Zẹkaraia 2
2
Umian Ọghe Ọkpọ Ne A Ya Mwa Emwi
1Vbe umian ọvbehe, I keghi bẹghe okpia ọkpa ne ọ rhie ọkpọ ne a ya mwa emwi mwẹ obọ. 2I keghi nọ rẹn wẹẹ, “Vbe u a rrie yi?” Rẹn keghi wanniẹn wẹẹ, “Te I ra ya mwa e Jerusalẹm; ne I miẹn ehe na rẹn vbene ọ vbẹ sẹ hẹ kevbe vbene ọ tan sẹ hẹ.” 3Mẹ keghi bẹghe odibosa ne ọ gun mwẹ guan usin vbe ọ zẹ owẹ sikẹ odaro, odibosa ọvbehe keghi do vba ẹre. 4Ne okaro keghi tama nọkpa wẹẹ, “Rhie ulẹ ya tama ọvbokhan ọkpia ne ọ rhie emwi ne a ya mwa emwi mwẹ obọ nii wẹ emwa kevbe ẹmila gha bun sẹrriọ vbe Jerusalẹm wẹ ọ gha digba gbe ne a gbe ekẹn gaa. 5E Nọyaẹnmwa tobọ ẹre tae nẹ wẹ te irẹn ra gha re ekẹn erhẹn lẹga ẹvbo nii ne irẹn gha degue ẹre, kevbe wẹ tẹ irẹn ra gha rre evba ke irẹn kevbe uyi irẹn hia.”
A Tie Iran Ni Rre Iwe Gha Die Owa
6-7E Nọyaẹnmwa tama emwa irẹn wẹẹ, “Mẹ ọ re ọ zagha uwa lele ehe hia, sokpan, banbanna nian, wa ni rre iwe, wa lẹfua vbe Babilọn ne uwa werriegbe gha rrie Jerusalẹm. 8Ọmwaikọmwa ne ọ fi uwa emwi, emwi ne ọre eghẹnghẹn mẹ, ọre ọ fi ẹre emwi.”
Rhunmwuda ọnii, e Nọyaẹnmwa ne Oghodua keghi gie mwẹ uhunmwu na bu avbe uhunmwu ẹvbo ni fu emwa rẹn emwi viọ gha rrie wẹẹ, 9“E Nọyaẹnmwa tobọ ẹre gha gu uwa gbinna, avbe emwa ni te ka gha re eguọmwadia uwa yi gha fu uwa emwi viọ.” Ọna ghẹ ghi sunu nẹ, emwa hia gha rẹn wẹ e Nọyaẹnmwa ọ re ọ gie mwẹ.
10E Nọyaẹnmwa khare wẹẹ, “Wa gha so ihuan oghọghọ, ivbi e Jerusalẹm! Mẹ dee do gu uwa yin.” 11Ọ gha sẹ ẹghẹ nii, uhunmwu ẹvbo nibun gha bu e Nọyaẹnmwa rre iran ghi khian emwa rẹn. Rẹn gha yin ehe ne uwa ye, wa gha vbe rẹn wẹ rẹn ọ re ọ gie mwẹ bu uwa gha dee. 12E Juda gha dọlegbe do gha re emwiobọ kpataki ọghe Nọyaẹnmwa vbe otọe ọre nọhuanrẹn, e Jerusalẹm gha do gha re okpẹvbo ne irẹn gha ho ẹmwẹ ọnrẹn sẹẹ ehia fẹẹrẹ. 13Wa gbẹdọ, wa ne emwa hian fẹẹrẹ, vbe ehe ne Nọyaẹnmwa ye, rhunmwuda, rẹn ke ehe nọhuanrẹn ne irẹn dia dee.
Currently Selected:
Zẹkaraia 2: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
