Mak 9
9
1Ọ keghi rhie te ẹe wẹẹ, “Nẹ I tama uwa, emwa eso rre emwa na banbanna ni i ra wu ọ te do miẹn Arriọba Osanobua vbe ọ gha rre vbe ẹtin.”
Ọ Zẹ Idunna Fi Egbe Werriẹ
(Matiu 17:1-13; Luk 9:28-36)
2Ikpẹdẹ ehan ghi gberra nẹ, Jesu keghi rhie Pita, Jems kevbe Jọn ba egbe, iran ọkpa kegha rrie uhunmwu oke ne ọ yo. Ọ keghi sirra iran gha fi werriẹ. 3Ukpọn rẹn kegha fuọfua ọ kevbe fi wain wain, ọ fuọfua gberra vbene ọmwaikọmwa vbe agbọn na gha sẹtin họ ẹre sẹ. 4Avbe erhuanegbe eha ni keghi dẹghe Mosis kevbe Elaija vbe iran gu Jesu guan. 5Pita keghi guan ladian, ọ tama Jesu wẹẹ, “Ọmamwaemwi, ọ kere ne ima na gha rre emwa na, gie ima gba irhu eha, Ọkpa ọghe uwẹ, ọkpa ọghe Mosis, kevbe nọkpa ọghe Elaija.” 6Ke irẹn kevbe nekpa wa runran sẹrriọ ne ọ na ma ghi rẹn ẹmwẹ ne ọ gha guan.
7Okuku keghi ladian, ọ na mu aghọnghọn gue iran, urhu ọkpa keghi ke uwu okuku ni ladian wẹẹ, “Ọnọna ọre ovbi mwẹ ni ho ẹmwẹ ọnrẹn, wa họn ọghe ọe.” 8Iran keghi zẹgiẹgiẹ ghe ehe hia lẹga, iran ma miẹn ọmwa ọvbehe gberra Jesu ọkpa ne ọ gu iran rre evba.
9Ugbẹn vbe iran ghi tuorre ke uhunmwu oke dee, Jesu tama iran wẹẹ, “Wa ghẹ ta emwi ne uwa miẹn na ma ọmwarhọkpa vbe ẹ i re te Ovbi Ọmwa rhiọrre vbe orinmwi nẹ.”
10Iran keghi ru vbene ọ khare, sokpan, iran kegha nọ ọta vbe uwu ẹkpo iran wẹẹ, “Vbe a ya arhiọrre vbe orinmwi na kha yi?” 11Iran keghi nọ Jesu wẹẹ, “Vbọzẹ ne iran ni ma emwa Uhi na kha wẹẹ ẹ i mwẹ ne Elaija ghẹ ka rre?”
12Ọ wanniẹn tama iran wẹẹ, “Elaija rre do mwamwa emwi hia ye otọ nẹ. Levba sevba, vbọzẹ ne Ebe na kha wẹẹ, Ovbi Ọmwa gha rri oya emwi ni bun, a ghi vbe hẹe ye otọ? 13Vbene ọ rhirhi gha ye hẹẹ, ne I tama uwa nian wẹẹ Elaija rre nẹ, emwa keghi vbe ru ẹre emwi ne ọ khọn iran zẹ vbene Ebe vbe kha vbe ekpa ẹre.”
Jesu Sinmwi Ọvbokhan Okpia Ọkpa Ne O Mwẹ Orhiọn Esu
(Matiu 17:14-21; Luk 9:37-43a)
14Iran ghi do sẹ ehe ne erhuanegbe nekpa ye, iran ghi do ghe emwa wa gbe ẹbu ye evba. Eso vbe uwu iran ni ma emwa Uhi gu avbe erhuanegbe muan ẹmwẹ. 15Ugbẹn vbe iran ghi wa bẹghe Jesu, ọ yan iran unu uan, iran keghi rhulẹ bu ẹre ya tue ọe. 16Jesu keghi nọ avbe erhuanegbe ẹre wẹẹ, “De emwi ne uwa gu iran muan yi?”
17Orhiọnkpa keghi nien urhu ke uwu ẹbu rre wẹẹ, “Ọmamwaemwi, I rhie ovbi mwẹ ne okpia bu ruẹ gha dee rhunmwuda, ọ mwẹ orhiọn esu, ẹ i vbe guan. 18Ẹghẹ ne orhiọn ni rhirhi ya mu ẹn, ọ ghi mu ẹn fianmwẹ otọ, ọ ghi gha hu vbe unu, ọ ghi gha rri akọn, ọ ghi wa zeze. I wẹ ne avbe erhuanegbe ruẹ khu nene orhiọn ladian, sokpan iran ma sẹtin.”
