Fịrị Ḅara 24

Nnị Pa Pọl Sịbị Sẹ Ḅẹrẹ

1Sọ́nọ́ a dii ḅo ḅọ́rọ́ sa, Ananayas opu igwagwaḅọ Siza dámámum ori na jẹa sẹ́nịapụ na pịghị gbẹ́rẹ́ ólóghókieḅọ Tetulọs pa sịḅọ nnị warị n nyáná Pọl pịrị ḅẹ́rẹ́ ma pa Ḅẹ́rẹ́tọ́ḅọ Fẹlis tórúku kórómaa. 2Nnị warị Pọl sị suu, Tetulọs wárị nnị pa ọ sịbị sẹ ḅẹ́rẹ́ ma kọ́rọ́ma Fẹlis tórúku.

<<Ị́yẹ́ Pẹ́rẹ́! Ị́yẹ́ ibi ámátaḅara mịẹsị mị́sa wa nángwọ diin nyánam pịghị ịḅụ ḅọ́rọ́ mị sẹ ma pịghị tọgha ibinyẹ na tọgha ịwọ nyẹ árịmam. 3Wa mịma arịm ngámámgba pịghị sámámgba ḅụ, wa pịghị opuma bieḅẹlẹm sị ịmịẹḅam pa ị ḅẹm. 4Á bigha a opuma ị́yẹ́ sáá ngúma, anịgo a tẹ́ghẹ̄m ḅẹẹ ị kẹ́lẹ́ birifama wa pughu wa dugho bẹ kálányẹ ma náa. 5Wa mị owitụ́wọ ma arịm ḅẹẹ ori opu ḅẹ́rẹ́náḅọ tuminikiri gbọrụ ḅụ anịị ọ pịghị ḅẹrẹ dighiarị ḅara Juuapụ ma ogbobie, ori ma anị pịghị sịbịdá Nazarẹtị ḅụ saghị ḅoḅọ duapụ ogboapụ pịrịḅọ. 6Ọ pịghị dọ́ghụm ḅẹ́ ọ Tamunoopuwárị ma pilema: anịị wamịnị ọ kuunyẹẹ.#24.6 Jẹa diri dughom ḅẹẹ, Wa biam ḅẹ́ wa wámịna ologho pa ọ sịbị ḅẹ́rẹ́kọ. 7Kụ́ma opu ọ́mụ́gbi sịbịdaḅọ ma Lisayas ḅom sị warị kụrọ ḅara pa wámịna ḅárabie ọ pughọakị. 8Lisayas opu ọ́mụ́gbi sịbịdáḅọ warị bịpị pịrị ḅẹ ḅẹ́rẹ́ pa ọ sịbị sẹarịapụ ma ị damaḅo. Ị ḅọ́rọ́ mịị owitụ́wọ ma gbíla gbíla ịrịsọ pịghị dọghụ pághámaḅobẹm wa pa ọ sịbị sẹarịnyẹ mamgba.>>

9Juuapụ ma sọ bịpị suam ḅẹ́ n pa ọ sịbị sẹarịnyẹ ma karakárá nyẹẹ.

Pọl Ọ ḅụ Pighim Fẹlis Tórúku

10Ḅẹrẹtọḅọ ma warị ḅara pa Pọl fọngụma ḅẹ́ ori ẹ́gẹ́rẹ́ẹ́, Pọl warị ọ ḅẹẹ:

<<A nimim ḅẹ́ tọgha kụ́rá ḅụ ịrị anịị mị sẹ ma ḅẹ́rẹ́kọḅọ, anịgo i bieḅẹlẹm ḅẹ́ a ịḅụ pighíí i tórúku. 11Ị ine ị ḅara na dọghụ pághámaḅo bẹ ḅara, na oyi mmẹẹ́ a dii ḅọ́rọ́gha a Jerusalem ḅo nyẹ ḅẹ́ a ḅo tẹ́ghẹ̄ẹ̄. 12Juuapụ ma nnị ị́yẹ́ arịịgha a gbẹ́rẹ́ḅọ na nụ́náarị sáá Tamunoopuwarị ma bie, anịgha nnị pịghị ị́yẹ́ arịị a túminị́ timi sághịarị sa Juuapụ kobiri yọ ma ḅụ anịgha jẹa ngaa ámá ma bie. 13Anịgha ḅẹ́ mị́sa nnị ine ḅara ḅụ ọlọ bẹnyẹ imi si pa die, mị́sa nnị pa i sịbị sẹarịnyẹ ma. 14A mịma mininiakim i tórúku ḅẹẹ: a wámịna tádọ́apụ Tamuno ma tẹ́ghẹ̄m, pịghị anị asọ ma dua, nnị ḅẹ́arịnyẹ ma ḅẹẹ karakáragha. Kụ́ma a pịghị Mosis ólóghó diri bie n gịẹnyẹ mamgba mininim na pịghị ikiakoroapụ ma diri. 15Mịnaapụ ma nyáná tọ́rụ́ dighinyẹ anịị ịrị ma sọ nyáná nyẹ́ẹ́, ḅẹẹ túminị́ mamgba ibiapụ na siiapụ na fịị ḅụ saghịbẹm. 16Anịgo a ị́yẹ́ ịnyọ la ḅárá mịẹm sị árị ḅẹ́ a fíafía kúkúbie nyánam Tamuno tórúku na pịghị túminị́ tórúku.

