Zẹkaraia 4
4
Umian Erhan Ọmukpa
1Odibosa nii ne ọ gha gunmwẹ guan usin keghi rre, ọ keghi huẹn mwẹ kpaegbe vbe ne a miẹn wẹ te I te vbiẹ. 2Rẹn keghi nọ mwẹ wẹẹ, “De emwi ne u bẹghe yi?” Mẹ keghi wanniẹn wẹẹ, “Erhan ne a mu ukpa yan ne a ye igoru ru. Ọkpan ne a sa ofigbọn yi rre odukhunmwu ẹnrẹn. Ukpa ihinrọn rre uhunmwu ọmukpa na, ukpa ọkpọkpa mwẹ uvun ihinrọn ne a rhie oru la. 3Eran oliv eha diake nene erhan ọmukpa, ọkpa vbe obọ na kevbe nọkpa vbe obọ nọkpa.” 4Ẹrẹ mẹ na ghi nọ odibosa nii wẹẹ, “Dọmọ o, de emwi ne a ya enena kha yi?”
5Rẹn nọọn mwẹ wẹẹ, “Wẹ ma rẹn ra?” Mẹ keghi wanniẹn wẹẹ, “I ma rẹn enọwanrẹn.”#4:5 Te a dọlegbe mwamwa uviẹn 10b ya sẹ 14 ne ọ miẹn ehe na rrie ẹse.
10bOdibosa nii keghi tama mwẹ wẹẹ, “Erhan ọmukpa ihinrọn ni keghi re avbe aro ihinrọn ọghe Nọyaẹnmwa ne ọ bẹghe otọ agbọn hia.” 11Mẹ keghi nọ wẹẹ, “De emwi ne avbe erhan oliv ni rre obọ eveva ọghe erhan ọmukpa ni mudia yi? 12De emwi ne a vbe ye abọ erhan oliv eva ni rre ọkpẹn uhoro igoru eva ne ofigbọn oliv keghi le ladian kha?”
13Rẹn keghi nọ. mwẹ wẹẹ, “Wẹ ma rẹn ra?” Mẹ keghi wanniẹn wẹẹ, “I ma rẹn enọwanrẹn.” 14Ẹre irẹn ghi na kha wẹẹ, “Iran na ọrọre avbe ikpia eva ne Osanobua zẹe, ọ na vbe nọnọ ori ye iran uhunmwu ne iran gha ga irẹn, ne e Nọyaẹnmwa ne ọ yan otọ agbọn hia.”
Emwi Ne Nọyaẹnmwa Ve Zerubabẹl Re
6Odibosa nii keghi tama mwẹ ne I ta uhunmwu ne Nọyaẹnmwa gie gie Zerubabẹl na ma rẹn wẹẹ, “U gha khọnmiotọ, sokpan, ẹ i re vbe ekpa ẹtin ivbiyokuo ra ẹtin ọghe obọ ruẹ sokpan, orhiọn mwẹ. 7Idobo ni ye vbe oke ni yo gha we yo hin odaro ruẹ rre. U gha dọlọ Ọgua Osa bọ. U gha ghi mu ibiriki ne okiekie yọ, emwa hia ghi wee, ‘Imose, imose!’ ”
8A keghi vbe gie uhunmwu ọvbehe ke ehe ne Nọyaẹnmwa ye gunmwẹ. 9Ọ wẹẹ, “E Zerubabẹl gbe ẹyotọ Ọgua Osa nẹ, te ọ ra bọ ẹe fo. Ọna ghẹghi sunu, emwa mwẹ gha rẹn wẹ mẹ ọ re ọ giọ gie uwẹ bu iran gha dee. 10aEgbe gha wọ iran rhunmwuda, obọ i kẹe vbe nene iwinna, sokpan, iran gha miẹn vbe Zerubabẹl a gha bọ Ọgua Osa ni khian, iran gha ghọghọ.”
Currently Selected:
Zẹkaraia 4: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
