Mak 11
11
O Si Ọbọbọ I Ru Ne La Jerusalẹm
(Matiu 21:1-11; Luk 19:28-40; Jọn 12:12-19)
1Iran ghi sikẹ Jerusalẹm, vbe iran sẹ Bẹtfag kevbe Bẹtani, iran kegha die uhunmwu oke erhan Ọliv. Jesu keghi gie eva vbe uwu avbe erhuanegbe ẹre ke odaro. 2Ọ tama iran wẹẹ, “Wa gha rrie avbe ẹvbo ni rre odaro uwa na. Wa gha wa da larọ, wa gha miẹn ovbi ekẹtẹkẹtẹ ne a ma he ka hin, a de ẹre, wa rhan rẹn ne uwa si ẹe gha dee. 3Deghẹ ọmwaikọmwa nọ uwa wẹẹ, ‘Vbe uwa ru ọnii hẹẹ?’ Wa tama rẹn wẹẹ, ‘Arowa mwa mwẹ vbe ọ ya ẹe ru, ọ gha vbe dọlegbe mu ẹn rre banban.’ ”
4Rhunmwuda ọnii, iran kegha khian, iran keghi do vba a dee ovbi ekẹtẹkẹtẹ ni ye onurho owa ọkpa. Iran keghu suẹn gha rhan ẹn. 5Eso vbe uwu emwa ni mudia vba keghi nọ iran wẹẹ, “Vbe uwa ru yi ne uwa na rhan ovbi ekẹtẹkẹtẹ nii?”
6Iran keghi wanniẹn vbene Jesu tama iran. Avbe emwa nii keghi gie iran mu ẹn gha khian. 7Iran keghi mu ovbi ekẹtẹkẹtẹ ni bu Jesu gha dee, iran wa agbada ẹwu iran yan rẹn, Jesu keghi hin ẹnrẹn. 8Emwa ni bun keghi vbe wa agbada ẹwu iran lele odẹ. Emwa ọvbehe keghi vbe giagia abọ erhan ne giẹrẹ ke oha rre, iran keghi vbe wa ẹre lele odẹ. 9Iran ni khian vbe odaro ẹre kevbe iran ni lele ẹre odieke dee keghi suẹn gha datu wẹẹ, “Wa rho Osanobua! Te Osanobua gha fiangbe ọmwa ne ọ dee vbe eni ọghe Nọyaẹnmwa! 10Te Osanobua gha fiangbe arriọba ne ọ dee, ọghe Devid ne erhamwa! Urhomwẹ nọ ne Osanobua.”
11Jesu keghi lao Jerusalẹm, ọ kegha rrie uwu Ọgua Osa, ọ na kin emwi hia lẹga sokpan, rhunmwuda ighe ẹdẹ khian ota nẹ, ke irẹn kevbe avbe erhuanegbe ẹre iweva keghi dọlegbe gha rrie Bẹtani.
Jesu Fi Erhan Ohọ Unu
(Matiu 21:18-19)
12Ugbẹn vbe iran ghi ke Bẹtani de vbe ikpẹdẹ ne ogieva, ohanmwẹ kegha gbe Jesu. 13Ọ keghi ya bẹghe erhan ohọ ọkpa ne ọ wa họn ebe ẹsẹse vbe urria. Rẹn keghi sikẹ ọre a deghẹ ọ gha miẹn ọmọ vbe uhunmwu ẹnrẹn, sokpan ugbẹn vbe ọ sẹ evba, ebe ọkpa ọre ọ miẹn vbọ rhunmwuda, ọ ma he sẹ ẹghẹ ohọ. 14Jesu keghi tama erhan ohọ ni wẹẹ, “A i gha dọlegbe miẹn ọmọ ne u mọẹn re ọvbehe.” Avbe erhuanegbe ẹre keghi họn.
La Uwu Ọgua Osa
(Matiu 21:12-17; Luk 19:45-48; Jọn 2:13-22)
15Ugbẹn vbe iran ghi sẹ Jerusalẹm, Jesu kegha rrie uwu Ọgua Osa, ọ keghi suẹn gha khulo iran ni khiẹn kevbe ni dẹ vbe uwu Ọgua Osa, ladian. Ọ keghi ya eteburu iran ni rọ igho uhunmwu rhu kevbe ukhuerhe iran ni khiẹn elikhukhu. 16Ọ ma vbe gie ọmwa rhọkpa mu emwi la Ọgua Osa gberra. 17Ọ keghi ma avbe emwa ni re wẹẹ, “A gbẹn ọẹn ye uwu Ebe wẹ Osanobua khare wẹẹ, ‘Owa mwẹ owa erhunmwu ọghe emwa hia ọre a gha tie ẹre re,’ sokpan wa fiẹe werriẹ khian ẹgun avbe oyi!”
