Fịrị Ḅara 17

Pọl Na Sailas Tẹ́salonaika Ḅụ

1Pọl na Sailas nna muunyẹ múm Amfipolis na Apoloniya ḅụ ḅọ́rọ́ sị ḅoo Tẹ́salonaika lam nnị Juuapụ kobiri yọ árị ngaa. 2Ori nyẹ́ mịẹmịẹ ḅara Pọl kobiri yọ ma sọm. Anị angaá tẹ́rẹ́ Ịnyọ́sárá Éné ọ pa túminị́ ma na ẹ́gẹ́rẹ́ nyánam Tọ́ndiri ma dughonyẹ́ dughoarị, 3anị dugho findiarị, pịghị die pághámaarị ḅẹẹ n Pulo pa Sịbị Saraḅọ ma tọ́rụ́siarịbẹm sị pịghị fịị ḅụ saghị. Pọl warị ḅẹẹ, <<Mịị Jizọs ma, a o gbolomanyẹ dugho pághámaarịḅọ ma, ori anịị Tamuno Pulo pa Sịbị Sara ḅo.>> 4Nna ḅụ jẹapụ mịnyẹ ma n ḅụ́koróm, n warị Pọl na Sailas dua, anị gbẹ́rẹ́ ḅara ma anịị sịbịdá ẹ́rẹ́ámáapụ ma na pịghị Tamuno dighi ḅáláfaarị Girikiapụ ma sọ n dua ḅara.

5Kụ́ma jẹa Juuapụ ḅo nyẹ́mọ́nịm, warị ḅẹ́rẹ́dọghu dii túminị́ kobiri, nnị warị ama ma pịghị silé na kam sọ yọ mịẹsị Jasọn pa sịḅọ wárị fomu kaá, n pa Pọl na Sailas dọghụ pághámaḅo túminị́ ma pịrịbẹ ḅara. 6Kụ́ma nnị ine nna arịgha ḅara ma, nnị warị Jasọn na jẹ́ mininiapụ fọ́nọ́ mú ámá sịbịdaapụ ma tórúku kóróma, sị ilúghuu ḅẹẹ, <<Mịná owiapụ ma ḅẹ́rẹ́dighimam angaá mamgba ḅụ! Mị́sa nnị wámịna opu ama sọ ḅomam, 7Jasọn pịghị mịná túminị́ ma dátérémámam ọ wárị. Nnị Siza ma ológhó mamgba kaarị pịghị dughoarị ḅẹ́ jẹ́ ámányánáḅọ imii Jizọs pa sịḅọ.>> 8Mịị ẹ́gẹ́rẹ́ ḅara ma n túminị́ kpo ma na opu ama sịbịdaapụ ma suma silé na kam ḅụ suam. 9Sịbịdaapụ ma mịẹm sị Jasọn na isiapụ ma n pẹ́lẹ́ igbii ma gbẹ́ẹ̄ sị nna ḅụ pághámaḅo sị n warị nnị wáriso sị soo.

Pọl Na Sailas Beriya Ḅụ

10Dii bie láa gbẹ́rẹ́kiri anịị mininiapụ ma Pọl na Sailas fịrịma Beriya muu nyẹ́. Nnị anị ngaa láa sáá, nnị Juuapụ kobiri yọ ma sọm. 11Mịnga fịnị túminị́ ma tẹ́mẹ́ sárásárá Tẹ́salonaika ḅụ fịnịapụ ma nẹngịm. Nnị birifama oku ma pughum éné gonyẹ́ gonyẹ́ ḅụ, nnị pịghị Tọ́ndiri ma dáwọm sị nimidọghu Pọl pa n dienyẹ́ ma ḅọ́rọ́ karakárá. 12Nna ḅụ tọghaapụ mininim, nna ẹrẹ opu kiri ḅụ fịnịapụ na pịghị Giriki owiapụ sọ mininim. 13Kụ́ma Tẹ́salonaika ḅụ fịnị Juuapụ náa sáá ḅẹ́ Pọl Tamuno ẹ́gẹ́rẹ́ ma dugho wásámaarị Beriya ḅụ, nnị anị ngaa ḅom sị túminị́ ma timi saghị n ḅẹ́rẹ́ dighi bẹ ḅara. 14Anị gbẹ́rẹ́kiri mininiapụ ma Pọl fịrịma posie aka múm; kụ́ma Sailas na Timoti Beriya ḅụ ọḅụkọ fịnịm. 15Pọl ḅọ́rọ́maarị owiapụ ma, ọ ḅọ́rọ́ma mú Atensi lam sị pịghịma Beriya ḅo, warị Pọl ḅara oku akuoo ḅẹẹ Sailas na Timoti ḅọlọgha sáá ḅụ ḅo ọ damaḅo.

