Maika 1
1
1Ẹghẹ ne Jotam, Ehaz kevbe Hẹzekaia na gha re avbe ọba e Juda, ọ re Nọyaẹnmwa na gie Maika ne ovbi ẹvbo ne a tie ẹre Morẹsiẹt. E Nọyaẹnmwa keghi rhie avbe emwi na ma e Maika vbe ekpa Sameria kevbe Jerusalẹm.
Eve Ne A Viẹe Ne Sameria Kevbe Jerusalẹm
2Wa danmwehọ ẹmwẹ na, wa ne uhunmwu ẹvbo hia,
wa danmwehọ, wa hia ni rre agbọn na!
E Nọyaẹnmwa ne Udazi gha sẹ osẹe gbe uwa.
Danmwehọ. Ọgua Osa ẹre vbe ẹrinmwi ọ re ọ ke guan rre.
3Ehe nọhuanrẹn ọghe ọe ọ re Nọyaẹnmwa gha kegha dee.
Ọ gha tuorre, ọ ghi gha khian vbe uhunmwu avbe oke ni yo.
4Ẹghẹ nii, avbe oke nekhua nii ghi ranran vbe ototọ owẹ ọre,
zẹ vbene odan ranran vbe erhẹn
iran gha lẹ ku uwu iya zẹ vbene amẹ lẹ ke uhunmwu oke rre.
5Ena hia gha sunu rhunmwuda ivbi Izrẹl ru orukhọ nẹ, iran keghi vbe sọtẹ ghe Osanobua. De ọmwa ne a gha lẹ isọtẹ ivbi Izrẹl ginna ẹre obọ yi? E Sameria ne igiogbẹ ẹvbo nii tobọ ẹre! De ọmwa ne ọ rri abe ẹbọ ne a gho vbe Juda yi? E Jerusalẹm tobọ ẹre nọ ra! 6Rhunmwuda ọnii e Nọyaẹnmwa khare wẹẹ, “I gha ye Sameria khian itowa ne ọ vbiolo yan egbe vbe otọ oha, ehe ne a gha kọ alimo ayọn yi. I gha kpolo ẹvbo nii zẹ vbe iku ku uwu iya, I gha vbe gie agbọn miẹn ẹyotọ ẹre. 7Avbe ẹbọ ẹre hia ne eghẹnghẹn, a gha dunmwu ẹẹn ruan, emwi ne a te hẹ ne avbe ohẹn ne ikhuoẹre, a gha ye erhẹn giẹn uan, avbe amazẹ ọre hia gha khian utete ne ọ dihoi rua. E Sameria ọ re ọ viọ avbe emwi na rre ne ọ ya dugie ne otọ ẹre miẹn ehe na gha ma emwiokọ; banbanna nian, te avbe eghian rẹn ra viọ kpao, ne iran ya gha gho ẹre vbe ehe ọvbehe.”
8E Maika keghi kha wẹẹ, “Rhunmwuda ọna, I gha khiẹ, I gha viẹ eve orriara. Ne I ya rhie ma vbene I miẹn akhiẹ sẹ hẹ, I gha ya irhunmwuirhun kevbe owẹ kẹkan khian la ẹvbo nii gaa, I gha tu wauwauwau zẹ vbe ekuaghagha, I gha viẹ egbe mwẹ uan zẹ vbe ugomugo. 9A i sẹtin kpe ẹwẹn e Sameria rrie, emwi vberriọ gha mian e Juda ban, ọfuan sẹ onurho e Jerusalẹm tobọ ẹre nẹ, ehe ne emwa mwẹ ye.”
Eghian Sikẹ Jerusalẹm
10Ghẹ tama avbe eghian mwa ni rre Gat vbene obọ ke ukhunmwu ne ima hẹ; ghẹ gie iran bẹghe ruẹ vbe u viẹ. Wa ne ivbi Bẹt Leafra, wa gha wunnu vbe otọ ne uwa ya rhie ma vbene ọ balọ uwa hẹ. 11Wa ne ivbi Siafa, wa gha rrie iwe, vbe irhunmwuirhun kevbe ekhue. Ohan i ghi gie iran ni rre Zaanan ladian hin ore ẹvbo iran rre. Wa gha họn vbene ivbi Betezẹl ya khiẹ hẹ, wa gha wa rẹn wẹ, ehe ne a lẹre yi i ghi rre evba. 12Ivbi e Marọt rhie aro ye odẹ gha khẹ ne a bu iran rre, rhunmwuda, e Nọyaẹnmwa si ọkhọ kẹ ore Jerusalẹm nẹ. 13Wa ni rre Lakis, wa gbalọ ẹsin mu avbe ikẹkẹ okuo. Wa ọ re ọ ya egbe ta orukhọ ivbi Izrẹl wa na vbe gie Jerusalẹm ru orukhọ. 14Banbanna nian, wa ne ivbi e Juda, wa gbe ọkhian ẹdẹ hia ne emwa ni rre Morẹsiẹt Gat. Ọba Izrẹl i ra miẹn iyobọ vbe obọ ẹvbo ne a tie ẹre Akzib.
15Ivbi ẹvbo ne a tie ẹre Maresia, e Nọyaẹnmwa gha viọ uwa ye eghian obọ, iran nii gha khọn miẹn uwa ẹvbo. Avbe ọkaolotu Izrẹl gha ya lẹre ye uvun okuta ọghe Adulam.
16Wa ne ivbi e Juda, wa zẹ eto uwa ne uwa ya khiẹ emọ ne uwa ho ẹmwẹ ọnrẹn. Wa gie akpan gha rre uwa uhunmwu zẹ vbene ọghe ugu ye, rhunmwuda, a gha miẹn uwa ivbi uwa viọ gha rrie iwe.
Currently Selected:
Maika 1: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
