Maika 4
4
Arriọba Ọfumwegbe E Nọyaẹnmwa Vbe Agbọn Hia
(Aizaia 2:1-4)
1Ẹdẹ dee ne a gha miẹn wẹ
oke nii ne a bọ Ọgua Osa yi ọ re ọ ra yo sẹ ehia fẹẹrẹ,
ọ ghi gha ghee ni dekẹe adesẹ uhunmwu.
Agbọn ẹvbo nibun gha rre, iran ghi gha vẹ bu ẹre rre.
2Avbe emwa iran ghi gha kha wẹẹ,
“Wa gie ima hin oke Nọyaẹnmwa gha rrie Ọgua Osa, Osanobua Izrẹl.
Rhunmwuda, ọ gha ma ima emwi ne ọ ho ne ima ru,
ma gha lele urodẹ ne irẹn zẹe,
rhunmwuda, e Jerusalẹm ọ re iruẹmwi e Nọyaẹnmwa ke rre;
e Zaiọn ọ re ọ ke guan gie emwa irẹn.”
3Ọ gha bu ohiẹn ẹvbo ni mwẹ egbe ẹzọ.
Avbe ẹvbo ni mwẹ ẹtin, ni sikẹ emwa kevbe ni rrei,
iran gha ya umozo iran gbe ẹguẹ,
kevbe asoro iran, erọ ulema.
Uhunmwu ẹvbo i ghi mu okuo gie egbe ọvbehe,
iran i ghi vbe mu egbe okuo ọvbehe.
4Edọmwadẹ ọghọe gha rrọọ vbe ọfumwegbe vbe ugbo azara kevbe oliv ẹre,
ọmwarhọkpa i ghi vbe runran ẹẹn.
E Nọyaẹnmwa ne Oghodua ru eyan na nẹ.
5Dọmwadẹ ẹvbo ọ re ọ gho,
ọ ghi vbe họn ẹmwẹ ne ẹbọ ẹre,
sokpan, ma gha ga,
ma ghi vbe gha họn ẹmwẹ ne
Nọyaẹnmwa ne Osanobua ima ẹdẹdẹmwẹdẹ.
Ivbi Izrẹl Gha Ke Iwe Rre
6E Nọyaẹnmwa khare wẹẹ, “Ẹdẹ dee, ne I gha si avbe emwa ne I rri ọre oya koko, iran ni rri oya vbe iwe. 7A kun iran use, iran vbe khian rrei vbe owa, sokpan, I gha ya iran ni ghi ke ẹe mu omuhẹn ọvbehe, iran gha vbe do khian okpẹvbo nọkhua. Mẹ ghi gha ke oke Zaiọn khaemwisẹ yan iran ke ẹghẹ nii kpao kevbe rhinrin ẹdẹdẹmwẹdẹ.”
8Kevbe uwẹ ne Jerusalẹm ehe ne Osanobua ke rhie aro lele avbe emwa rẹn, zẹ vbene ọsuohuan ke owa ọkhẹ ne ọ yo rhie aro lele avbe ohuan rẹn, u gha dọlegbe khian igiogbẹ ẹvbo ne ọ te kagha re ọwuẹ yi. 9Vbọzẹ ne u na go gboo vberriọ yi? Vbọzẹ ne u na rri oya zẹ vbe okhuo ne emwi ubiẹmwẹ ru? Rhunmwuda ighe wa i mwẹ ọba nọ ra, kevbe wẹ avbe iran ni gu uwa zẹ iro vbe wulo? 10Wa gha mannọ egbe ne uwa gha rriakọn, zẹ vbe okhuo ne ọ ra biẹ, wa ne ivbi e Jerusalẹm, rhunmwuda, te uwa ghẹ ghi kpao hin adesẹ ore rre, ne uwa ya di oha ya. Te uwa ghẹ ghi yo e Babilọn nian, sokpan, evba nii ọ re Nọyaẹnmwa ra na ya fannọ uwa ye otọ vbe ohọ eghian uwa. 11Uhunmwu ẹvbo si koko, ne iran mu okuo gie uwa. Iran wẹẹ, “Te a gha dunmwu e Jerusalẹm sẹ otọ. Ma gha ya ẹvbo na khian itowa!”
12Sokpan, avbe uhunmwu ẹvbo na ma rẹn emwi ne ọ rre Osanobua ekhọe. Iran ma rẹn wẹ te a si iran gboo ye ihọkpa ne a rri iran oya, zẹ vbene a si ọka gboo ne a miẹn ehe na dunmwu ẹn.
13E Nọyaẹnmwa khare wẹẹ, “Wa ne ivbi e Jerusalẹm, wa ya rri avbe eghian uwa oya. I gha ya uwa wegbe zẹ vbe ẹkhuia ne ọ mwẹ igho ematọn kevbe ibata owẹ oze. Wa gha dunmwu avbe okpẹvbo nibun sẹ otọ, avbe ẹfe ne iran ye ghe ẹe rua si koko, wa ghi viọ iran gunmwẹ, mẹ ne ọ re Nọyaẹnmwa ọghe otagbọn hia.”
Currently Selected:
Maika 4: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
