Fịrị Ḅara 21

Pọl Jerusalem Múm

1Wa ọmịnị ibima fịnị pa n ḅẹm warị sua págháma. Wa kẹ́lẹ́ dọghụ tórúku múm sị sáḅá kóró sị ḅo Kọs láa. Anị ḅụ éné ḅa sáá wa ḅo Rodis laam, anị ngaa wa warị ḅọ́rọ́ Patara muu. 2Anị ngaa anịị wa gbẹ́rẹ́ árụ́ arịị nyẹ Fonisiya muarịnyẹ, wa warị anị ḅụlọ sị suapágháa. 3Wa ḅo gbẹ́rẹ́ ngaa lam wa Saiprọs arị ngaa, wa warị sua sughu ju daa sị ḅoo Siriya láa. Wa muu kiri sọ́mam Taya ḅụ, árụ́ ma anị dighinyẹ sẹkóróma ngaa. 4Anị ngaa wa jẹa mininiapụ arịm warị nnị ná sọ́nọ́ma dii fịnị. Tọ́ntọ́ Tẹ́mẹ́ kụrọ ḅụ n dugho Pọl pịrịm ḅẹ́ o Jerusalem muu ma. 5Kụ́ma wa nyáná nnị pịrị sáá kara sáá, wamịnị n warịsom sị wa muarịnyẹ múm. Nnị kị́nị́mamgba nnị nna taa na awọ na wa ḅọ́rọ́maa ámá ma bie págháḅo posie áká ma ḅom, wamịnị kị́nị́mamgba ẹkpẹrẹkị sị tẹ́ghẹ̄ ngaa. 6Anịsáa, wa warị ibima fịnị pa jụghọ jụghọ bẹ sị árụ́ ma ḅụlọ, nnị warị pịghịma wárị muu.

7Wa warị wámịna muunyẹ muu, Taya ḅụ akị mú Tolemayas láa wa sịbịpị pa mininiapụ ma sịị angaá, warị nnị na gbẹ́rẹ́ éné fịnị. 8Anị ḅụ éné ḅáa, wa suapághám sị ḅo Sizariya láa. Anị angaá Filipụ Tamuno ẹ́gẹ́rẹ́ dugho wásáma ḅo wárị, anịị wa fịnịnyẹ, Jerusalem ḅụ nnị sẹlẹakị sọ́nọ́ma ḅárásúapụ ma ḅụ gbẹ́rẹ́ḅọ. 9Ori ínia ẹ́rẹ́awọ nyanam náa dee yaghaapụ, Tamuno ẹ́gẹ́rẹ́ ma dugho wásámáarịapụ.

10Wa tọgha éné fịnịmam gbẹ́rẹ́ Agabọs pa sị ikiakoroḅọ Judiya ḅụ saghị ḅo sáá. 11Ọ wa dámáḅom warị Pọl kundu kpọ árị́dírí pa o ḅụọ na o ḅara kpọọ, warị ḅẹẹ, <<Mị Tọ́ntọ́ Tẹ́mẹ́ ma dughonyẹ: Mị kundu kpọ árị́dírí ma nyánáḅọ ma mịị ḅara ma anịị Jerusalem ḅụ fịnị Juuapụ ma ọkpọ bẹ ḅara, sị ọ saghị pa Juughaapụ ma ḅarabie sua.>>

12Wa mịma náa sáá wamịnị na anị ngaa fịnịapụ ma Pọl tẹ́ghẹ̄m ḅẹ́ ọmịnị Jerusalem muu ma. 13Kuma ọ wa pagharam ḅẹẹ, <<Ọ tegósi owu i tẹ́mẹ́ nainnainmaarị? Ḅẹẹ a tẹ́lẹ́mámam ḅẹẹ ịkóli ngéréghaa nnị i pa suabẹnyẹ; kụ́ma pịghị fịị Jerusalem ḅụ Kị́nị́nyánáḅọ Jizọs ma ẹrẹ́sị.>>

14Wamịnị ine mịẹgha ọ tẹ́mẹ́ dima, anịgo, wa warị ọ warịsó ḅẹẹ, <<Kị́nị́nyánáḅọ ị tọ́nyẹ mịẹẹ.>>

15Wa kẹ́lẹ́ sáá fámá sị anị ngaa fịnị fámá sa wa wámịna nyẹ taákim sị Jerusalem muu. 16Krais ọḅụdua jẹapụ Sizariya ḅụ saghịḅom mị anịị wamịnị na mú sị wa fịnị bẹḅọ ma wárị pa wa die nyẹ, Minason Saiprọs ḅụ saghị ḅoḅọ Ḅọlọmaa sáá éné éné minini maá ḅo.

