1 Timoti 3
3
Sịbịdaapụ Tamuno Kubiri Ogbobie
1Mịị tụ́ma dughonyẹ: ḅọ́rọ́ tumḅọ tẹ́mẹ́bie ibima dọ́ghụm ḅẹ́ nḅọ Tamuno kubiri ogbo sịbịdáḅọ sọọ, nḅọ túminị́ osigha pa pịrịbẹ fịrị dọ́ghụm. 2Tamuno kubiri ogbo sịbịdaḅọ ori fiesima nẹ́ngị na fiam; gbẹ́rẹ́ táaḅọ ngéré nyáná, ori álála bieoḅughaa, ine ḅụ ọlọ ḅo, kị́nị́ osigha nyáná pịrịḅọ, ine igoniapụ datéréma n ḅo wárị; ine nyẹ́die bẹḅọ; 3N ḅo iru ḅuu tọ́rụ́ ḅámábịgha, owitẹ́mẹ́bie pa nyẹ́ mịẹgha, kụ́ma tẹ́mẹ́ ọfịrịgha tumḅọ, kamsọsọghaḅọ; ori igbii ḅẹ́lẹ́mabịgha; 4Ori ine ibima ọ wárị tákúbiri na fiam mịẹsị ori awọ osigha ḅụ ọ bịpị púghú. 5Ḅẹẹ, ḅọ́rọ́ tumḅọ ine amịna wárị tákúbirigha nḅọ tọrọ́ pa ọrụtọ Tamuno kubiri ogbo ma pịrịbẹ? 6Ori ịwọma Krais nimiḅọ na fiagha, ori opu ibiamịẹnyẹḅọ mịẹbịgha ḅara sị abana findii sị sóóró kóró ẹ́kpẹ́dua sóóro kóró ḅẹ́rẹ́kọ ma ḅụ. 7Ori ibi ẹ́rẹ́ nyáná na ibim nụ́ngọ bieapụ fịnịanga, nnị ọ ḅụ́gịrịrịmabịgha ḅara sị ori ẹ́kpẹ́dua dia ma bie sóóro kóró.
8Tamuno kubiri ogbo ḅárásúapụ anịị túminị́ osigha nyáná pịrị na fịaapụ, oḅori pa kị́nị́ sịịghaapụ; nnị opuma iru ḅuubịgha anịgha ngara ḅụ ḅo igbii ḅẹlẹma; 9Minini ma ḅụ n pa n diepágháma póghóló tụ́manyẹ ma nnị fíafía tẹ́mẹ́bie ḅụ anị ọlọọ sẹ́ma na fiam. 10Nnị parị n daádighibẹm, nnị bẹnyẹ bẹnyẹ dọghụḅogha n bẹ ḅẹẹ nna ḅụ, nnị n wáriso n fịrịnwangịị ḅárásúapụ ḅara. 11Nna taapụ sọ anịị túminị́ osigha pa pịrị na ḅụ́gbẹ́ ẹ́rẹ́, nnị jẹ́apụ pa ẹ́gẹ́rẹ́bịgha; tọ́rụ́ diinapụ, túminị́ pịghị nna ḅụ biegbana nyánam nyẹ gonyẹ́ gonyẹ́ ḅụ. 12Tamuno kubiri ogbo ḅárásuaḅọ gbẹ́rẹ́ táaḅọ ngéré anịị n ḅo nyáná bẹnyẹ, n ḅo pịghị ine n ḅọ awọ taa kubiribẹm pịghị ibima n ḅo warị táa kubiri na fiam.
Wámịna Minini Ma Ḅụ Fịnị Opu Ḅọghunyẹ
13Anị ḅárásúapụ ma, ibima nna fịrị ma nwángịarịapụ ibi ẹ́rẹ́ nyánáḅoo n ḅụ pịrịm, n pịghị ine ḅáláfaghaa ḅara pa nna minini dugho pághámabẹm Krais Jizọs ḅụ.
14A mịị ábálálá ma gịẹ ị pịrịarị, tẹ́mẹ́ gbánā ḅẹ́ ḅọlọgha sa a ḅoo ị́yẹ́ árịbẹm. 15Kụ́ma a ḅọ́rọ́ sáá ngúma ngúma, mịị ábálálá ma pa o diebẹm túminị́ ḅara warị nyẹ́ mịẹ na ibiḅara Tamuno túminị́ ma kubiri ogbo, anịị dumafịnị Tamuno ma Tamuno kubiri ogbo ma, agalaba sị na anị sughusághị, Tamuno karakárá ma dighinyẹ.
16Karakárányẹ ḅụ, wámịna minini ma ḅụ fịnị ḅọghunyẹ opuma dụḅam,
Krais mẹnịsua tuminikiri ḅom,
Tẹ́mẹ́ ma diepághámam ḅẹ́ siiamịẹnyẹ ọ ḅụ ofori,
sookumuapụ ori arịm,
sẹ́ sẹ́ sẹ́ ḅụ nnị o gbolomanyẹ dugho wásámam,
tuminikiriapụ ọ ḅụ mininim,
nnị ipine ḅụ ọsịakị sọ́mum.
Currently Selected:
1 Timoti 3: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
