Matiu 7
7
Ohiẹn Ẹrrẹe
(Luk 6:37-38, 41-42)
1“Wa ghẹ buohiẹn ẹrrẹ, ne Osanobua ghẹ vbe bu ohiẹn uwa. 2Rhunmwuda vbene uwa ya bu ohiẹn ẹrrẹ, ọre Osanobua ra vbe ya bu ọghe uwa. Omwa ne uwa ya mwa ne ẹrrẹ, ọre a ra vbe ya mwa ne uwa. 3Vbọzẹ ne uwẹ na ghe iku erhan ne ọ rre ọtuẹn aro yi vbe u ma zẹye ẹmwẹ ike erhan ne ọ rre uwẹ aro? 4Ekhue imuẹn vbe uwẹ a khama ọtuẹn wẹẹ, ‘Gunmwẹ rhie iku erhan hin ruẹn aro rre,’ ugbẹn vbe ike erhan rre uwẹ aro? 5Wẹ ne ayunukpaegbe! Ka mu ike erhan hin aro ruẹ rre nẹ, erriọ ọre u gha na bẹghe odẹ ya rhie iku erhan hin ọtuẹn aro rre.
6“Ghẹ rhie emwi nọhuanrẹn ne ekita, te ọ ra gha gbọọ ruẹ kẹkan. Ghẹ rhie emwi uzọmọ ye odaro esiebo, te ọ ra ya owẹ rri ẹe ginna otọ.
Nọọn, Gualọ, Sobọ
(Luk 11:9-13)
7“Nọọn, ọ gha suọ obọ, gualọ, u gha miẹn, sobọ, a gha kie nuẹn. 8Rhunmwuda ne ọ nọrẹn ọre a rhie na, ne ọ gualọe ọre ọ miẹn, ne ọ sobọ ọre a kie na. 9Wa ne erha emọ, ovbi uwa gha nọ uwa eka, wa gha mu okuta ye ọre obọ ra. 10Ra wa gha rhie ẹyẹn ne ne ọ nọ ehẹn? 11Vbene uwa ghi vbe rhia sẹ, wa ye rẹn ya gha rhie emwi ne ọ maa ne ivbi uwa, wa ma ghi la evba rẹn ighe Erha uwa ne ọ rre ẹrinmwi gha viọ emwi esi ne iran ni nọrẹn vbe obọ ẹre.
12“Ru ne emwa ọvbehe egbe emwi ne uwẹ ho ne iran ru ne uwẹ. Emwi na ya Uhi Mosis kevbe avbe akhasẹ kha ọre ọnii khin.
Odẹ Ne Wẹnrẹn
(Luk 13:24)
13“Wa la onurho ne wẹnrẹn la owa, rhunmwuda, te onurho ẹrinmwi erhẹn ye gbodoo, odẹ ne a la sọe vbe rriẹ, emwa ni lae wa vbe bun. 14Sokpan te onurho arrọọ ye wẹnrẹn, odẹ ne a la sọe ma vbe rriẹ, ibozẹghẹ ọre ọ vbe lae.
Erhan Kevbe Ọmọ Ne Ọmọẹn
(Luk 6:43-44)
15“Wa gha ba avbe akhasẹ ohoghe. Iran gha mu akpa ohuan khuẹrhẹ yọ bu uwa rre, sokpan oduma dan iran wa khọ vbe uwu egbe. 16Uyinmwẹ iran ọre uwa gha ya rẹn iran. Ọkhuẹnkhuẹn i mọ azara ra ne ogigban mọ ohọ. 17Erhan esi ọre ọmọ ọmọ esi, erhan dan ọre ọ vbe mọ ọmọ dan. 18Erhan esi i sẹtin mọ ọmọ dan, erhan dan i sẹtin mọ ọmọ esi. 19Erhan ne ọ ma mọ ọmọ esi, a gha tọẹn gbe otọ, a ghi hiọrọe fi erhẹn. 20Uyinmwẹ iran ọre uwa gha ya rẹn avbe akhasẹ ohoghe na.
I Ma Rẹn Uwa
(Luk 13:25-27)
21“Ẹ i re emwa hia ni tie mwẹ ‘Nọyaẹnmwa, Nọyaẹnmwa’ ọre ọ gha la Arriọba Osanobua, sokpan emwa ni ru iho erha mwẹ ne ọ rre ẹrinmwi. 22Ogha sẹ ẹdẹ ne a kha na, emwa nibun gha khama mwẹ wẹẹ, ‘Nọyaẹnmwa, Nọyaẹnmwa, ma ya eni ruẹn kporhu Osanobua. Ma khulo orhiọn dan nibun ladian. Ma winna iwinna ọyunnuan nibun vbe eni ruẹn.’ 23Ẹghẹ ni ọre I gha na tama iran wẹẹ, ‘I ma rẹn uwa, wa ladian mwa, wa ni winna iwinna orukhọ.’
Arhiẹn Eva Ni Bọ Owa
(Luk 6:47-49)
24“Rhunmwuda ọnii, ọmwaikọmwa ne ọ họn ẹmwẹ mwẹ na, ọ na vbe yae gha yin, I gha yae gie umẹwaẹn ọkpa ne ọ bọ owa yan okuta. 25Okpamẹ keghi daa, ezẹ hia keghi ro dinna oke, ẹhoho keghi dekun owa ni, sokpan ọ ma de rhunmwuda okuta ọre a bọe yan. 26Sokpan ọmwaikọmwa ne ọ họn ẹmwẹ na ighe ọ ma yae yin, I gha yae gie ọzuọ ọkpa ne ọ bọ owa ẹre yan uzekhae. 27Okpamẹ keghi daa, ẹzẹ hia keghi ro dinna oke, ẹhoho keghi dekun owa ni, ọ keghi de, ọ na rẹnkhuan.”
Asẹ Ọghe Jesu
28Ugbẹn vbe Jesu ghi guan ẹmwẹ na hia nẹ, unu keghi yan emwa ni rre evba rhunmwuda, vbene ọ ya ma emwa emwi hẹ. 29Ọ ma ye vbe iran ni ma emwa Uhi. Ẹmwẹ asẹ ọghe obọ ẹre ọre ọ ta.
Currently Selected:
Matiu 7: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