Pọl Ḅo Jerusalem Lam

17Wa mú Jerusalem láa sáá, mininiapụ ma ibiḅara pa wa daa kórómam. 18Anị ḅụ éné ḅáa, Pọl warị wamịnị na mú Jems arịị, sọsị sẹ́nịapụ mamgba sọ anị ngaa imii. 19Pọl sịbịpị pa n siim warị ḅo nyẹ fịnị ḅara mamgba dugho nnị pịrị Tamuno ọ ḅara pa nwángịmáa fịrị mamgba Juughaapụ ogbobie.

20Nnị o pughu fama sáá, nnị kị́nị́mamgba warị Tamuno túminim. Nnị warị ḅẹẹ, <<Mị́naḅọ owitụ́wọ Pọl, i kọkọ arịị tọgha mmẹẹ́ ndẹ́ẹ oyia si findi, Juuapụ, ḅo mininimáapụ, ólóghó ma pa nyẹ sị pịghị anị ḅẹlẹmaapụ. 21Nnị dugho n pịrịmam ḅẹẹ, ị Juughaapụ bie ngaa Juuapụ mamgba diearị ḅẹ́ nnị mịnị Mosis ólóghó ma pa nyẹ́sị ma, pịghị nnị diearị ḅẹẹ n mịnị nna owiapụ awọ tọ́ngọ pẹlẹ ma, ḅẹẹ nnị mịnị pịghị Juuapụ mịẹmịẹnyẹ ma dua ma. 22Mị́sa wa tẹ́ mịẹbẹ? Gbarịgha ḅara ḅụ n naábẹm ḅẹ́ i ḅomam. 23Mịma anịị wa dọghụ bẹnyẹ sị i mịẹ. Mịnga ínia owiapụ imii nyẹ mininimáapụ. 24Nnáná mú gbẹ́rẹ́ sáá sị nnị na oju mịẹ fiafiama igwa ma gwáa, pịghị igwáa ma láanyẹ láanyẹ gbẹ́ẹ̄ anịsáa nnị ine nna sịbị sẹbẹm. Mị ḅara ma kị́nị́mamgba nimibẹm ḅẹ́ ị gboloma sị n dugho nnị pịrịnyẹ ma karakárányẹ anị bie ofori, kụ́ma ịrịsọ pịghị Mosis ologho koko ḅọ. 25Kụ́ma ḅo mininimaa Juughaapụ ma wa ábálálá pa nnị fịrịmamam ḅẹ́ n jẹ́ éné jẹ́ éné nnị n pa igwagwaá oru pịrị fị́nyẹ fị ma, anịgha pulo táḅa, anịgha n ḅa sị pulo anị bie sara págháa nama pẹẹ́, ḅẹ́ n pịghị nna ḅụ fófóoma yáakuu ḅụ ofori nwángị ḅụ.>>

26Pọl túminị́ ma akịm warịị anị ḅụ éné ḅáa nna oju mịẹ fiafiama igwa ma gwaa. Anị sáá ọ warị Tamunowarị ma sọọ sị bịpị pịrị oju mịẹ fiafiama igwa éné ma káarabẹ sáá, sị nnị igwa ma igwa ọ́rụ́ḅọ ọ́rụ́ḅọ pịrịbẹ sáá.

Nnị Pọl Kuum Tamunoopuwarị Ma Bie

27Kụ́ma Sọ́nọ́ma dii ma kara bẹ sáá, jẹa Juuapụ Esiya ḅẹrẹtọ angaá saghị ḅoapụ Pọl arịm Tamunoopuwarị ma bie nnị warị túminị́ kpo ma timi saghị nnị warị Pọl kuu, 28n warị ilúghú, <<Izirẹlịapụ, ọ ḅárásua! Mịị ngaa mamgba muu sị Izirẹlị na kuraghaa nyẹ́diearị ḅọ, ólóghó ma na kuraghaa nyẹ na pịghị mị Tamunoopuwárị ma. Ḅẹẹ mị́sa sọ o jẹa Juughaapụ pa Tamunoopuwárị ma sóḅomam, sị mị tọ́ntọ́ yọ ma pilemam.>> 29(Nnị mịma dughom tegó nnị Trofimọs, Ẹ́fịsọs ḅụ saghị ḅo ḅo na Pọl arịm opu ama ma bie nnị siim ḅẹ́ Pọl ọ pa Tamunowarị ma sọmam.)