19Jesu khama iran wẹẹ, “Wa izẹdẹ mwẹ iyayi hiehie re! Vbe I a gha kpee sẹ hẹ vbe ehe ne uwa ye? Vbe I a gha mu ẹmwẹ uwa wo egbe kpee sẹ hẹ! Rhie ne ọvbokhan gun mwẹ.” 20Iran keghi rhie ẹre bu Jesu gha dee. Ugbẹn vbe orhiọn ni ghi wa bẹghe Jesu, ọ keghi nien ọvbokhan nii uan, ọ rhie ẹre fianmwẹ otọ, Ọ kegha werriẹ lẹga, ọ kevbe gha hu vbe unu. 21Jesu keghi nọ erha ẹe wẹẹ, “Vbe ọ kpẹe sẹ hẹ ne ọ kegha ye vbe nian?” Ọ wanniẹn tama rẹn wẹẹ, “Ke ẹghẹ ọvbokhan rẹn gha dee nọ. 22Ẹghẹ ni bun ọre ọ he te wa ya gha ho ne ọ wa gbe ẹe rua, vbene ọ na mu ẹn fi erhẹn mu ẹn fi amẹ. Lahọ tohan ima ne u yi ima obọ deghẹ u gha sẹtin.”
23Jesu wanniẹn wẹẹ, “An, a deghẹ u gha sẹtin! A i miẹn emwi ne ẹ i gie a ru ne ọmwa ne ọ mwẹ iyayi.” 24Erha ẹe keghi wa datu wẹẹ, “I mwẹ iyayi sokpan ọ ma kpọlọ sẹ. Lahọ ne u yọ mwẹ obọ ne ọ sẹ ayọ.”
25Jesu ghi ghee, emwa ni gbe ẹbu ye evba hẹko do lẹga iran, ọ keghi gu orhiọn dan ni guan wẹẹ, “Wẹ ne orhiọn odin ne ọ vbe yin ehọ, I tama ruẹn nian ne u ladian vbe egbe ọmọ na, ghẹ ghi dọlegbe la uwu ẹre ọvbehe.”
26Orhiọn nii keghi datu, ọ nien ọvbokhan ni uan, ọ keghi ladian, ọvbokhan nii na wa ye vbe orinmwi, sẹrriọ ne emwa hia ghi na gha kha wẹ, “Ọ wu.” 27Sokpan Jesu keghi rhie ọvbokhan nii obọ, ọ si ẹe kpao, ọ keghi kpaegbe mudia.
28Jesu ghi la uwu owa nẹ, avbe erhuanegbe ẹre nọ rẹn wẹẹ, “Vbọzẹ ne ima ma na sẹtin khu orhiọn nii ladian?”
29Jesu wanniẹn wẹ, “Emwi ọvbehe nọ sẹtin khu egbe ọnii ladian ẹ i rrọọ gberra erhunmwu.”
Jesu Dọlegbe Guan Kan Ẹmwẹ Uwu Irẹn
(Matiu 17:22-23; Luk 9:43b-45)
30Iran keghi ke evba kpao gha rrie odẹ Galili, Jesu ma vbe ho ne ọmwa rhọkpa rẹn ehe ne irẹn ye. 31Rhunmwuda ọnii, ọ kegha ma avbe erhuanegbe ẹre emwi wẹẹ, “A gha rhie Ovbi Ọmwa yan iran ne avbe emwa obọ, iran gha gbe ẹe rua, sokpan, ọ gha rhiọrre vbe iyeke ikpẹdẹ eha.”
32Iran ma rẹn emwi ne ọ ya ẹmwẹ na kha sokpan ohan ma gie iran nọ rẹn.