Pọl Atensi Opuámá Bie

16Pọl Atensi ḅụ Sailas na Timoti kúruarị sáá, ọ ḅo árị ḅom n kárá tamuno ámá ma bie bi ḅara, anị warị opuma ọ tẹ́mẹ́ iganima. 17Anịgo ọ warị Juuapụ kobiri yọ ma ḅụ, Juuapụ na Juughaapụ Tamuno dighi ḅáláfaarịapụ ma na dughonyẹ́ nyána ọ pịghị éné gbọrụ gbọrụ ámáogbo ma ḅoapụ na dughonyẹ́ nyánáarị. 18Epikuriya na Stoyiki, opu nyẹ́dieapụ ọ nana nụnam, nna ḅụ jẹ́apụ o gbilam ḅẹẹ, <<Mịị tẹ́ nyẹ́nimigha dughonyẹ?>> Jẹapụ pagharam ḅẹ́ jẹ́ ámá oru gbólómanyẹ anịị o dughoarị nyẹ. Nnị mịma dughom Pọl Jizọs Krais gboloma ibi oku na fịị ḅụ saghị dugho wásámaarị gosi. 19Nnị warị Pọl akuoo pa nna ámáḅẹ́rẹ́dughoapụ kobiri ogbo ma ḅo, nnị pa Ariyopagọs sị nyẹ warị ḅẹẹ, <<Wa nimi dọ́ghụm mị ịwọ dienyẹ ma, ịrị anị gbolomanyẹ dughoarị nyẹ. 20Wa náa sị ị dughoarị jẹa nyẹ́ ma, jẹ́ éné na wa naagha, wa nimi dọ́ghụm anị fiearị nyẹ.>> 21(Ḅẹ́ Atensi amaapụ na pịghị anị angaá ngaa igoniapụ mamgba jẹ́ nyẹ mịẹgha, kụ́ma nna sáá ngúmá sị mị ịwọ nyẹ ma dughoarị pịghị anị naarị.)

22Pọl warị Ariyopagọs ogboku ḅụ sẹ, warị ḅẹẹ, <<Atensiapụ! A arịm ḅẹ́, nyẹ gonyẹ́ gonyẹ́ ḅụ ọ Tamuno nimiapụ kịkam. 23Ḅẹẹ, a ámá ma bie nwángị ḅọ́rọ́ sáá sị ọmịna tẹ́ghẹ̄ angaá dighi, a gbẹ́rẹ́ ẹ́bẹ ọ́gọ́nọ arịm, nnị mịnyẹ ma gịẹnyẹ: wa nimigha tamuno ma. O nimigha pa susi pịrịarịḅọ, o gbolomanyẹ anịị mị́sa a dugho wásáma ọ pịrịarịnyẹ.

24<<Ḅẹẹ tuminikiri ná nyẹ gonyẹ́ gonyẹ́ tẹ́mẹ́ Tamuno ma, Ori pịghị so na kiri ma Nyánáḅọ, túminị́ ḅara pa nama wárịbie ngaa ngaagha. 25Anịgha o bi sị wamịnị ine pa ọ pịrịbẹnyẹ imii, anị túminị́ fịrịnwangị kị́nị́ pịrịarị ḅara. Wa nimi sáá ḅẹ́ ori anịị duma na ịnyọ pịrịarịḅọ, na pịghị tumḅọ binyẹ gonyẹ́ gonyẹ́. 26Gbẹ́rẹ́ tumḅọ ḅụ ḅọ́rọ́ ọ túminị́ tọ́rụ́kịrịkị́rị́ tẹmẹm, sị mịẹsị n tuminikiri gbọrụ ḅụ ngaa. Ori ma pịghị sáá pẹ́lẹm pịghị nnị ngaa kunema bẹ ngaa tọ wárịmam ḅọlọ sa éné éné. 27Tamuno mịma mịẹm nnị o dọghụ bẹ ḅara, sị pịghị ine ọ dọghụ pághámaḅo pịghị nnị ngámámgba ḅụ ọ dọghụ ḅara, tụ́manyẹ Tamuno wámịna ḅụ ọ ḅọlọ́ angaá ḅụ oforii. 28Gbẹ́rẹ́ḅọ dugho ḅara ḅẹẹ, <Ọ ḅụbie anịị wa duma kọọ nyẹ, pịghị nwángị kọọ ikéle, ọ ḅụbie anịị wa túminị́ sọnyẹ.> Ọmịna jẹa núme gịẹapụ dugho ḅara ḅẹẹ, <Wámịnị sọ ori awọọ.>

29<<Wamịnị Tamuno awọ gosi, anị ibighaa ḅẹ́ wa kóróma ḅẹ́ Tamuno fịnị ḅara anịị nnị odoḅala anịgha pị́naḅala pa tẹ́mẹ́nyẹ anịgha túminị́ opu níminyẹ na túminị́ ḅara fịrị mịẹnyẹ. 30Ḅọ́rọ́maa sáá, túminị́ Tamuno nimigha sáá ori n dighi tọ́rụ́sim, warị tọ ḅẹ ọ́rụ́ḅọ ọ́rụ́ḅọ amịna sii ḅụ pịghịị. 31Tegó ọ sáá pẹ́lẹ́mam o tuminikiri sịbị gbọrụ ori ọ ḅara na sẹlẹakịḅọ ma pa ḅẹ́rẹ́kọ bẹnyẹ karakárá ḅụ. Ọ mịma diepágháma kị́nị́mamgba pịrịm ọ fịị ḅụ ọ saghịma ḅara.>>

32Nnị náa sáá Pọl fịị ḅụ saghị gbólómanyẹ dugho sáá jẹapụ ọ kpọtim, kụ́ma jẹapụ ḅẹ́ẹ́m ḅẹẹ, <<Wa sima ị bịpị mịma náa dọ́ghụm.>> 33Pọl warị kubiri ogbo ma wáriso. 34Jẹa owiapụ ḅo o duam sị pịghị mininii, Dionisiosi pịghị nna ḅụ gbẹ́rẹ́ḅọ, pịghị ámáḅẹ́rẹ́dughoapụ ḅụ gbẹ́rẹ́ḅọ, nnị Damaris pa sị gbẹ́rẹ́ḅọ sọ nna bie imii, na pịghị jẹapụ na.

Currently Selected:

Fịrị Ḅara 17: IBY

Highlight

Compare

Copy