30Galagala warị ama gbọ́rụ́ ma ikelema, túminị́ ma warị gbẹ́rẹ́sa mangị sị Pọl kuu sẹ́ma sị ọ nụ́nụ́ pághámaḅo Tamunoopuwarị ma bie. Anị gbẹ́rẹ́kiri Tamunoopuwarị ma ḅụ́pọ́ gbẹm. 31Túminị́ kpo ma asọ dọghụarị n Pọl ḅáa bẹ ḅara, anịị bịpị mú Rom ọ́mụ́gbiapụ ma sịbịdáaḅọ biri láa nyẹ ḅẹ́ Jerusalem gbọrụ gálágálá nna bie imi. 32Anị gbẹ́rẹ́kirikiri ma ḅụ opu sịbịdaaḅọ ma jẹ́ ọ́mụ́gbiapụ na jẹ́ sịbịdáapụ pa álála túminị́ kpo ma fịnị angaá ma muu. Nnị sịbịdáapụ ma na ọ́mụ́gbiapụ ma árị sáá, nnị mịnị Pọl fomugha.

33Sịbịdáaḅọ ma warị Pọl dama mú sị o kuu, warị ḅẹ́ nnị mmẹẹ́ ịkóli pa Pọl kpọọ, ọ warị anịsáa gbíla ḅẹẹ, <<Mị owitụ́wọ ma ọ tụọ? Ọ ḅẹ́ ọ tẹ́ mịẹm?>> 34Jẹapụ túminị́ kpo ma bie ilúghú gbẹ́rẹ́nyẹ dughom, isiapụ jẹ́nyẹ dughom ọkọ fịnị gálágálá kiri imi sị opu sịbịdáḅọ ma ine nimiḅogha pághányẹ. Ọ warị ori a túminị́ ḅẹ́ sị nnị Pọl akuoo nna ọ́mụ́gbiapụ wárị ḅoo. 35Nnị ḅoo ọ nana ọgọ́nọ́ tándị angaá ma láa sáá, dighii anịị nnị o dighinyẹ, túminị́ ma tọ́rụ pulo biaarị gosi. 36Nnị kị́nị́mamgba ori ọḅụju ḅoarị siléarị ḅẹ́ nnị <<O fom ḅá.>>

Pọl Pighíí Ọḅụ Pịrịm

37Ọ́mụ́gbiapụ ma Pọl pa nna ọ́mụ́gbiapụ wárị sọọ bẹ sáá, ori ẹ́gẹ́rẹ́kọọ sịbịdaaḅọ ma pịrịm ḅẹẹ, <<Páisisi a ine kẹ́lẹ́ nyẹ́ dugho ị pịrị?>>

Sịbịdaaḅọ ma warị Pọl gbíla ḅẹẹ, <<I kọkọ Giriki ḅẹ́lẹ̄ fiearị, anịgha.>> 38<<Anịsáa, ịrị anị Ijipitiḅọ magha gbẹ́rẹ́sa biri bịpị puugha ḅara pa nyẹ mịẹ, sị túminị́ oyia ndẹ́ẹ, ḅẹ́rẹ́ dọghụapụ, mini sịbị tughu Rom kọnsịn pịrịghaapụ daa elesiri bie sọọ?>>

39Pọl pagharam, <<Irị Juuḅọ, Tasọs Silisiya bie fịnị káláama bie nnị i yiim, nyẹ láa opu ama bie ḅọ, páisisi a kẹ́lẹ́ ẹ́gẹ́rẹ́kọọ túminị́ ma pịrị.>>

40Sịbịdaaḅọ ma asọ pa ọ pịrịm, Pọl warị wárị ọ́gọ́nọ tándị yọ ḅụ sẹ warị ḅara pa túminị́ fọngụma ḅẹ́ nnị bịpị gbẹ́ẹ̄, nnị bịpị gbẹ́ẹ̄ sa Pọl warị ẹ́gẹ́rẹ́kọọ nnị pịrị Hiburu ḅẹ́lẹ̄ ḅụ.

Currently Selected:

Fịrị Ḅara 21: IBY

Highlight

Compare

Copy