17<<Ḅọ́rọ́maa tọgha kụ́rá ḅụ a Jerusalem ḅụ ofori, a anị ngaa muum ḅẹ́ a kálá igbii nyẹ akị mú ịyẹa túminị́ pịrị pịghị igwagwaá. 18A mịma mịẹarị sáá anịị nnị ị́yẹ́ árịnyẹ Tamunoopuwarị ma bie, a ojusiri igwaa ma gwafama sáá tọgha túminị́ i nana oforii anịgha, mangị na silé na sọ kiriakịgha. 19Kụ́ma jẹa Juuapụ Esiya ḅẹrẹtọ párángáa ḅoapụ anị ngaa imii, nnị ḅo na ibim sị ḅẹ́rẹ́ pa i sịbị sẹ, nnị árị sị a mịẹnyẹ imi nḅẹḅẹ́. 20Anịgha, mịngáá fịnịapụ ma dugho nnị árị sị a mịẹ siinyẹ, a sẹ sáá ámáḅẹ́rẹ́dughoapụ ma tórúku. 21Gbẹ́rẹ́nyẹ ngéré anịị a ilúghú dughonyẹ a sẹ sáá nna tórúku ḅẹẹ: <Ọmịnị i pa ḅẹ́rẹ́kọ siri ḅom a mininim gosi ḅẹ́ fịịapụ ma fịị ḅụ sághị duma bie sọbẹm.> >>

22Kụ́ma, Fẹlis ibima asọ ma gbolomanyẹ nimiḅọ warị ḅẹ́rẹ́kọ siri ma gbẹ́ẹ̄. Ọ warị n ḅẹẹ, <<Rom ọ́mụ́gbi áláḅọ Lisayas ḅoo láa sáá, a ḅẹ́rẹ́ pẹ́lẹ́bẹm.>> 23Ọ warị nnị Pọl pa ḅárásua ọ́mụ́gbiḅọ ma ḅẹ́ ḅẹẹ, o mú Pọl pa kúru ngaa warị kụ́ma ọ kẹ́lẹ́ dii wọwọọma ọ pịrị, ọ pịghị ọrẹ nangwọapụ wáriso sị nnị o binyẹ pa ọ pịrị.

Pọl, Fẹlis Na Durusila Tórúku

24Éné ḅo kẹ́lẹ́ ḅọ́rọ́ sáá, Fẹlis na ọ taa Durusila Juu ọ́rụ́ḅọ warị ḅo ḅoo. Ọ warị fịrịma Pọl sii warị o pughu ọ Jizọs Krais ḅụ minini gbolomanyẹ dugho. 25Kụ́ma Pọl saghị ibiamịẹnyẹ, na ine ḅụ ọlọ, na pịghị ḅoarị ḅẹ́rẹ́kọ éné ma dughoarị sáá, ḅáláfaa warị Fẹlis ḅụ sọọ, ọ warị ọ ḅẹẹ, <<Mị́sa ị ine soobẹm. A jẹ́ pa sáá nyáná sáá a i sịbẹm.>> 26Anị gbẹ́rẹ́ sáá ma ḅụ ọ tẹ́mẹ́bie dighiarị ḅẹ́ Pọl kẹ́lẹ́ igbii nyẹ pa ọ pịrịbẹm anịma go, sáá ḅụ akị mú sáá láa, ori ọ sịbẹm sị ori ọ nana ẹ́gẹ́rẹ́kọọ. 27Mmẹẹ́ a kụ́rá ḅo ḅọ́rọ́ sáá, Pọsiosi Fẹstọsị ḅo Fẹlis kiriakịm ḅẹ́rẹ́tọ́ḅọ ḅara. Kụ́ma Fẹlis ibi pa Juuapụ ma mịẹbẹ goo, warị Pọl wáriso ịkóli wárịbie.

Currently Selected:

Fịrị Ḅara 24: IBY

Highlight

Compare

Copy