Nọmbas 22
22
Ọba Ọghe Moab Gie Ne A Tie Balam
1Ivbi Izrẹl ghi si okhian, iran na ya yakọ vbe otọ ne ọhẹnhẹn ọghe Moab, vbe odẹ ahọ ọghe Jọdan ne ọ mu aro da Jẹriko. 2Ugbẹn vbe Balak ne ọba e Moab, ne ovbi Zipọ ghi miẹn emwi ne ivbi Izrẹl ru ivbi Amọri re, 3afianma iran kegha fian ẹẹn ke ẹe kevbe emwa rẹn hia rhunmwuda iran bun gbe. 4Ẹre ivbi e Moab na khama avbe ọkaolotu emwa Midian wẹẹ, “Iran ni kun khian na gha rri emwi ni lẹga ima hia mu otọ vbene ẹkhuia ẹmila rri Irunmwu vbe oha ne ẹmila na rria.” Ẹre Balak ne ọba e Moab 5na gie emwa ni iran ya tie Balam ne ovbi Beọ, ne ọ rre Petọ vbe ọkpẹn Ẹzẹ Yufretes vbe otọ Amọn rre. Iran keghi tama rẹn wẹẹ: “I ho ni guẹ rẹn wẹẹ agbọn ẹvbo hoho wa ke Igipt gha die emwa na, iran vẹ la ehe hia iran ra gbe ima miẹn ima otọ mwa. 6Iran bun sẹ mwa, rhunmwuda onii, gha dee do fi iran unu mẹ, ughaghe, ma gha sẹtin khọnmiotọ vbe uhunmwu iran vberriọ, ne a khulo iran hin otọ na rre. I rẹnrẹn wẹ, u gha na erhunmwu ne emwa, afiangbe nọ ne iran, u gha fi emwa unu te ọ sẹ iran egbe.”
7Ẹre avbe ọkaolotu Moab ke Midian na viọ igho ne iran gha ya ha osa ne ẹẹn vbe ọ gha fi iran unu mwẹ obọ, iran keghi bu e Balam gha khian, iran na ya tama rẹn vbene Balak gie. 8E Balam keghi tama iran wẹẹ, “Wa gbe asọn na vbe emwa, I gha tama uwa akhuẹ vbe ne Nọyaẹnmwa a rhirhi tama mwẹ hẹ.” Ẹre avbe ọkaolotu e Moab na tota ke Balam.
9Osanobua keghi bu e Balam gha dee, ọ nọ rẹn wẹẹ, “De emwa ni rre ehe ne u ye na yi?” 10Rẹn keghi wanniẹn wẹẹ, “E Balak ne ọba e Moab ọre ọ gie iran bu mwẹ gha dee do tama mwẹ 11wẹ emwa ni ke Igipt gha dee wa vẹ gba otọe ni hia. Ọ wẹ ne I do fi iran unu ne irẹn ne ọ miẹn ehe na gu iran gbinna, kevbe ne ọ khulo iran ladian.” 12Osanobua keghi tama Balam wẹẹ, “Ghẹ lele emwa na gha khian, ghẹ vbe fi ivbi Izrẹl unu rhunmwuda afiangbe mwẹ rre iran egbe.” 13Ẹdẹ ghi gbe, e Balam keghi bu emwa ne Balak gie ẹre uhunmwu, ọ tama iran wẹẹ, “Wa gha rrie owa, e Nọyaẹnmwa wẹ ne I ghẹ lele uwa gha khian.” 14Ẹre iran na dọlegbe bu e Balak gha dee, iran na do tama rẹn wẹ, ọ wẹ rẹn i lele iran dee.
15Ẹre Balak na gie avbe ọkaolotu kpataki ni bun sẹ enii gha khian. 16Iran na bu e Balam gha khian ya tama rẹn uhunmwu ne Balak gie na wẹẹ, “Lahọ, ghẹ gie emwi rhọkpa da a obọ yi ne u bu mwẹ gha dee.” 17I gha kaka bọ san ruẹn ẹse, I ghi vbe ru vbene u rhirhi kha. Lahọ gha dee do fi iran unu mẹ. 18Sokpan e Balam keghi wanniẹn wẹẹ, “Ọ gha khọn e Balak ne ọ viọ igoru kevbe esiliva hia ni rre ẹguae ẹre mẹ, mẹ i ra sẹtin rhie obọ gberra ẹmwẹ ne Osanobua mwẹ tama mwẹ uhin ya se egbe emwi ne ọ kanmwa sẹ. 19Sokpan, wa lahọ ne uwa vbe gbe asọn na vbe emwana zẹ vbene nekpa ru, ne I miẹn ehe na rẹn deghẹ Nọyaẹnmwa mwẹ ẹmwẹ ọvbehe ne ọ gha tama mwẹ.”
20Vbe asọn nii, Osanobua keghi bu e Balam gha dee, ọ tama rẹn wẹẹ, “Deghẹ te iran na do tama ruẹn wẹ ne u lele iran gha khian, mu egbe ne u lele iran gha khian, sokpan emwi ne I tama ruẹn ne u ru ọkpa ọ re u gha ru.” 21Ẹre ẹde ghi na gbe, e Balam keghi mu ekẹtẹkẹtẹ ọre egbe ọ na lele avbe ọkaolotu e Moab gha khian.
