ ma, nnị papa tụwọ yii ḅara anịị o ḅo ḅara, kụ́ma furotụ́wọ ọ́rụ́ḅọ ma tụwọ ḅom Tamuno mini nyẹ ḅụ ḅọ́rọ́. 24Mịnanyẹ ma nyẹ pa nyẹ́tọma ḅụ anị tumḅọ ine anị akanyaḅo bẹnyẹ; mmẹẹ́ ẹ́rẹ́ ma sẹ mmẹẹ́ ọḅọọ pịrịm. Árị tụ́wọ yiiḅọ omoni ḅụ, anịị Haga, árị ma sẹ Tamuno, Mosis na nyána ọḅọọ Sainai tụ́ndụ ọgọnọ pịrịm. 25Haga sẹ Sainai tụ́ndụ pịrịm Arebiya ḅẹrẹtọ yọ ḅụ, mịma sẹ́ mịmgba éné Jerusalem pịrịm anị na anị túminị́ mamgba omoni ḅụ imii. 26Kụ́ma sobie Jerusalem ma omoniḅọgha, árị anịị wámịna nyingiḅọ. 27Tọ́ndiri ma dughom ḅẹẹ;

<<Bieḅẹlẹ, ịrị furopụ ọ́rụ́ḅọ,

ine awọ yiigha ḅọ;

ilúghú págháma

sị bieḅẹlẹ núme suu,

ịrị awọ yii ḅụakụ naaghaḅọ;

tegó n sịghị ọ́rụ́ḅọ ma

mị́sa tọgha awọ nyáná,

dee warisogha ọ́rụ́ḅọ ma nẹngịmam.>>

28Mị́sa ịyẹa mịnaapụ ọmịnị sọ Tamuno mini nyẹ ḅụ n yii awọọ, Aizik fịnị ḅara ma. 29Anịsa ma ḅụ n papa awọ yii ḅara pa yiiḅọ ma warị sághị Tamuno Tẹ́mẹ́ gosi nnị yiiḅọ ma pa tọ́rụ́siarịma, anịị anị pịghị fịnị ḅara ḅo mị́sa láa. 30Kụ́ma tọ́ndiri ma anị tẹ́ dugho mịma gbolomanyẹ? <<Ómóni ọ́rụ́ḅọ tụwọ ma na a tụ́wọ deepágháma, tegó ómóní ọ́rụ́ḅọ ma tụwọ furotụ́wọ ọ́rụ́ḅọ ma tụ́wọ dua dienyẹ nyánábịgha nna daa ngọ ḅụ.>> 31Anịgosi ịyẹa mịnaapụ, wamịnị ómóni ọ́rụ́ḅọ ma awọgháa, kụ́ma wamịnị anịị furotụ́wọ ọ́rụ́ḅọ ma awọ.

Currently Selected:

Galesiaapụ 4: IBY

Highlight

Copy

Compare