Zẹkaraia 7
7
E Nọyaẹnmwa Wẹ Aguẹ Abawẹ I Maa
1Vbe ukpo ne ogienẹ ne Dariọs ya gha re ọgbaisi, vbe ikpẹdẹ ne ogienẹ ọghe uki ne ogihinrin (uki ne a tie ẹre Kislev), e Nọyaẹnmwa keghi do gie mwẹ uhunmwu ọkpa. 2Ivbi e Bẹtẹl keghi ka gie Siarezẹ kevbe Regemelẹk kevbe ikpia eso gha rrie Ọgua Osa e Nọyaẹnmwa ne Oghodua ne iran do na erhunmwu afiangbe, 3kevbe ne iran vbe nọ avbe ohẹn kevbe akhasẹ ọta na wẹẹ, “Te ọ kere ne ima ye gha khiẹ ye ẹmwẹ Ọgua Osa ne a guọghọ ua vbe ekpa ne ima gha na gha yo aguẹ vbe uki ne ogisẹn vbene ima ka ru ẹe ke ukpo nibun ni gberra gha dee?”
4Uhunmwu ne Nọyaẹnmwa gie mwẹ re ọre ọna khin. 5Ọ wẹẹ, “Tama ivbi ẹvbo nii kevbe avbe ohẹn wẹ ne iran na yo aguẹ kevbe ne iran na khiẹ vbe uki ne ogisẹn ke ne ogihinrọn nii vbe ukpo ekigbesiyenẹ ni gberra na, ẹ i re imẹ ọre iran ya ya ọghọ na. 6Iran gha re, iran gha da, rhunmwuda ne iran miẹn ehe na re ne ẹko vuọn iran nọ.”
7Uhunmwu ne Nọyaẹnmwa vbe gie avbe akhasẹ ni karo ọ re ọna khin vbe ẹghẹ ne Jerusalẹm na gha rre atẹ vbe ne ẹvbo na vuọn rẹn, ne ẹvbo na vbe vuọn avbe ore nekhua ni lẹga ẹre, kevbe isoko ni rre odẹ ekẹn vbe ototọ oke.
Iyienhọ Ọ Re Ọ Si Emwa La Iwe
8E Nọyaẹnmwa keghi gie Zẹkaraia uhunmwu na wẹẹ, 9“Vbe ẹghẹ ne ọ kpee fua, I keghi gu avbe emwa mwẹ guan wẹẹ, ‘Wa gia miẹn wẹ vbene ọ khẹke ọ re a ru emwi yi wa ghi vbe gha tohan egbe, wa ghi gha mwẹ ẹnina egbe. 10Wa ghẹ wọ avbe ẹgbẹe uhunmwu, ra avbe emọ ne ẹ i mwẹ erha, avbe erhunmwuyẹn ni do gu uwa yin ẹvbo ra ọmwaikọmwa ne ọ vbabọ emwi eso. Wa ghẹ vbe khuan khẹ egbe vbene uwa gha ya ru egbe emwi ikuangbe hẹ.’
11“Sokpan, emwa mwẹ keghi ze vbe udu, iran ma zẹ yọ. Iran keghi rri ekhọe iran gbua, 12iran keghi ye ekhọe iran wegbe zẹ vbe okuta nọkhua. Rhunmwuda ne iran ma na zẹye emwi ne I la obọ avbe akhasẹ ni rrọ vbe ẹghẹ ne ọ kpẹre ma iran re, ohu keghi mu mwẹ ẹsẹse. 13Rhunmwuda ne iran ma na zẹ yọ vbe I gu iran guan, iran ghi vbe na erhunmwu, mẹ ma vbe zẹ yọ. 14I keghi kpolo iran gha rrie zẹ vbe ẹhoho ne iran ya gha rre ẹvbo ẹrrẹe. A keghi sẹ otọe esiesi na rae vbe ihoi vbe ne ọmwarhọkpa i na rrọ.”
Currently Selected:
Zẹkaraia 7: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
