1 Pita 1
1
Pita Ḅara Ḅo Sịbịpị
1Irị Pita, Jizọs Krais fịrịmaḅọ anịị mị diri gịẹ ọ fịrịmaarịḅọ.
Tamuno sẹlẹakịapụ, n gálágáláma kóróma igoniapụ Pọntus ḅụ, Galesia, Kapadosiya, Esiya na Bitiniya ama gbọrụ bie. 2Nnị ọ sẹ́lẹ́akịm, Tamuno Daḅọ ma níminyẹ ḅụ ḅọ́rọ́, ọ Tẹ́mẹ́ pịghị ọ pa tọ́ntọ́ ḅụ wárị, si ọ Jizọs Krais osii, ọrẹ ọmbịnyẹ́ pịghị ọmịnị sịrị fiafiamaa.
Tọ́rụ́kụrụkụ́rụ́ na diin, bí ḅara pa ọmịna nyẹ sọ.
Tamuno Túminị́ Dumafịnị Tọ́rụ́ Dighinyẹ Nyanam
3Túmíní fịnị Tamuno wámịna Nyánáḅọ Jizọs Krais Daa ma pịrịị! Ori opu lolomakúkúbie ḅụ ḅọ́rọ́ ori ịwọ duma pa wa pịrịm ọ Jizọs Krais saghị ḅara ma fịị ḅụ, mịma dumafịnịarị tọ́rụ́ dighinyẹ pa wa pịrịarị, 4anịma gosi, wa nimim ḅẹ́ Tamuno kóróma warị ori a túminị́ pịrị dumafịnị tọ́rụdighinyẹ ma wámịnị anị nyánáḅobẹm. Ọ pa warị ọ́ pịrịm sobie, n ḅụrụbịghaa angaá anịgha síí, anịgha sịghịrị faá. 5Anị fịnị ọ pịrịm, minini ḅụ nnị Tamuno kụ́rọ pa koko wárịapụ pa mị dụaḅọ́rọ́ma ma pịrị, tẹ́lẹ́mamaá nyẹ si anị ḅụ die bii nyẹ sa kunema ḅụ. 6Bieḅẹlẹ mịma pịrị, anị ḅọ́rọ́ o biesima mḅẹ́sọ mị́sa, ọmịnị árịarị tọ́rụ́kịrịkị́rị́ daádighi gosi. 7Mịị daádighi ma anịị pa diepágháma ḅẹ́ ọmịna minini ma anịị karakárányẹ ma. Odoḅala sọ, tumḅọ ine sima ḅẹnyẹ, fịnị anị n pa anị daádighi dighinyẹ. Anịma go, ọmịna minini nyẹ́la odoḅala nẹ́ngị nyẹ, n pa daádighi bie sua nyanam sị nimi anị ibi láa ḅara. Anịsa ọ túmíní na ipine na kuu nyánábẹm Jizọs Krais ọ ḅụ die bẹ éné. 8Ọmịnị ọ ḅẹlẹmam, na ọmịnị ori arịgha so, ọmịnị ọ ḅụ mininim na mị́sa ọmịnị ori arịgha sọ, mị́sa ọdurụkụarị opu bieḅẹlẹ na ipine ḅụ bii nyẹ, ẹ́gẹ́rẹ́ bịpị ine anị dugho pághámabịgha nyẹ, 9ọmịnị ọmịna biebẹ duma dụaḅọ́rọ́ma nyánáarị gosi, anịma mịẹm sị ọ minini nyáná ọ ḅụ.
10Olom sáá Ikiakoroapụ ma, Tamuno ḅara ọ nyáná ḅo bẹ mịị tọ́rụ́kụrụkụ́rụ́ ma gboloma ikiakoroapụ ma, sáá ákịm pịghị tọ́rụ́ pa kiri lama dọghụm nnị nimiḅo bẹ ḅara, mịị dụaḅọ́rọ́ma gbolomanyẹ. 11Nnị warị ḅụ́kọ́rọ́ma dọghụ, sa ma láa bẹ sa, anị pịghị tọrọ́ pa ḅo bẹ. Mị́sa ma anị n ḅụ fịnị Krais Tẹ́mẹ́ ḅara tụ́ghụ́máarị, die pághámaarị Krais árị bẹ tọ́rụ́siarị pịghị anị dua bẹ ipine. 12Tamuno diepágháma mịná ikiakoroapụ ma pịrịm ḅẹ́, nna fịrị ma anị nna ḅárákū sọ́nyẹ sọ n pịrịbịgha kụ́ma anị sọọ nyẹ sọ ọmịnị pịrịbẹm, n pịghị dugho sị ọ náa maá oku ma ókumuuapụ ma bịpị, anịị n sobie saghị fịrịma ḅo Tọ́ntọ́ Tẹ́mẹ́ pa dugho ibi oku. Mịnanyẹ ma anị sookumuapụ ma so bii nyẹ nnị akanyaḅo.
