Ẹ́fịsọsapụ 1

Pọl Ḅara Saghị Ḅo Sịbịpị

1Irị Pọl Jizọs Krais fịrịmaḅọ Tamuno ma tọ warị ḅara ḅụ, anịị mịị diri ma gịẹḅọ. A gịẹ pa Ẹ́fịsọs bie fịnị Tamuno tọ́ntọ́apụ fịrịmaarị sẹ kụrọ fịnị sị Krais Jizọs ma duaarịapụ.

2Tamuno wámịna Daa na Wányánáḅọ Jizọs Krais tọ́rụ́kụrụkụ́rụ́ na diin pa ọ pịrị.

Tamuno Tẹ́mẹ́ju Karịibima Pa Wa Pịrịm Wa Krais Bie Imi Gosi

3O ḅoo wa túminí pa Tamuno Wányánáḅọ Jizọs Krais Daḅọ pịrị, tẹ́mẹ́ karịiḅi mamgba pa wa karịibimaḅọ sobie ju tegó wamịnị Kraisapụ. 4Ḅọlọmaa sáá, Tamuno náa tuminikiri ma tẹ́mẹ́gha sáá, ọ wa sẹ́lẹ́akịm ḅẹ́ wamịnị ori a túminị́ sọọ Krais ḅụ ḅọ́rọ́, ḅẹẹ wa tọ́ntọ́ ḅụ fịnị sị bịpị ḅụ laagha ḅara pa fịnị ọ toruku. Ori ḅẹlẹma gosi 5Tamuno tarị dugho wárịmam ḅẹẹ ọ wa pa ori angaá awọ mịẹbẹm Krais Jizọs ḅụ ḅọ́rọ́, mịị ọ ḅẹlẹma nyẹ pịghị dọghụnyẹ. 6O ḅo wa Tamuno túminí ori ḅụ́gbérépuma tọ́rụ́kụrụkụ́rụ́ ḅụ ọ pa wa pịrịnyẹ ọ ḅẹlẹma Tụ́wọ ḅụ ḅọ́rọ́, wámịna ḅara nyẹ́ bigha ḅụ. 7Krais ọmbịnyẹ́ ḅụ ḅọ́rọ́ wa dụaḅọ́rọ́ma nyánam, n wámịna siiḅụḅarasi wa pịrịm ori opu tọ́rụ́kụrụkụ́rụ́ gosi. 8Ọ pa wa ḅụ sara nyẹ bifụfụ ḅara ḅụ! Ori níminyẹ na ori akanyaḅo ḅụ, 9Tamuno pa wa diemam ḅọghu sị ọ mịẹ dọghụnyẹ ọ tọ ḅara ḅụ, mịma anịị ọ mịẹ kárámá bẹnyẹ Krais ḅụ ḅọ́rọ́. 10Mịị anị ọ tọ́nyẹ ma ọ mịẹ kárámá bẹnyẹ sáá ma la sáá, ori ọ tẹ́mẹ́nyẹ gonyẹ́ gonyẹ́ tuminikiri na sobie akuoo gbolomabẹm sị Krais nna ḅụ sịbịdaa.

11Nyẹ gonyẹ́ gonyẹ́ nnị anị mịẹm Tamuno tọ warị ḅara; na ọ dọghụ ḅara na, Tamuno pịghị wa sẹ́lẹ́akị pa onye mịẹm Krais ḅụ ḅọ́rọ́, ọ mịẹ dọghụnyẹ go, ọ pịghị tọ warị ḅara sughu saghị sáá ma ḅụ. 12Anịsáa, wamịnị parị Krais ḅụ tọ́rụ́dighiapụ Tamuno ipine túminị́.

13Ọmịnị sọ ḅo Krais túminị́ sọm ọ tụ́ma ẹ́gẹ́rẹ́ ma náa sáá, dụaḅọ́rọ́ma akuoo ọ pịrị ibi oku ma, ọ Krais ḅụ mininim, Tamuno pịghị o mini Tọ́ntọ́ Tẹ́mẹ́ pa ọmịna ḅụ ilíghíma suam ḅẹ́ ọmịnị onyẹẹ. 14Wa Tamuno Tẹ́mẹ́ nyánam gosi, wa tẹ́mẹ́kụ́rọ nyánam ḅẹẹ Tamuno mini ori a túminị́ pịrịnyẹ wa nyánáḅobẹm. Tamuno bi káara dụaḅọ́rọ́ma pa ori a túminị́ pịrịbẹm. O ḅo wa ori ipine túminí.

Pọl Tẹ́ghẹ̄ Mị Diri Ma Nyánáḅọ Bẹapụ Pịrịm

15Mịma gosi, a ọmịna minini náa sáá éné éné Kị́nị́nyánáḅọ Jizọs ḅụ pịghị ọ nyáná ḅẹlẹma Tamuno tọ́ntọ́apụ mamgba fịnị angaá, 16náa a ọ ḅụdaghaa ịmịẹḅam pa Tamuno ḅẹ́ ọ sịbị gosi, a tẹ́ghẹ̄ ọ pịrịarị sámámgba pịghị 17wámịna Nyánáḅọ Jizọs Krais Tamuno ḅara biiarị, ipine nyáná Daḅọ, ḅẹẹ ọ Tẹ́mẹ́ ma pa ọ pịrị, níminyẹ pa ọ pịrịbẹḅọ, sị Tamuno ma pa o die, sị ọmịnị ibima ọ nimi bẹ ḅara. 18A tẹ́ghẹ̄arị ḅẹẹ ọmịna tẹ́mẹ́ findi sị ọmịnị ori baá ma arịị, o nimi bẹ ḅara o go ọ sị tọ́rụ́ dighinyẹ, ọ pịghị mini ori tọ́ntọ́apụ pịrị karịibima anị dụḅa na anị ḅụ́gbérépuma láa ḅara, 19pịghị ori kụ́rọ, anị opuma dụḅa láa ḅara fịrịnwangịarị nyẹ wamịnị mininiapụ ma duma bie. Mị kụ́rọ ma na wámịna ḅụ fịrịnwangịarị nyẹ anịị pịghị anị gbẹ́rẹ́ opu ịnyọ ma, 20o pa fịị ḅụ Krais saghị nyẹ, si ọ kpọ́rọ́fịnịma ori amaḅara angaá sobieibiama. 21Sobie ma ḅụ Krais pa táarị kụ́rọ táarịapụ na sịbịdaapụ na kụrọnyanáapụ mamgba kụ́rọ nẹngịm sotọ́rụ ma ḅụ Krais ẹ́rẹ́ nyánam kụ́rọḅa pịghị ẹ́rẹ́ mamgba nẹ́ngị ẹ́rẹ́, mị tuminikiri na pịghị ḅo ḅẹnyẹ. 22Tamuno nyẹ mamgba pa Krais ḅụọ sughubie wárịmam, nyẹ gonyẹ́ gonyẹ́ ḅụ ori ọ pa sịbịdam Tamuno kubiri ogbo ma bie. 23Tamuno kubiri ogbo ma anịị Krais oju ma, Krais mịẹnyẹ sị anị káara. Krais ọ ḅụ gbọrụ anịị nyẹ mamgba mịẹsị anị káara nyẹ ngá mamgba ḅụ.

Currently Selected:

Ẹ́fịsọsapụ 1: IBY

Highlight

Copy

Compare