18Avbe iran ne igie ohẹn kevbe iran ni ma emwa Uhi ghi họn ẹmwẹ na, iran kegha gualọ odẹ vbene iran gha ya gbe Jesu ua hẹẹ. Ohan rẹn kegha mu iran rhunmwuda vbene ọ ya ma emwa emwi wa yan emwa ni gbe ẹbu ye evba unu uan.
19Ugbẹn vbe ọ ghi sẹ ota, Jesu kevbe avbe erhuanegbe ẹre keghi kpao vbe adesẹ ore ẹvbo rre.
Iruẹmwi Ne A Miẹn Ruẹ Vbe Egbe Ohọ
(Matiu 21:20-22)
20Vbe owiẹ ikpẹdẹ ne ogieva, iran ghi khian vbe odẹ iran keghi bẹghe erhan ohọ nii, ọ wa wu ke uhunmwu sẹ otọ. 21Pita keghi ye emwi ne ọ sunu rre, ọ na khama Jesu wẹẹ, “Ọmamwaemwi, ghe vbe erhan ohọ ne u fi ẹre unu wu.”
22Jesu wanniẹn iran ẹmwẹ wẹẹ, “Wa mu ẹtin yan Osanobua. 23Ẹmwata I tama uwa, a deghẹ wa tama oke na wẹẹ, ‘Kpẹngiẹn, ne u ya de fi uwu okun,’ ighe u ma vbe ba iro eva vbe uwu ekhọe ruẹ, u na yayi wẹ ẹmwẹ ne u tae gha sẹ, te a gha ruẹe nuẹn. 24Rhunmwuda ọnii nian, mẹ tama uwa. U gha na erhunmwu, u na nọ emwi eso, yayi ighe ọ sẹ uwẹ obọ nẹ, a gha viọ emwi ne u rhirhi nọ nuẹn. 25U gha mudia ne u na erhunmwu, yabọ emwi ne emwa a rhirhi ru uẹ re, ne Erha a ne ọ rre ẹrinmwi miẹn ehe na ye orukhọ ruẹ bọọ. 26[Deghẹ uwa ma yabọ emwa ọvbehe, Erha uwa ne ọ rre ẹrinmwi i vbe yabọ uwa.]”
Ẹmwẹ Deghẹ Jesu Mwẹ Asẹ
(Matiu 21:23-27; Luk 20:1-8)
27Iran keghi dọlegbe gha die Jerusalẹm. Ugbẹn vbe Jesu ghi khian vbe uwu Ọgua Osa, avbe igiohẹn avbe iran ni ma emwa Uhi kevbe avbe ediọn nọ rẹn wẹẹ, 28“De asẹ ne u mwẹ ne u ya ru avbe emwi na? Gha ọ rhie asẹ na nuẹn?”
29Jesu wanniẹn tama iran wẹẹ, “I gha nọ uwa ọta ọkpa kẹkan, wa gha rhie ewanniẹn yọmwẹ ẹre, I gha tama uwa asẹ ne I mwẹ ne I ya ru emwi na hia. 30Wa tama mwẹ, de ehe ne Jọn na miẹn asẹ ne ọ ya samẹ yi, obọ Osanobua ra obọ ọmwa?”
31Iran keghi suẹn gha gbe nene ẹmwẹ yo gbẹe rre wẹẹ, “Vbe a gha tae hẹ yi? Ma gha kha wẹ, ‘Obọ Osanobua nọ’ rẹn gha kha wẹ ‘Vbọzẹ ne uwa ma ghi na ye Jọn yi?’ 32Sokpan a deghẹ ma khare wẹẹ, ‘Obọ ọmwa’ ” (Ohan emwa kegha mu iran, rhunmwuda emwa hia wa rẹn wẹ akhasẹ ọre Jọn khin.) 33Rhunmwuda ọnii, iran khama Jesu wẹẹ, “Ma ma rẹn.”
Jesu keghi vbe tama iran wẹẹ, “Mẹ i vbe tama uwa ẹtin ne I ya ru emwi na khekherriọ.”
Currently Selected:
Mak 11: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