Gha Ọre Ne Ọ Kpolo Se Ehia
(Matiu 18:1-5; Luk 9:46-48)
33Iran keghi do sẹ Kapaniọn, iran ghi la uwu owa nẹ, Jesu nọ avbe erhuanegbe ẹre wẹ, “De ẹmwẹ ne uwa gha muan vbe odẹ?” 34Iran ma zẹmwẹ wanniẹn ọẹn rhunmwuda iran gha a muan ẹmwẹ vbe odẹ ba ẹmwẹ ne ọre ne ọ kpọlọ sẹ ehia. 35Jesu keghi tota, ọ tie iran ne erhuanegbe iweva, ọ tama iran wẹẹ, “Ọmwaikọmwa ne ọ ho ne irẹn gha re okaro, gie ẹe rhie egbe ẹre ye okiekie ehia, ne ọ vbe gha re ọguọmwadia ehia.” 36Ọ keghi rhie ọvbokhan ọkpa mudia vbe odaro iran, ọ keghi ye obọ kin ẹre urhu, ọ wẹẹ, 37“Ọmwaikọmwa ne ọ rhunmwuda mwẹ miẹn ọkpa vbe uwu ibiẹka na yi, mẹ ọre ọ miẹn yi, ọmwaikọmwa ne ọ miẹn mwẹ yi, ẹ i re imẹ ọkpa ọre ọ miẹn yi sokpan ọ vbe miẹn ọmwa ne ọ gie mwẹ yi ba ẹre.”
Ọmwa Ne Ẹ I Gbe Odan Ghe Mwa, Otu Mwa Ọre Ọ Ye
(Luk 9:49-50)
38E Jọn, keghi do khama rẹn wẹẹ, “Ọmamwaemwi, ma miẹn okpia ọkpa ne ọ ya eni ruẹn khu orhiọn esu ladian, ma keghi da ẹre obọ yi rhunmwuda ighe ẹ i re ọkpa vbe uwu ima.”
39Jesu wanniẹn wẹẹ, “Wa ghẹ da ẹre obọ yi rhunmwuda ọmwa ọkpa ne ọ gha ya eni mwẹ winna iwinna ọyunnuan nẹ, ne ọ vbe gha filo unu gunmwu, ẹ i rrọọ. 40Rhunmwuda, ọmwa ne ọ ma gbe odan gha mwa, otu mwa ọre ọ ye. 41Wa ghi ye rre wẹẹ, ọmwaikọmwa ne ọ sa ukpu amẹ ọkpa ne uwa wọn rhunmwuda ighe wa re ọghe Kristi, ọ gha rri ere ẹre.
Orukhọ Ne A Si Omwa Fi
(Matiu 18:6-9; Luk 17:1-2)
42“Ọ wa fu egbe sẹ ne a de olọ ye ọmwa urhu na fi ẹe fi uwu okun sẹ ne a ya ọkpa vbe uwu iran ne giẹrẹ ni ya mwẹ yi ba odẹ mwẹ ku. 43Rhunmwuda ọnii, deghẹ obọ ruẹ ọre ọ ra ya a ba odẹ ku fian ẹn fua, u ye obọ ọkpa gha rrie ihe ẹfe ọre ọ maa sẹ ne u ye obọ eva gha rrie ẹrinmwi erhẹn ne ẹ i dọyọ ẹdẹdẹmwẹdẹ. 44[Vbe evba okhọe ne ọ rrọọ ẹ i wu, erhẹn ne ọ rrọọ, ẹ i vbe dọyọ.] 45A deghẹ owẹ ruẹ ọ ra ya a bibi odẹ, fian ẹn fua! U ye owẹ ọkpa la ihe ẹfe ọre ọ maa sẹ ne a muẹn mu owẹ eva fi ẹrinmwi ne ehianmwẹ ivin. 46[Vbe evba ọkhọe ne ọ rrọọ ẹ i wu, erhẹn ne ọ rrọọ ẹ i vbe dọyọ.] 47A deghẹ aro ruẹ ọre ọ ra ya bibi odẹ, wọlọ ẹe rhie fua, u ya aro ọkpa la Arriọba Osanobua, ọre ọ maa sẹ ne a muẹn mu aro ruẹ eva fi uwu ẹrinmwi ne ehianmwẹ ivin. 48Vbe evba ọkhọe ne ọ rrọọ ẹ wu, erhẹn ne ọ rrọọ ẹ vbe dọyọ.
49“Rhunmwuda erhẹn ọre a ra ya ye umwẹ ye edọmwadẹ ọghọe. 50Umwẹ maa, sokpan adeghẹ orhiẹnrhiẹn ọnrẹn ghi fafaa nẹ, de emwi ne a ghẹ ghi ya ru ẹe ne ọ do gha rhiẹnrhiẹn? Wa gha mwẹ umwẹ vbe uwu uwa, ne uwa vbe gha gu egbe uwa rrọọ vbe ọfumwegbe.”
Currently Selected:
Mak 9: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