E Balam Kevbe Ekẹtẹkẹtẹ Ọre
22Ne Balam na gha khian na keghi sọnnọ e Nọyaẹnmwa, ugbẹn vbe Balam ghi hin ekẹtẹkẹtẹ ọre khian nii ke ẹe kevbe eguọmwadia ẹre eva, odibo e Nọyaẹnmwa keghi mudia ye odẹ ne ọ gbe ẹre odẹ. 23Ugbẹn vbe ekẹtẹkẹtẹ nii ghi dẹghe odibosa nii vbe ọ mudia ye odẹ ke ẹe kevbe umozo vbe obọ, ọ keghi lahin urodẹ rre, ọ na gban egbe la oha, e Balam keghi fi ekẹtẹkẹtẹ nii emwi, ọ na dọlegbe dia ẹre ye odẹ.
24Ẹre odibosa nii na mudia ye ehe ne odẹ na ya wẹnrẹn vbe ẹkpo ugbo emwiokọ ọmọ erhan ayọn ne ọ baa eva vbene egbekẹn okuta na rre obọ eveva vbe odẹ. 25Ugbẹn vbe ekẹtẹkẹtẹ ghi bẹghe odibosa, ọ keghi wa piẹnpiẹn egbe la ọkpẹn ekẹn, ọ na wiẹn Balam owẹ vbọ. E Balam keghi fi ekẹtẹkẹtẹ nii emwi. 26Ẹre odibosa nii na dọlegbe sikẹ odaro, ọ na ya mudia ye ehe ne wẹnrẹn, ehe ne a i na miẹn ehe biegbe ghe vbe obọ eveva. 27Ugbẹn vbe ekẹtẹkẹtẹ ghi bẹghe odibosa ẹghẹ na, ọ na mu ẹko rhu otọ. Ohu keghi kakabọ mu e Balam, ọ na gha ya ukpokpo ẹre gbe ekẹtẹkẹtẹ nii. 28E Nọyaẹnmwa keghi gie ekẹtẹkẹtẹ nii sẹtin guan, ọ na khama e Balam wẹẹ, “Vbia ruẹ ẹre? Vbọzẹ ne u na gha gbe mwẹ igba eha na?” 29E Balam keghi tama rẹn wẹẹ, “Rhunmwuda ne u na ya mwẹ gbe ogie nọ, akpawẹ te umozo gue mwẹ I gha gbe ua.”
30Ekẹtẹkẹtẹ nii keghi wanniẹn wẹẹ, “Ẹ i re mẹ ọ re ekẹtẹkẹtẹ ọkpa nii ne u hin ke ẹghẹ ne a ya biọ gha dee? I ka yin uyinmwẹ vberriọ ghe ruẹ ẹdẹ ra?”
Rẹn keghi wanniẹn wẹẹ, “Ẹn o.”
31Ẹre Nọyaẹnmwa na gie Balam bẹghe nene odibosa vbe ehe ne ọ na mudia, ke ẹe kevbe umozo. E Balam keghi mu aro rhu otọ. 32Odibosa nii keghi nọ rẹn wẹẹ, “Vbọzẹ ne u na gbe ekẹtẹkẹtẹ ruẹ igba eha vberriọ yi? Te I do gba yuẹ odẹ rhunmwuda ọ ma kei ne u khian okhian na. 33Sokpan, ekẹtẹkẹtẹ ruẹ bẹghe mwẹ, ọ na biegbe igba eha. Akpawẹ ẹ i re vberriọ, I gha gbe ua, I ghẹ ghi sẹ ekẹtẹkẹtẹ rae.”
34E Balam wanniẹn wẹẹ, “I rukhọ nẹ, I ma na rẹn ighẹ te u gba ye odẹ khẹ mwẹ, sokpan banbanna nian, u gha roro ẹe ighẹ ọ ma kei ne I gha khian, I gha dọlegbe gha rrie owa.”
35Sokpan, odibosa nii tama rẹn wẹẹ, “Lele avbe emwa na gha khian, sokpan emwi ne I tama ruẹn ne u ta ọkpa ọre u gha ta.” Ẹre Balam na lele iran gha khian.
E Balak Gbe Ọbokhian Ne Balam
36Ugbẹn vbe Balak ghi họn ighẹ Balam dee, ọ keghi khian ya vba ẹre vbe Ar ne ọ rre Ẹzẹ Anọn vbe ehe ne otọe Moab sẹe. 37E Balak keghi khama rẹn wẹẹ, “Vbọzẹ ne u ma na rre yi vbe I gie ne a tie ruẹ rre vbe okaro? Te u ro ra ighẹ mẹ i ra sẹtin ru uwẹ ẹse sọkẹn?” 38E Balam keghi wanniẹn wẹẹ, “I rre, ra I ma rre? Sokpan de ẹtin ne I mwẹ yi? Emwi ne Osanobua tama mwẹ ọkpa ọre I gha sẹtin ta.” 39Ọ re Balam na lele Balak gha rrie ẹvbo ne a tie ẹre Huzot, 40e Balak na gbele ẹmila kevbe avbe ohuan, ọ na fian vbe emiowo ẹre gie Balam kevbe avbe ọkaolotu ni gu ẹe rre vba.
Ẹmwẹ Akhasẹ Okaro Ọghe Balam
41Owiẹ ne ọ lelẹe, e Balak keghi rhie Balam gha rrie uhunmwu oke Bamot Bal. E Balam keghi sẹtin ke evba bẹghe eso vbe ivbi Izrẹl.
Currently Selected:
Nọmbas 22: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
