Nọmbas 13
13
Avbe Ọrhẹ
(Diuteronomi 1:19-33)
1E Nọyaẹnmwa keghi tama e Mosis wẹẹ, 2“Zẹ ọkpọkpa vbe uwu avbe ọkaolotu avbe ẹwae iweva nii ne u gie iran zẹ vbe ọrhẹ ne iran ya ba otọ Kenan ne I ra mu ne ivbi Izrẹl ghe.” 3-15E Mosis keghi ru vberriọ ọ na ke ẹgbo Paran gie avbe ọkaolotu na gha khian:
| Ẹwae | Ọkaolotu |
|---|---|
| Ẹwae Riubẹn | e Siamua ne ovbi Zakọ |
| E Simiọn | e Siafat ne ovbi e Hori |
| E Juda | e Kelẹb ne ovbi e Jefunẹ |
| Isaaka | Igal ne ovbi e Josẹf |
| Ifreim | e Hosia ne ovbi e Nọn |
| E Bẹnjamin | e Palti ne ovbi e Rafa |
| E Zebulọn | e Gadiẹl ne ovbi e Sodi |
| E Manasẹ | e Gadi ne ovbi e Susi |
| E Dan | Amiẹl ne ovbi e Gemani |
| Asia | e Setọ ne ovbi e Maikẹl |
| Naftali | e Nabi ne ovbi e Vopsi |
| E Gad | e Gẹuẹl ne ovbi e Makai |
16Iran na ọrọre avbe ọrhẹ ne Mosis gie ne ọ ya ghe otọe nii ghe, ọ keghi fi eni Hosia ne ovbi e Nọn werriẹ khian Jọsua. 17Ugbẹn vbe Mosis ghi gie iran ladian, ọ tama iran wẹẹ, “Wa la odẹ okuọ la odẹ ekẹn ọghe ẹvbo Kenan ya sẹ ẹvbo oke nii. 18Wa ghe egbe ẹvbo ne ọ khin, inu emwa ni rre evba kevbe vbene iran wegbe sẹ hẹ. 19Wa ghe ẹre deghẹ nene ẹvbo maa ra ẹ i maa, kevbe wẹ deghẹ ẹvbo ne a ma gbe ekẹn gaa ra ne a gbe ekẹn ga ẹre iran ye. 20Wa ghe ẹre a deghẹ otọe nii ma emwiokọ, kevbe wẹ deghẹ erhan bun vbe otọe nii. Wa ghẹ mwẹ wa ma viọ rre vbe ọmọ erhan ni rre ẹvbo nii.” (Ẹghẹ ne ọmọ erhan ayọn nọ baa ya suẹn gha vbo nọ.) 21Ẹre emwa nii na la ghe odẹ okuọ, iran na ghe otọe nii ke ẹgbo Zin vbe odẹ ekẹn ya sẹ Rehọb, ne ọ rre ọkpẹn Hamat Pas vbe odẹ okuọ. 22Iran keghi ka laghe odẹ ekẹn ẹvbo nii iran ke do sẹ Hibrọn ehe ne ivbi uniẹn iran ye ighẹ avbe Ahiman, Siesia kevbe Talmai ne arhuanran, ẹwae iran na ọ re a tie ẹre Anakin (Ukpo ihinrọn ọre a ka ya bu Hibrọn khẹ Zoan ne ọ rre Igipt.) 23Iran keghi do sẹ Iya Ẹskọl, evba ọre iran na fian abọ ne ititi ọmọ erhan ayọn nọbaa ye, ne ọ khua sẹrriọ wẹ ikpia eva ọre a gbae ye erhan mu ẹẹn na, iran vbe viọ ighee eso kevbe ohọ rre ba ẹre. 24(Rhunmwuda, ititi ọmọ erhan ayọn nọ baa ne a fian kọe rre ọre a na gha tie evba nii Ẹskọl.)
25Iran ghi ya ikpẹdẹ iyeva ghe otọe nii lẹga nẹ, iran keghi dọlegbe bu 26e Mosis, Errọn kevbe ivbi Izrẹl hia gha die Kedẹs vbe ẹgbo Paran. Iran keghi na iyẹn emwi ne iran miẹn, iran na vbe mu ọmọ erhan ne iran viọ rre ma iran. 27Iran keghi tama e Mosis wẹẹ, “Ma ya ghe ẹvbo ne u gie ima ẹre ghe nẹ, otọe ne ẹfe ye ke vbe ne ọ maa emwiokọ nọ, usun ọmọ erhan ni rrọ ọre ena khin. 28Sokpan, emwa ni rrọ keghi re emwa ẹtin, a na wa vbe gbe ekẹn ọnrẹn ẹsẹse. Ne ọ ghi wa ya khọ sẹ ehia, ma miẹn avbe ivbi uniẹn arhuanran vbe evba. 29Odẹ ekẹn vbe otọ nii ọ re emwa Amalẹk ye, ẹvbo oke vbọ ọ re avbe Hiti Jebus, kevbe Amọri ye, ivbi Kenan keghi rre ọkpẹn okun Meditẹrrenian, iran yin lele Ẹzẹ Jọdan.”
30E Kelẹb keghi gbe eta ye avbe emwa nii gui ma e Mosis unu, ọ wẹẹ, “Te ima ra dekun ẹvbo nii ne a mu ẹẹn nian, ma wegbe sẹ ne ọ gha khọn rẹn miẹn otọ.” 31Sokpan avbe emwa ne iran vbe Kelẹb gba yo keghi kha wẹẹ, “Ẹn o, ma ma wegbe sẹ ne ọ gha dekun iran; iran ni rre evba wegbe sẹ mwa.” 32Iran na wewe iyẹn ohoghe vbe ekpa ẹvbo ne iran ya ghe gba ẹbu ivbi Izrẹl hia, Iran wẹẹ, “Evbare ne a miẹn vbe otọ nii i kue sẹ ẹvbo nii rrọọ re. Emwa ne ima miẹn hia wa ye higboo. 33Ma miẹn avbe arhuanran vbe evba, iran ne ivbi Anak. Ma keghi yevbe atete vbe ehe ne iran ye zẹ vbene ima ro egbe ima yi. Erriọ ọre ima gha vbe khọ vbe aro iran.”
Currently Selected:
Nọmbas 13: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