Tọ́ntọ́ Duma Kọọ
13Ọmịnị ọmịna kúkúbie karakáráma warị fịrị pịrị, ọ tẹ́lẹ́ma, pịghị ọmịna tọ́rụ́ dighinyẹ pa n pa ọ pịrịbẹ boma ma ḅụ gbánā, n Jizọs Krais diepágháma bẹ sa. 14Ọ Tamuno bịpị pughu, o minima si ọ Tamuno nimigha sa ọ kọmaá olom duma ḅara ma pa ḅẹrẹtọ ọmịna duma pịrị mị́sa. 15Mịma na karagha, ọ tọ́ntọ́ ḅụ fịnị omiẹarị nyẹ gonyẹ́ gonyẹ́ ḅụ, ọ sịị Tamuno ma sọ tọ́ntọ́ ḅụ fịnị ḅara. 16Tọ́ndiri ma dughom bẹ, <<Tọ́ntọ́ ḅụ fịnị tegó ịrị ma sọ Tọ́ntọ́ ḅụ fịnịm.>>
17Ọ Tamuno ma tẹ́ghẹ̄arị sa, ọ Daḅọ pa ọ sim. Ori anị gbẹ́rẹ́ ḅara pa ḅẹ́rẹ́kọ kị́nị́mamgba pịrịarịḅọ, ọ́rụ́ḅọ ọ́rụ́ḅọ mịẹnyẹ labiri ḅụ. Anịma go, ị́yẹ́ duma éné kọnyẹ́ ma tuminikiri, árị bẹ, ịrị anị pa opu osigha nyáná pa ọ pịrịm. 18Ọ nimim ọ sịbị mgbe sáá sị pa ọ dụapághámaḅo ọmịna tádọ́apụ ḅọ́rọ́ma ọ pịrị ofori ofori duma bie. Anị odoḅala anịgha pị́naḅala fịnị ḅara fịnịgha, tumḅọ ine álála sima bẹnyẹ. 19Krais nyẹ́la ọmbịnyẹ́ ma anịị ị sịbị igbii n gbẹ́ẹ̄ si pa ị dụaḅọ́rọ́ma nyẹ. Krais anịị agbaa mịẹ ánáná ma, pilegha pịghị ikúlágha ánáná. 20Tamuno ọ sẹ́lẹ́akịmam na n tuminikiri ma tẹ́mẹ́gha sáá kụ́ma n warị ọmịnị go ọ diepágháma mị kunema sáá ma. 21Ọmịnị ọ ḅụ ḅọ́rọ́ Tamuno ḅụ mininim, fịị ḅụ ọ sị saghịma ḅọ sị pịghị ipine pa ọ pịrị, anịma gosi ọmịna minini na ọmịna tọ́rụ́ dighinyẹ Tamuno ḅụ gbánāarị.
22Ḅẹ́ mị́sa ọmịnị ọmịna ḅụ mịẹ yóriyórimamáa ḅara ma karakárányẹ ma mịẹ ḅụ, ọ pịghị mị́sa karakárá ḅẹlẹma nyáná jẹ́ mininiapụ ma pịrịmam, ọmịnị ọmịna tẹ́mẹ́bie gbọrụ pa ibiḅara pa jụghọ jụghọ ḅẹlẹma. 23Nnị sima o yiimam, dumafịnị pịghị gbámásó Tamuno ẹ́gẹ́rẹ́ ma ḅụ ḅọ́rọ́, n sima o yiigha fịị bẹ tumḅọ duma pághámaḅoarị sịmgbọlụ ḅụ ḅọ́rọ́. 24Tọ́ndiri ma dugho ḅara ḅẹ́,
<<Túminị́ gonyẹ́ gonyẹ́
osuka fịnị ḅára
anịị n fịnị ḅára,
piri ngóngó fịnị ḅára anịị
nna fiafiama sọ fịnị ḅára,
Osuka sámụ́nọ́ sámụ́nọ́m,
ngóngó sóghóro sóghóróm.
25Kụ́ma Kị́nị́nyánáḅọ ẹ́gẹ́rẹ́ ma
fịnị mú ḅẹsá ḅẹsá lam.>>
Mị ẹ́gẹ́rẹ́ ma anị n dugho págháma ọ pịrị ibi ẹ́gẹ́rẹ́ ma.
Currently Selected:
1 Pita 1: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
